MATAYO 2
2
Vacheni Khurula Ivukwi
1Yesu yivulwa mu litaala lia Betselehemu mu lusomo lwa Yudeya, mumatukha ku Mwami Herode yamihanga. Mumatukhu kenako, vandu vu vusitsa vatukha mu Yerusalemi nivarula ivukwi, nivareeva, 2“Ali hena mwana wivulwi uliitsa khuva Mwami wa Vayahudi? Shichila khuloli inyining'ini yeye ivukwi, khandi khwitsi khusaala khuye.”
3Lwa Mwami Herode yahulila ndio, yanyakhana vululu muno, halala na vandu voosi mu Yerusalemi. 4Herode yalaanga halala vasalisi vakali nende veechitsi va Malako, navareeva, “Ni hena ha Masiha aliitsa khwivulwa?”
5Vachipa, “Aliitsa khwivulwa mu litaala lia Betselehemu, mu lusomo lwa Yudeya; shichila nako ku muprofeti yahandika:
6‘Yivi litaala lia Betselehemu, mu lusomo lwa Yuda,
shiuli litaala litititi khu mataala makali mu lusomo lwa Yuda tawe;
shichila mwimilili aliitsa khunyolekha mu yivi
uliitsa khwimilila vandu vaanje, Israeli.’ ”
7Nalwo lwa Herode yalaanga halala muvwivisi vandu vu vusitsa vali nivaruli ivukwi, khandi narunishitsa khuvo tsisaa tsia inyining'ini yali niloleshe. 8Yavaruma mu litaala lia Betselehemu navoola, “Simushi mutsi khurunishitsa vulahi vwene makhuva khulondokhana khu mwana mwenoyo. Numumali khumunyola, munderele likhuva nikanyalikha khali inzi nziyo khusaala khuye.”
9Lwa vahulila makhuva ku Mwami Herode yali navavoolele, vasimukha nivatsia; khandi inyining'ini ya vali nivaloli ivukwi yavimilila nitsia nisinjila havundu ha mwana yali nali. 10Lwa valola inyining'ini yeneyo, vali nu vuyaanzi vunyishi muno. 11Vinjila munzu, khandi lwa valola mwana na mama wewe Mariya, vinama hasi nivasaala khuye. Valera vihanwa viavo vi itsahabu, vubani, nende manemane, nivaha Yesu. 12Khulwa yako, vakalukha mu shivala shiavo khuvirila khu muhaanda kundi; shichila Nyasaye yavachelihitsa khuvirila mu malooro vavuli khukalukha khu Herode.
Khwilushila mu Shivala shia Misri
13Lwa vali nivakharulaho, injelosi yu Mwami Nyasaye yalolekha khu Yosefu khuvirila mu malooro, nivoola, “Vukha uvukule mwana nende mama wewe mwilushi mutsi Misri, khandi mwikhaleyo khutukha lwa niitsa khumuvoolela muruliyo, shichila Herode akhavanga khwiira mwana.”
14Yosefu yavukha mu vutukhu, navukula mwana halala na mama wewe, nivatsia Misri, 15vamenyayo khutukha lwa Herode yakhutsa. Yaka kikholekha khurweshitsa makhuva ku Mwami Nyasaye yali niyavoola khuvirila mu muprofeti,
“Ninzi walaanga Mwana wanje khurula Misri.”
Vaana Viirwa
16Lwa Herode yamanya ndi vandu vu vusitsa vali nivaruli ivukwi vamukaati, yali nu vurima. Yahaana lilako liu khwiira ndi vaana voosi vi shiyayi mu litaala lia Betselehemu, nende mu lusomo lwenelo lwosi, vi mihika chivili khukalukha hasi hi mihika chivili. Yaka kikholekha khulondokhana khu ka yali niyechi khurula khu vandu vu vusitsa, tsisaa tsia inyining'ini yali niloleshe.
17Makhuva ku Muprofeti Yeremia yali niyavoola karweshitswa munjila yiyi:
18“Mwoyo kwahulilikhana Raama,
khulila nu khwikhula vululu,
Raheli alilanga vaana veve:
Wambakhane khuleminywa mwoyo shichila vaana veve vakhutsa.”
Khukalukha Khurula Misri
19Navutswa lwa Herode yali niyakhutsa, injelosi yu Mwami Nyasaye yalolekha khu Yosefu mu malooro nali Misri 20nivoola, “Vukha, vukula mwana nende mama wewe mukalushi mu shivala shia Israeli, shichila vandu venyanga khwiira mwana vamala khukhutsa khale.” 21Khulwa yako, Yosefu yavukha navukula Mariya nende mwana wewe, nivakalukha mu shivala shia Israeli.
22Navutswa lwa Yosefu yahulila likhuva ndi Akileosi wamihitswi khuva mwami wu lusomo lwa Yudeya, havukono ha Herode tata wewe, yaria khukalukhayo. Lwa yali namali khuchelihitswa khuvirila mu malooro, yilushila mu lusomo lwa Galilaya. 23Yasimukha natsia khumenya mu litaala lialaangwangwa Nazareti; khu ka vaprofeti vali nivavoola karweshitswi: “Aliitsa khulaangwa Munazare.”
Currently Selected:
MATAYO 2: LLLPRO
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013