1 Juan 2
2
1Kuyay wamräkuna, jutsata mana rurayänaykipämi kay cartata cartakamü.#Rom. 6.11-14. Jutsata rurashqaqa Tayta Diospa puntanchö janantsik shärinanpämi abogäduntsik kaykan. Tsay abogäduqa alli ruraq Jesucristum. 2Paymi sacrificiu kashqa jutsantsikkunata Tayta Dios perdonamänantsikpä.#1Juan 4.10. Manam noqallantsik perdonashqa kanantsikpätsu wanurqan, sinöqa maytsaychö täraq runakuna perdonashqa kayänanpämi.
3Tayta Diosta reqinqantsiktam mandamientunkunata cumplir musyantsik.#Juan 14.15, 21, 23. 4Mayqantsikpis <<Tayta Diosta reqïmi>> nikar mandamientunkunata mana cäsurqa manam rasun kaqtatsu parlantsik, sinöqa llullakuykantsikmi. 5Mandamientunkunata cumplirmi sïqa Tayta Diosta rasunpa kuyantsik. Tsaynöpam musyantsik Tayta Diospa poderninchö kanqantsikta. 6Pipis <<Tayta Diospa poderninchömi kä>> nirqa Jesucristo kawanqannö kawatsun.
Mushuq mandamientu
7Kuyay wamräkuna, jukniki juknikipis kuyanakuyanki. Kay mandamientu manam mushuq mandamientutsu, sinöqa unaypita musyanqantsik mandamientum. Tsay mandamientutaqa musyayankinam. 8Mushuq mana kaptinpis kananmi musyayanki Jesucristo kuyamanqantsiknö kuyanakuyänaykipä kanqanta. Tsaymi tsay mandamientu mushuq kaykan. Jesucristo kuyakuq kanqannömi qamkunapis kuyanakuykäyanki. Tsaynö kuyanakurmi tsakaypita aktsiman yarquqnö kaykäyanki.
9Pï runapis <<aktsichömi kaykä>> nikar runa mayinta chikirqa tsakäpakushqanömi kaykan. 10Runa mayinta kuyarmi sïqa aktsichö kaykaqnö kaykan.#Rom. 13.12-13. Tsaynö kawaptinqa pïmaypis payta rikarmi alli kawayanqa. 11Runa mayinta chikiq kaqmi tsakäpakushqanö kaykan. Qapra runa maypa aywanqantapis mana tantiyanqannömi Tayta Dios munanqannö kawananpäpis tantiyantsu.
Imanir Juan cartakunqan
12Kuyay wamrakuna, qamkunapämi cartakaykämü Jesucristo noqantsik raykur wanunqanpita perdonashqa kayaptiki.
13Papäkuna, qamkunapämi cartakaykämü qallananpita kawaq Jesucristuta reqishqa kayaptiki.
Jövinkuna, qamkunapämi cartakaykämü Satanásta vincishqa kayaptiki.
14Kuyay wamrakuna, qamkunapämi cartakaykämü Tayta Diosta reqishqa kayaptiki.
Papäkuna, qamkunapämi cartakaykämü qallananpita kawaq Jesucristuta reqishqa kayaptiki.
Jövinkuna, qamkunapämi cartakaykämü kallpayuq kayanqaykipita y Diospa willakuyninta cäsurnin Satanásta vincishqa kayaptiki.
Diosta mana cäsuq runakuna kawayanqannö mana kawanantsikpä ninqan
15Diosta mana cäsuq runakunanöqa ama kawayaytsu. Paykunanö kawarqa Tayta Diosta manam kuyayankitsu. 16Diosta mana cäsuq runakunaqa shonqun munanqannömi llutanta rurayan, imatapis rikanqantam munayan y llapanpitapis mas alli rikashqa kaytam munayan. Paykunanö kawarqa manam Tayta Dios munanqannötsu kawayanki, sinöqa jutsasapa runakunanömi. 17Kay patsapis y runakuna munayanqanpis ushakanqam. Peru Tayta Dios munanqannö kawaq runakunam sïqa mana ushakaq kawayta tariyanqa.
Anticristukuna yuriyämunanpä ninqan
18Kuyay wamräkuna, ultimu tiempuchönam kaykantsik. Anticristo shamunanpä kanqanta musyayanqaykinömi kananqa atska anticristukuna shayämushqa. Tsaynöpam musyantsik ultimu tiempuchöna kaykanqantsikta. 19Tsay runakunaqa ñöpata noqantsikwan qorikashqa karpis kananqa manam qorikäyämunnatsu. Paykunaqa manam Jesucristuta rasunpatsu chaskikuyashqa. Jesucristuta rasunpa chaskikushqa karqa noqantsikwanmi qorikäyanman. Noqantsikpita yarqushqa kayaptinmi Jesucristuta mana chaskikuyanqanta musyantsik.
20Qamkunamanqa Jesucristum Espíritu Santuta mandamushqa. Tsaymi tantiyayanki mayqan yachatsikuykuna alli kanqanta y mayqan mana alli kanqantapis.#1Cor. 2.10-16. 21Tsaynömi tantiyayanki llullakuqkuna Tayta Diospa willakuyninta willakuyänanpa rantin llutanta yachaykätsiyanqanta. Rasun kaq yachatsikuyta tantiyayanqaykita musyarmi cartakamü.
22Tsay llullakuqkunam niyan: <<Jesúsqa manam Tayta Dios mandamunqan Cristutsu>>. Tsaynö yachatsiqkunaqa anticristum kaykäyan. Paykunaqa Tayta Diostapis Jesucristutapis ñëgayanmi. 23Jesucristo Tayta Diospa Tsurin kanqanta pipis ñëgarqa Tayta Diostam ñëgan. <<Jesucristuqa Diospa Tsurinmi>> nirqa Tayta Diostam chaskin.
24Tsaynö kaykaptinqa Jesucristupa willakuyninta yachakuyanqaykita ama qonqäyaytsu. Mana qonqarqa Tayta Diospa y Tsurin Jesucristupa poderninchömi kawaykäyanki. 25Paymi awnimarquntsik gloriachö imayyaqpis kawanantsikpä.
26Kay cartatam cartakamü llutan yachatsikuqkunata mana chaskiyänaykipä. 27Jesucristupita chaskiyanqayki Espíritu Santum qamkunawan kaykan. Paymi rasun kaqllata llapantapis yachatsiyäshunki. Manam imaypis llullapäyäshunkitsu. Tsaynö kaykaptinqa llutan yachatsikuykunata ama chaskiyaytsu. Espíritu Santu tantiyatsiyäshunqaykinölla Jesucristuman yärakur imaypis kawayay.
28Kuyay wamräkuna, Jesucristupa poderninchö imaypis kawayay. Tsaynö kawarmi Jesucristo kutimuptin mana mantsaypa y mana penqakuypa puntanchö kayanki.
29Musyantsikmi Jesucristo imaypis alli ruraq kanqanta. Tsaymi pipis allita rurarqa Tayta Diospa wamran kaykan.
Currently Selected:
1 Juan 2: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.