1 Juan 3
3
Tayta Diospa wamrankuna kanqantsik
1¡Tantiyakuyay! ¡Tayta Diosqa pasaypam kuyamantsik! Kuyamarnintsikmi <<wamräkunam kayanki>> nimantsik.#Juan 1.12. Rasunpam wamrankuna kaykantsik. Wamran kanqantsiktaqa mana criyikuq runakuna manam tantiyayantsu. Tayta Diosta mana reqirmi tsaynö tantiyayantsu.
2Kuyay wawqikuna y panikuna, Tayta Diospa wamran kanqantsikta kanan musyarpis manam musyantsikrätsu imanö kanantsikpä kanqantapis. Tsaynö kaptinpis musyantsikmi Jesucristo kutimuptin paywan tinkur kikin niraqman tikranantsikpä kanqanta.#Fil. 3.21. 3Tsaynö kanantsikpä kanqanta shuyaykarqa Jesucristo jutsaynaq püru kanqannö noqantsikpis jutsaynaq püru kashun.
4Pipis jutsata rurarqa Tayta Diospa leyninkunata manam cäsuntsu. 5Musyantsikmi jutsaynaq kanantsikpä Jesucristo kay patsaman shamunqanta. Payqa manam imaypis jutsata rurashqatsu. 6Tsaymi Jesucristupa poderninchö kawaqkunaqa jutsa rurayta dëjayan. Jutsa rurayta mana jaqiqkunaqa manam Jesucristuta chaskiyantsu ni reqiyantsu.
7Kuyay wamräkuna, pipis <<Tayta Diostam cäsü>> nirqa Jesucristunömi allikunata rurar kawanman. <<Cäsümi>> nikar jutsata ruraptinqa yachatsiyäshunqaykita ama chaskiyaytsu. 8Jutsa rurayta mana jaqiq kaqmi diablupa poderninchö kaykan. Diabluqa kay patsa qallanqanpitam jutsata ruran. Diablu ruranqankunata ushakätsinanpämi Tayta Diospa Tsurin Jesucristo shamushqa.#Heb. 2.14-15.
9Tayta Diospa wamran kaqkunaqa manam jutsata rurayannatsu, sinöqa Tayta Dios munanqannönam kawayan. Tayta Diospa wamran karmi jutsa rurayta dëjayan. 10Pipis jutsata rurar y runa mayinta chikirqa manam Diospa wamrantsu, sinöqa diablupa wamranmi. Tsaynöpam musyantsik Diospa wamran pï kanqanta y diablupa wamran pï kanqantapis.
Pïmaywanpis kuyanakunantsikpä ninqan
11Juknintsik juknintsikpis kuyanakunantsikpä kanqantaqa unaypitanam musyantsik.#Juan 13.34; 15.12. 12Ama kashuntsu Caínnöqa. Payqa diablu munanqanta rurarmi wawqin Abelta wanutsirqan.#Gén. 4.8. ¿Imanirtä wanutsirqan? Kikinpa rurayninkuna mana alli kaptin y wawqinpa rurayninkuna alli kaptinmi wanutsirqan.
13Kuyay wawqikuna y panikuna, musyantsikmi jutsa ruraq runakuna chikimanqantsikta. 14Tsaynöllam musyantsik wanushqanö kanqantsikpita mana ushakaq kawaytana tarinqantsikta. Wawqikunawan y panikunawan kuyanakur kawarmi tsayta musyantsik.#Juan 5.24. Mana kuyakuq kaqmi wanushqanö kaykan. 15Llapanpis runa mayinta chikiqkunaqa wanutsiqnömi kaykäyan. Musyanqantsiknöpis wanutsikuqkunaqa manam Tayta Diospa puntanman chäyanqatsu.
16Kuyakuq kanantsikpä Jesucristo noqantsik raykur wanunqanta tantiyakushun.#Juan 15.13. Noqantsikpis kuyakuq karqa runa mayintsik raykur wanunantsikpä listum kaykäshun. 17Imantsikpis kaykaptin runa mayintsik mallaqaychö kaykaqta mana yanaparqa manam Tayta Dios kuyakuq kanqannötsu kuyakuq kantsik.
18Kuyay wamräkuna, janan shonqullaqa ama kuyanakushuntsu, sinöqa imaypis yanapanakur rasunpa kuyanakushun. 19Tsaynö kuyanakurmi musyantsik Tayta Diospa willakuyninta rasunpa chaskikunqantsikta y jutsantsikpita perdonamanqantsikta. 20Mana perdonamanqantsikta yarpashqapis payqa jutsantsikpita llakikunqantsikta musyarmi perdonamantsik.
21Kuyay wawqikuna y panikuna, perdonashqana kanqantsikta musyaykarqa mana mantsariypa Tayta Diosta mañakushun. 22Mandamientunkunata cäsur pay munanqannö kawarqa imata mañakunqantsiktapis chaskishunmi.
23Tayta Diospa mandamientunmi nin Tsurin Jesucristuman yärakunantsikpä y juknin jukninwanpis kuyanakunantsikpä.#Juan 13.34; 15.12, 17. 24Mandamientunkunata cumplirmi paywan kaykantsik y paypis noqantsikwan kaykan. Noqantsikwan pay kaykanqanta musyantsik mandamunqan Espíritu Santuta chaskishqa karmi.
Currently Selected:
1 Juan 3: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.