MATAYO 1
1
Lwivulu lwa Yesu Kristo
(Luka 3:23-38)
1Yishi ni shitabu shiu lwivulu lwa Yesu Kristo, mwitsukhulu wa Daudi, nali mwitsukhulu wa Aburahamu.
2Aburahamu yivula Isaka, Isaka niyivula Yakobo; Yakobo niyivula Yuda na vamwavo veve. 3Yuda yivula khu Tamara, vaana Perezi nende Zera. Perezi yivula Hezironi, Hezironi niyivula Raama.#1:3 Raama: Muluguriki ni “Aramu.” 4Raama yivula Aminadabu, Aminadabu niyivula Nahashoni; Nahashoni niyivula Salumoni. 5Salumoni yivula Boazi khu Rahabu, ma Boazi niyivula khu Rutsi Obedi. Obedi yivula Yese, 6Yese niyivula Mwami Daudi, wivula Solomoni khu mukhali wali wa Uria. 7Solomoni yivula Rehobohamu; Rehobohamu niyivula Abiya. Abiya yivula Asa,#1:7 Asa: Muluguriki ni “Asafu.” 8Asa niyivula Yehoshafati. Yehoshafati yivula Yoramu; Yoramu niyivula Uzia. 9Uzia yivula Yotsamu; Yotsamu niyivula Ahazi. Ahazi yivula Hezekia, 10Hezekia niyivula Manaase. Manaase yivula Amoni; Amoni niyivula Yosia. 11Yosia yivula Yehoyakini na vamwavo veve, mumatukhu ka Vaisraeli vahilwa mu vuhaambe Babilonia.
12Lwa vali nivakharula mu vuhaambe Babilonia: Yehoyakini yivula Shalitieli, Shalitieli niyivula Zerubabeli. 13Zerubabeli yivula Abihudi, Abihudi niyivula Eliakimu. Eliakimu yivula Azori, 14Azori niyivula Zadoko. Zadoko yivula Achimu, ma Achimu niyivula Eliudi. 15Eliudi yivula Eliazari, ma Eliazari niyivula Matsani. Matsani yivula Yakobo; 16Yakobo niyivula Yosefu, wali musatsa wa Mariya, wivula Yesu, ulaangwangwa Masiha.
17Makhula koosi khurula khu Aburahamu khutukha khu Daudi kali likhomi na kane. Khurula khu Daudi khutukha khulihilwa mu vuhaambe Babilonia khwali na makhula likhomi na kane; khandi khurula khulihilwa mu vuhaambe Babilonia khutukha khulivulwa lia Masiha khwali na makhula likhomi na kane.
Livulwa lia Yesu Kristo
(Luka 2:1-7)
18Nindi livulwa lia Yesu Kristo liali. Mama wewe walaangwangwa Mariya yali waselelwa na Yosefu, navutswa nivashili khuhilana, yanyolekha ndi wavelekha mwana khuvirila mu tsingulu tsia Roho Mutakatifu. 19Yosefu yali mundu wi likhola liu vulunji khandi yambakhana khuha Mariya tsisoni havulavu. Yakanakana khuli anyala khumulekha muvwivisi. 20Lwa yali nashikanakananga ndio, injelosi yu Mwami Nyasaye yalolekha khuye khuvirila mu malooro nivoola, “Yosefu, mwitsukhulu wa Daudi, lekha khuhila Mariya khuva mukhali wowo; shichila wavelekha mwana khuvirila mu tsingulu tsia Roho Mutakatifu. 21Mariya aliitsa khwivula mwana wi shiyayi, nivi uliitsa khumukulikha lira Yesu, shichila aliitsa khuhonyinya vandu veve khurula mu vwoni vwavo.”
22Yaka koosi kikholekha khurweshitsa ku Mwami Nyasaye yali niyavoola khuvirila khu muprofeti: 23“Loli! Mwana wi shikhana muchima aliitsa khuvelekha nu khwivula mwana wi shiyayi. Aliitsa khukulikhwa lira Imanuweli” (kavoolanga, “Nyasaye ali na khutsi.”)
24Lwa Yosefu yavukha mu tsindolo, yahila Mariya nava mukhali wewe, khuli injelosi yu Mwami Nyasaye yali nimuvoolele akhole. 25Navutswa Yosefu yambakhana khukona naye nashili khwivula mwana wewe. Yosefu yamukulikha lira Yesu.
Currently Selected:
MATAYO 1: LLLPRO
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013