O LUKAS 12
12
O hohininga o nyawa yo elu-elukika
(Mat. 10:26-27)
1 #
Mat. 16:6; Mark. 8:15 O nyawa dema ribu-ribuhu imakehoto hiädono naga ima kodoko manga l̄ou. O nyawa manga ngöe gënanga magogiriaka imatoomu, o Yesus wätemo iwinöninïkika, ”Nimahi dodiai mangale o Farisi manyawa manga ragi, Ahi dungutu, toönanga manga tengeluku. 2#Mark. 4:22; Luk. 8:17 Koiwa naga iiu-iunu aha koimäkeua, deʼ koiwa i rorahasia de aha koi kiliangua. 3O hutu-hutu ngini niahetongo, aha yoihene o wange-wange; deʼ ngini nihihudu o nyawa manga ngaukika o kamari i beno-benoino magoronaka, aha ihi ngahu-ngahu kiaika honanga.”
Niwï modongo ma Jou
(Mat. 10:28-31)
4”Nio hohininga, Ahi dodiawo! Uha niämodongo onangika yatöma-töma niaröehe mä yakunua yodiai iholoi de gënanga. 5Kayaoa de Ngohi tinihi dumutu nginika o naguna kokiani ngini niwïmodongo. Niwï modongo ma Jou Madutuika! Hababu winï toma iböto, Unanga wokuahaö winïumo o narakaika! Ningaku, Unanga kokiani ngini niwï modongo.
6Gahumu motoa o totoai yahukunu o rupia ratuhu hinoto. Ngarokö hokogënanga kamoiö de ma Jou Madutu wawohangua. 7Nia tadauru niahäekokaö mangai yogetongoka mata-mata, hababu gënanga uha nihawana; ngini nia ija iholoi i kurutil̄e de o totoai!”
Hihi goungu o Kristus o kawaha manga himangoka
(Mat. 10:32-33, 12:32, 10:19-20)
8”Nio hininga nihidodiai: O nyawa imahi nyata o kawaha manga himangoka igoungu önanga ihinöninïki, o Nyawa manga Ngohakö aha wahigoungu ma Jou Madutu aimalaekat-malaekat manga himangoka. 9Mä o nyawa imahi pongono o kawaha manga himangoka önanga ihinöninïki, o Nyawa manga Ngohakö aha wahi pongono ma Jou Madutu aimalaekat-malaekat manga himangoka.
10 #
Mat. 12:32; Mark. 3:29 Nako o nyawa okia naga moi yotemo iwilawani o Nyawa manga Ngohaka, ünanga yakunu iwihiapongo; mä nako ünanga wohi kauku ma Jou Madutu ai Womaha, ünanga yakunua iwihi apongo.
11 #
Mat. 10:19-20; Mark. 13:11; Luk. 21:14-15 Nako ngini inïao o pupuji matauika la yalingiri niahowono ekola niadiai o popareta ekola yokokuaha manga himangoka, uha nihawatere mangale aha sarakia niadiri nioriwo ekola mangale okia kokiani ngini nitemo. 12Hababu okia kokiani ngini nitemo gënanga ma orahoka aha ma Jou Madutu ai Womaha inïdotoko nginika.”
O hitotero o kaya manyawa wobodo-bodo
13Yowöe-wöe manga hidogoronaka womatëngo wïtemo o Yesusika, ”Bapa Guru, nohitaili Bapa nïhuloko ahidodoto wohihidöaka ngohino o arata o hidoku moi mia ama wamal̄a-mal̄aika.”
14O Yesus wohaluhu, ”Riadodoto, o nagona ihigoraka Ngohi todadi o hakimi ekola tohikokodoku inihinoto niapuhaka?” 15Ipaha genangokadau manyawa mata-mata o Yesus wätemo, ”Nimahi dodiai deʼ nimägöana, uha hiädono ngini nikal̄il̄u. Hababu o nyawa manga wowango imahigagaoua de aikaya, ngarokö aiarata duruë iwöe.”
16Daha o Yesus woade-ade o hitotero nënanga, ”Naga womatëngo wokaya. Unanga de aitonakoka, de mahasili iwöe. 17O nyawa kaya gënanga muläenge womapikiri aihiningaka, ’Tato tagogono ahi tonaka mahasili koiwakali o ngï. Okia tohi akali o öraha nënanga?ʼ 18Ipaha ünanga wapikiroli deʼ watemo aidirika mahirete, ’Aa, ngohi naga ahiakali; ahigudanga aha tähuloko yakilianga daha tohigoko iholoi ilamoko. La genangoka aha tagogono mata-mata ahi gandum de ahibara-baranga mahomoa.’ 19Ipaha aha tatemo ahi dirika mahirete, ’Ngona noutumu! Hagala maoa-oa ngona naparetaka, deʼ aha koimataua de matao-taongo. Nomahibatongo o öraha nënanga! Nokere de nol̄omo deʼ nomahi sosanangi!ʼ 20Mä ma Jou Madutu wïtemo unangika, ’Hei bodo! O hutu nënanga dika ngona aha nohonenge, daha o nagona aha yapuhaka anikaya mata-mata ngona natotoomuoka mangale anidiri gënanga?ʼ
21Hoko gënanga imadadi de o nyawa moi-nyawa moi kiaka ima hi dailako yodadi kaya mangale manga diri mahirete, mä imahidailakoua yodadi kaya ma Jou Madutu ailakoka.”
Niwingaku ma Jou Madutuika
(Mat. 6:25-34)
22O Yesus wätemo iwinöninïkika, ”Gënanga mahababu Ngohi totemo, ’Uha nihawatere mangale niangango, enagënanga okiaaha ngini niaol̄omo, ekola okia aha ngininiapäke.’ 23O ngango ganga iholoi de o inomo, deʼ o röehe iholoi de o pakeanga. 24Nia tailako o totaleo o wogono! Enanga idatomua, iutukua, magudanga ekola mainomo matauö makoiwa. Mä ma Jou Madutu wapaliara ënanga! Ngini iholoi ikurutil̄e niaragane de o totaleo! 25O nagona ngini niahidogoronaka de aihawatere yakunu wakurutu aiumuru ngaroka mahuhutulu? 26Nako o hali maiteteke gënanga dika niakunokaua niadiai, yadodoa honihawatere mangale o hali mahomoa? 27#1Kok. 10:4-7; 2Taw. 9:3-6 Niatailako sarakia o bunga iwango; o bunga-bunga gënanga imanaramua, o baju iuriti makowali. Mä ma Koano Salomo hokogënanga aikaya mawapäkeua o pakeanga ma hailoa hokä o bunga gënanga! 28O momo o gol̄owaka iwango o wange nënanga deʼ yarehino yatuhuku imatäka. Mä ma Jou Madutu hoko gënanga mahailoa wapäke wohidodiai o momo gënanga. Okiali ngini! Mä ngini kuranga ningaku! 29Hoʼ uha nihawatere deʼ nibingu mangale okia aha ngini niaol̄omo de niaokere. 30O hali hoko gënanga o nyawa iwinäko-näkoua ma Jou Madutu yaninïki yalingiri. Enahioko nia Ama wanäko mata-mata gënanga ngini niparalu. 31Mä ngini kokiani nimahi dailako hupaya ma Jou Madutu wapareta niangango, done mahomoahi gënanga aha ma Jou Madutu winihidöakoli nginika.”
O arata o horogaka
(Mat. 6:19-21)
32”Ngini duga-duga o doomu maiteteke, uha nihawana! Hababu nia Ama wosanangi wohidöaka nginika o barakati ai Poparetaino. 33Niahukunu niaarata deʼ niahidöaka matiwi o nyawa mihikinïka. Nimä diai mangale niadiri o tiwi mapopoje ibäbabitua, enagënanga o arata igögogono o horogaka. O arata gënanga yakunua ihihanga, karana yotohi-tohiki yakunua yal̄ë deʼ o buteteke yakunua yabodito. 34Hababu kiaka niaarata genangokaö niahininga!”
Yolö leleani imägö göa-göana
35 #
Mat. 25:1-13
”Nimä göa-göana nio himanga o hali moi-moi. Ngini kokiani kahoko genangika nimägöana nimapakeanguku deʼ niahilo kai wango-wango, 36#Mark. 13:34-36 imatero hokä yolöleleani mangagogiria yogöana iwi damä manga tuanga womakilioro o kawingi marameangino. Nako matuanga gënanga woma kilioro deʼ o ngorana wotolo, önanga aha de majapati o ngorana yahelenga. 37Hokokia manga utumu yolöleleani maöraha matuanga woböa de wämäkeino magogiria yotamä. Ningaku: o tuanga gënanga aha womahidiai deʼ wähuloko iwilöleleani gënanga yogogeruku, daha Unanga wäleleani önanga. 38Hokokia manga utumu yolöleleani gënanga nako to ona manga tuanga gënanga wämäkeino önanga manga gogiria ima sadia iwi damä, ngarokö Unanga woböa o hutu gorona ekola iholoi itedekana de gënanga! 39#Mat. 24:43-44 Nio hohininga nënanga! Hohiade o tau madutu wohiöriki o takoro muruono yotohi-tohiki aha yoböa, ünanga aha womägöana hupaya yotohi-tohiki yakunua yowohama aitau magoronaika. 40Hababu gënanga nginiö kokiani nimä göa-göana, karana o Nyawa manga Ngohaka aha woböa maöraha ngini nia näko-näkoua.”
Wolöleleani wososetia deʼ wolöleleani wososetiaua
(Mat. 24:45-51)
41”Jou, boteka o dodötoko gënanga Jou nohidungutu ngomino ekola o nyawa mata-mataika?” o Petrus woleha.
42Ma Jou wohaluhu, ”O nagona yolöleleani yosetia deʼ yosawaro hiädono aituanga wïgoraka wodadi yolöleleani mahomoa manga häeke hupaya ünanga wahidöaka önanga o inomo maorahoka? 43Hokokia aiutumu wolöleleani gënanga nako maorahoka ai tuanga womakilioro de wïmäkeino aigogiria wadiai aimanarama! 44Ningaku: O tuanga gënanga aha wihigogöana hagala aiarata wolöleleanika gënanga. 45Mä nako wolöleleani gënanga wotemo aihiningaka, ’Ahi tuanga madekanohi dahaö womakilioro,’ de ünanga wägohara yolöleleani mata-mata deʼ wol̄omo de wokere hiädono iwidaluku, 46done aituanga aha womakilioro mawange deʼ maöraha wanäko-näkoua. Deʼ wolöleleani gënanga aituanga wïduhu wohupu wïdiai imake tero manga hangihara de o nyawa yototomotekua ma Jou Madutuika.
47Wolöleleani wanäko aituanga ai mau, mä womä göa-göanua deʼ wadiaiua aituanga aimau gënanga, aha iwigohara kahakuata. 48Mä wolöleleani wanäkoua aituanga aimau, ipaha wadiaiokia naga moi ihowono hiädono kokiani iwigohara aha iwigohara mahuhutulu dika. Hababu o nyawa yahidöakoka iwöe, onangino aha yögahoko iwöe. Deʼ o nyawa yahigogöanoka iwöe, onangino aha yägahoko iwöeoli.”
O dameua mä o galawani
(Mat. 10:34-36)
49”Ngohi toböa la tapuda o nguku o duniaka nënanga. Duru yaoa nako mauku itokaroka! 50#Mark. 10:38 Kanagahi o huha de o hangihara ma ago-agomo kokiani Ngohi tatoku-toku. Deʼ Ahi hininga duru ihuha ihira de gënanga imadadi. 51Boteka ngini niatobote Ngohi toböa mangale toao o dame o duniaino? Kowali, o dameua duga-duga o galawani. 52Muläenge örahanënanga, o tau moi madol̄a yamotoaka aha ima teke ributu, ya ruange yälawani yahinoto ekola yahinoto yälawani yaruange. 53#Mi. 7:6 O ama aha wïlawani aingohaka o nauru, deʼ o ngohaka o nauru aha wïlawani ai ama. O ayo momi lawani ngomi ora deʼ o ngohaka o ngoheka momi lawani ngomi ayo. Madunungu o ngoheka aha momilawani ngomi mol̄oka, deʼ mamol̄oka aha momi lawani ngomi hunungu.”
Yanäko o öraha manonako
(Mat. 16:2-3)
54O Yesus wätemoli o nyawa yowöe-wöeika, ”Nako ngini niamäke o lobi idöa o wange madumuniha, gila-gila ngini nitemo, ’Aha o awana.’ Deʼ igou-goungu o awana. 55Nako ngini niamäo o hidal̄oko iböa o koreharauku, ngini niato, ’Aha ihiwara.’ Deʼ igou-goungu ihiwara. 56Ngini o nyawa nioigo nimadodiai! De niolega o dihanga deʼ o dunia madodagi o gitawa aha idadi ngini niakunu nihingahu. Yadodoa ho o örahanënanga manonako ngini niakunua nihingahu okia aha idadi?”
Nimaka dame de niahaturü
(Mat. 5:25-26)
57”Yadodoa hongini niaakunua niaputuhu okianaga madiai? 58Nako naga o nyawa inïkalaki ngini o hakimika, nihidailako niagou-goungu la niatiai niaparakara gënanga dede una, kiaka ngini kao ngëkomo mahoanikahi. Nako kowali, done ünanga winïtauru ngini o hakimi manga himangoka, deʼ o hakimi gënanga aha winihilapahi ngini o polisika, deʼ o polisi winihi ngohama ngini o bui magoronaika. 59Ningaku! Ngini aha nihupua o buioka nako niabobangu niamatauahi nifangu.”
Currently Selected:
O LUKAS 12: TLB
Highlight
Share
Copy
Want to have your highlights saved across all your devices? Sign up or sign in