1 Timoteo 3
3
Mayor wawqikuna imanö kayänanpä ninqan
1 Mayor wawqi kayta munaqkunaqa allitam yarpaykäyan. Kay ninqäqa rasun kaqmi. 2Mayor wawqikunam kayanman pipitapis mana despreciashqa, juk warmiyuqlla, shumaq tantiyakuq, shumaq yarpachakuskir imatapis ruraq, pïmaypitapis respitashqa, patsatsikuq y shumaq yachatsikuq. 3Tsaynöllam kayanman mana upyaq, pitapis mana wajupaq, kuyapäkuq, qellayllapä mana mallaqashqa 4y warmintawan tsurinkunatapis shumaq wätaq. Tsaynöllam tsurinkunatapis cäsukuq y respitakuq kayänanpä yachatsinman. 5Wayinchö täraqkunata shumaq mana yachatsirqa ¿imanöparä Tayta Diosman criyikuqkunata yachatsinman?
6Jesucristuman tsayrä criyikuqkunaqa manam mayor wawqi kayanmantsu. Yachaq tukurqa diablu castigashqa kanqannömi paykunapis castigashqa kayanqa.
7Jesucristuman mana criyikuq runakunapis rikayänanpä mayor wawqikuna alli kawayätsun. Alli kawayaptinqa paykunapa contran manam pipis parlanqatsu y diablupis trampaman manam ishkitsinqatsu.#Tito 1.6-9.
Diäcunukuna imanö kayänanpä kanqan
8Tsaynöllam diäcunukuna kayanman respitashqa, imatapis awninqanta cumpliq, mana upyaq y qellayyuq kayta munar mana engañakuq. 9Jesucristupa willakuyninta yachakuyanqannöllam jutsata mana rurar kawayanman. 10Diäcunu kananpä manarä churar imanö kawayanqantapis shumaqrämi musyayanman. Alli kawayanqanta musyaykurrämi diäcunu kayänanpä churayanman.
11Tsaynöllam diäcunupa warminpis#3.11 O diacunïsapis. kanman respitashqa, pitapis mana tumpaq, shumaq tantiyakuq y awninqanta imaypis cumpliq.
12Diäcunukunaqa juk warmiyuqllam kayanman. Warminta y tsurinkunatam shumaq wätayanman.
13Diäcunu kayninta shumaq cumplirqa pïmaypitapis alli rikashqam kayanqa. Jesucristuman criyiyanqantam mana mantsaypa willakuyanqa.
Pablo imapä cartakunqanpis
14Timoteo, shamuyta yarparpis puntataqa cartakaykämullarämi. 15Mana ras shamuptïpis kay cartata liyirnam wawqikunata y panikunata imanö rikanaykipäpis tantiyanki. Noqantsikqa imayyaqpis kawaq Tayta Diospa iglesian karmi willakuyninta willakuntsik y mana alli yachatsikuqkunata corrigintsik.
16Tayta Dios musyatsimanqantsik willakuyninqa shumaqmi. Tsay willakuyninmi nin:
Jesucristuqa#3.16 Wakin qepa kaq griego copiakunachömi Diosqa nin. runanöllam yurirqan.
Wanunqanpitam Espíritu Santu kawatsimurqan.
Angelkunam payta rikayarqan.
Mana Israel runakunatam willakuyninta willakuqkuna willayarqan.
Maytsaychöpis paymanmi criyikuyan.
Gloriaman kutiskirnam Tayta Diospa lädunchöna kaykan.
Currently Selected:
1 Timoteo 3: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.