1 Timoteo 4
4
Llutan yachatsikuqkuna yuriyämunanpä ninqan
1Espíritu Santum tantiyatsimantsik shamuq watakunachö wakin runakuna Jesucristuman criyikuyanqanta dëjaskir supaykuna munayanqannö llutanta yachatsiyänanpä kanqanta. 2Yachaq tukuq karmi llutankunata llullakurnin yachatsirpis ni penqakuyanqatsu.
3Tsay llutan yachatsikuqkunam warmiyuq kay mana alli kanqanta niyanqa. Tsaynöllam wakin mikuykunata mana mikunantsikpä kanqanta niyanqa. Mana alli kanqanta niyaptinpis Jesucristuman yärakuqkuna agradëcikur mikuyänanpämi Tayta Dios kamarqan. 4Tayta Dios kamanqankunaqa llapanpis allim.#Gén. 1.31. Warmiyuq kaypis Tayta Diospitam. Tsaynö kaykaptinqa payta agradëcikurnin mikuytapis y warmiyuq kaytapis penqakuyman ama churashuntsu. 5Tayta Diospa palabranta tantiyakur y payta mañakur agradëcikushqaqa mikuypis#Gén. 9.3; Mar. 7.18-20. y warmiyuq kaypis#Gén. 2.18. allim.
Jesucristupa alli sirviqnin kananpä yachatsinqan
6Kay cartachö qellqanqäkunata wawqikunata y panikunata shumaq yachatsirqa Jesucristupa alli sirviqninmi kanki. Tayta Diospa willakuyninta yachakurqa y pay munanqannö kawarqa alli alimentakushqanömi kanki.
7Llutanta yachatsiyanqankunata ama chaskiytsu. Pukllaqkuna fïsicata rurayanqannö qampis Tayta Dios munanqannö kawanaykipä yachakuy. 8Física rurayqa kay patsachö kawanqantsikyaqllam alli. Tayta Dios munanqannö kawaymi sïqa kay patsachö y gloriachöpis alli kawanantsikpä.
9Kay ninqäqa rasun kaqmi. Llapan runakuna chaskikuyänanpäpis allim. 10Tsayta tantiyarmi imayyaqpis kawaq Tayta Diosman criyir imanö ñakarpis willakuyninta willakuykantsik. Paymi Jesucristuman criyikuq kaqtaqa pïmaytapis salvan.
11Kay cartachö qellqamunqäkunata cäsukuyänanpä yachatsiy. 12<<Jövinllarä kaykar ¿imanöpatä Timoteo yachatsimäshun?>> niyaptinpis ama cäsuytsu. Tsaypa rantinqa wawqikuna y panikuna rikayänanpä alli shimillaykipa pïmaytapis parlapay, jutsata mana rurarnin kaway, runa mayikita kuyapay, Tayta Diosman imaypis yärakuy y pay munanqannö kaway.
13Chämunqäyaq Tayta Diospa palabranta wawqikunata y panikunata liyipanki, yachatsinki y parlapanki.
14Jesucristuta sirvinaykipä Espíritu Santu churaykäshuptikiqa llapan shonquykiwan imaypis sirviy. Tsaynö churashurquyki profëtakuna qampä willakuyaptin y mayor wawqikuna umaykiman makinta churaykur Tayta Diosta mañakuyaptinmi.
15Kay yätsinqäkunata mana qonqaypa imaypis ruray. Alli kawanqaykita rikayäshurnikim tantiyayanqa Tayta Dios munanqannö kawanqaykita. 16Cuidädutä jutsata rurankiman. Tsaynölla cuidädutä llutankunata yachatsinkiman. Rasun kaqllata yachatsir Tayta Dios munanqannölla imaypis kaway. Tsaynö kawarmi kikikipis salvakunki y yachatsinqaykita wiyaqkunapis salvakuyanqa.
Currently Selected:
1 Timoteo 4: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.