O LUKAS 11
11
O Yesus wädotoko o hubayanga
(Mat. 6:9-13, 7:7-11)
1O wange moiuku o ngï moioka o Yesus womäniata. I böto womäniata womatëngo iwinöninïki manga dodiawo wotemo, ”Jou, abeika nomïdotoko ngomi mimäniata hokä o Yohanis wä dotoko iwinöninïki imä niata.”
2De o Yesus wätemo onangika, ”Nako ngini nimäniata, ni temo hoko nënanga,
’Ama,
Ngona ma Jou Madutu noma Tëngo-tëngoka.
Tanu Ngona inihuba deʼ inihoromati.
3Nomihidöaka o wange higetongo
o inomo ngomi mipoparalu.
4Nohi apongo mia baradoha,
hababu ngomiö mia hiapongo o nyawa yahowo-howonoka ngomino.
Deʼ uha nohigumal̄a ngomi i hihanga miangongaku maöraha ngomi imïtaili.’ ”
5O Yesus wätemo iwinöninïkika, ”Hohi ade ngini niahidogoronaka womatëngo woiki aidodiawo aitauika o hutu goronaika, deʼ wotemo, ’Hobata, nohihi bauohi aniroti o gahumu hange, 6hababu ahidodiawo aidodagi magoronaka, nënanga dahaö wotulu ahitauino deʼ ngohi ahi inomo koiwa tihidöaka unangika!ʼ 7Hohi ade anidodiawo naika-ika unangika gënanga aitau magoronaka de wohaluhu hokonënanga, ’Uha nohidiai o huha! O ngorana ikusioka deʼ ngohi de ahi ngoha-ngohaka mimaiduoka. Ngohi takunua tomomiki deʼ tonihidöaka okianaga ngonaika.’ ”
8”Daha sarakia?” o Yesus wotemoli. ”Ngohi tato, igoungu hoko gënanga! Ngarokö ngona ganga aidodiawo, ünanga aha woluku womomiki deʼ wonihidöaka okia nagamoi ngonaika. Mä ima teke korona karana ngona inimal̄ekua nogahoko unangika nogogilio, hoʼ unanga aha kawomomiki deʼ wonihidöaka ngonaika okia ngona nopöparalu. 9Hoʼ, Ngohi tinïtemo nginika: Nigahoko, ngini aha inihi döaka; nialingiri, ngini aha niamäke; nitolo, o ngorana aha inidobelenga nginika. 10Karana o nyawa yogaho-gahoko aha yatarima; o nyawa yalingi-lingiri aha yamäke, deʼ o nyawa yotolo-tolo aha yadobelenga o ngorana. 11Ngini niahidogoronaka naga o ama wohidöaka o dodiha aingohakika nako wogahoko o nawoko? 12Ekola wohidöaka o kokakatama, nako wogahoko o gohi? 13Ngarokö ngini itorou, ngini kanihiöriki niahidöaka maoa-oa nia ngohakika. Okiali o Ama o horogaka! Unanga aha wahidöaka ai Womaha onangika yogögaho-gahoko Unangika!”
O Yesus de o Beelzebul
(Mat. 12:22-30; Mark. 3:20-27)
14O wange moiuku o Yesus waduhu o womaha madorou womou-mouoka womatëngo de ihupu. O womaha madorou gënanga i hupuoka, o nyawa gënanga muläenge wotemo-temo. Manga ngöe yohëranga, 15#Mat. 9:34, 10:25 mä naga utu yotemo, ”Unanga wakunu waduhu o womaha madorou karana o Beelzebul o womaha madorou gënanga manga häeke aikuaha.”
16 #
Mat. 12:38, 16:1; Mark. 8:11 Nagaö o nyawa mahomoa yomau iwitaili o Yesus, hoʼ onanga yogahoko Unanga wodiai ihëra-hëranga moi hokä o nonako Unanga woböa ma Jou Madutuino. 17Mä o Yesus wohiöriki to önanga manga dungutu. De Unanga wätemo onangika, ”Nako o negara moi itinga-tingaka o doomu moi-doomu moi imateke haturü, o negara gënanga aha itedekanua. Deʼ o tau moimadol̄a ima tinga-tingaka de ima tekehaturü, aha yokilianga. 18Hokogenangoli o Ibilihi mapareta magoronaka; nako o doomu moi imaka ngamo de o doomu mahomoa, mapareta gënanga aha ikilianga. Ngini niatobari ngohi taduhu o womaha madorou karana o Beelzebul makuaha. 19Nako hokogënanga, de o nagona manga kuaha inïninïki yaduhu o womaha madorou gënanga? Inïninïki gënanga mahirete ihinyata igoungu ngini niahowono! 20Mä Ngohi taduhu o womaha madorou de ma Jou Madutu aikuaha, deʼ genanga mamangarati ma Jou Madutu womulaengoka wopareta tingini niahidogoronaka.
21Nako womatëngo wokua-kuata, de aidaë ingodu-ngodumu, wögöana aitau mahirete, done mata-mata aikiahonanga aha ihalamati. 22Mä nako womatëngo woora-ora iholoi wokuata deʼ wïutumu, done o nyawa iholoi wokua-kuata gënanga aha waora mata-mata aidaë o tau madutu gënanga wöngano-nganono, daha wohi kokodoku mata-mata aikiahonanga.
23 #
Mark. 9:40
O nyawa ihihiböaua Ngohi, igou-goungu ihilawani Ngohi, deʼ o nyawa ihiriwoua Ngohi, igou-goungu yakilianga Ahi manarama!”
O womaha madorou ilioli
(Mat. 12:43-45)
24”Nako o womaha madorou yämal̄aka imatëngoani, o womaha madorou gënanga ikokiloliti o ngï madududungoka mangale imä lingiri o dodogumu, ma ënanga imämäkeua. Mangale o hababu gënanga, ënanga itemo, ’O tau tamal̄a-mal̄aka genangika aha ngohi tögilio!ʼ 25Maöraha ënanga imahiadonika dokengoka, ënanga yamäkeika o tau gënanga madebi-debini deʼ ihidiaioka. 26Daha ënanga ioiki deʼ yao o womaha madorou mahomoa gahumu tumidi de iholoi itorou de ënanga. Ipaha önanga yowohama manyawaika gënanga daha yogogere genangoka. Deʼ mabaha o nyawa gënanga wodadi iholoi itorou dema dodihiraka de.”
O utumu madutu
27O Yesus wotemo hokogënanga ipaha, o ngoheka momatëngo yowöe-wöe manga hidogoronaka gënanga mïtemo o Yesusika, ”Igoungu moutumu o ngoheka monihi ngoha-ngohaka deʼ moni huhuhu Ngona!”
28Mä o Yesus wohaluhu, ”Iholoioli youtumu o nyawa yoihe-ihene ma Jou Madutu aidemo deʼ yadiai!”
Manga ngöe o nyawa yogahoko o Yesus wodiai ihëra-hëranga
(Mat. 12:38-42)
29 #
Mat. 16:4; Mark. 8:12 Manga ngöe o nyawa kiwihidoomu inohi o Yesus, Unanga wohigila-gila Ai demo, wato, ”Itorouholi o nyawa o öraha nënanga. Onanga yogahoko okianaga ihëra-hëranga hupaya önanga yakunu ihingaku, mä aha kamoiö de yahidöakua ihëra-hëranga onangika, sawaliua ihëra-hëranga mangale ma Nabi Yunus. 30#Yun. 3:4 Hokä ma Nabi Yunus imahirupa ihëra-hëranga o Niniwe manyawaika, hokogenangoli o Nyawa manga Ngohaka aha idadi okia naga ihëra-hëranga mangale o nyawa o öraha nënanga. 31#1Kok. 10:1-10; 2Taw. 9:1-12 O kiamati mawangeoka, ma koano ngoheka o Korehara mabererauku aha momomiki de o nyawa o öraha nënanga, deʼ mohi daaere manga howono. Hababu, mangale moihene o Salomo wososawaro aidodötoko, ma Koano ngoheka gënanga modiai o dodagi magogurutika o dunia mabatingoka de maino. Mä orahanënanga nenangoka naga i holoi wolamoko de ma Salomo! 32#Yun. 3:5 O kiamati mawangeoka, o Niniwe manyawa aha yomomiki de o nyawa o öraha nënanga, deʼ ihidaaere manga howono, hababu o Niniwe manyawa yotoba deʼ o baradoha yodiai okaua maöraha o Yunus woriwayati onangika. Mä orahanënanga nengoka naga iholoi wolamoko de o Yunus!”
O dararono deʼ o huhutu
(Mat. 5:15, 6:22-23)
33 #
Mat. 5:15; Mark. 4:21; Luk. 8:16 ”Moiua o nyawa yatuhuku manga hilo de yaiunika ekola yatamunuku de o rube. Unanga aha wakelenga o hilo gënanga matotodengoka, hupaya o nyawa yowoha-wohama yakunu yamäke madararono. 34O lako ganga o röehe mahilo. Nako anilako idodono, aniröehe magahumu itotararono. Mä nako anilako igawa, aniröehe magahumu ihuhutu. 35Hababu gënanga, nimahi dodiai, uha hiädono o dararono ngonaka gënanga idadi ihuhutu. 36Nako aniröehe magahumu i tararono, deʼ mahonongaö ma ihuhutua, done aniröehe magahumu gënanga kai totararono hokä o hilo madararono yodihiwarino.”
O Yesus wahi daaere o Farisi manyawa deʼ o agama maguru-guru
(Mat. 23:1-36; Mark. 12:38-40)
37O Yesus wo ade-ade iböto, o Farisi manyawa womatëngo wïahoko o Yesus wol̄omo aitauoka. O Yesus woiki wol̄omo genangika. 38O Farisi manyawa gënanga wohëranga iwïmäke o Yesus wol̄omo de Ai giama waihorua ihira imoteke o agama madatoro. 39Hababu gënanga ma Jou wïtemo unangika, ”Igoungu ngini o Farisi manyawa biaha niatebini niaudo-udomo deʼ niadodai maporetino, mä niadiri mahirete magoronaka iömanga de o biaha niora-ora deʼ o dorou. 40Ngini nibodo! Mode koigoungua ma Jou Madutu wadodiai maporetino gënanga wadiaioka magoronakaö? 41Naga niaudo-udomo deʼ niadodai magoronaka gënanga, kokiani gënanga doka niahidöaka o nyawa yomömihikinika. De hoko gënanga madodagi mata-mata aha idadi i tebini mangale ngini.
42 #
Im. 27:30
Nibodito ngini, o Farisi manyawa! Nidato-datomo mahasili hokä o hulahi, deʼ o bawa deʼ o gau-gauku mahomoahi, o regu ngimoi, ngini nihidöaka ma Jou Madutuika o regu moi, mä o adili deʼ o dora ma Jou Madutuika ngini nima legaikaua. Enahioko gënanga doka kokiani ngini niadiai, de mahomoahi yakunua ni alipä.
43Nibodito ngini, o Farisi manyawa! Ngini nioigo o ngï-o ngï duru de mahoromati o pupuji matau magoronaka, deʼ nioigo inï horomati o paha-paharoka. 44Nibodito ngini! Ngini hokä o lungunu o jereoka, koiwa manonako kiaka yamäoua o nyawa yadoko-doko makoi hidodogumua.”
45Womatëngo o agama maguru wïtemo o Yesusika, ”Bapa Guru, de o demo-demo gënanga, Bapa ngomiö nomi hikauku!”
46O Yesus wohaluhu, ”Nibodito nginiö, o agama maguru-guru! Ngini niahipatutu o hali mahühuha deʼ nihidöaka o datoro madodubuho, mä ngini mahirete kamahuhutulö ma nioluku niä riwo o nyawa ihidagi-dagi o datoro gënanga. 47Nibodito ngini! Ngini nihigoko o nabi-nabi manga jere, kiaka niaete de niatohora mahirete yätoma. 48Hoʼ ngini mahirete nima ngaku kiaka ngini nihi moteke okia niaete de niatohora yadodiaioka; hababu igoungu önanga yätomäka o nabi-nabi gënanga de nginila niaoko manga jere. 49Hababu gënanga ma Jou Madutu ai Sawaro itemo, ’Ngohi aha tohidingoto onangika o nabi-nabi deʼ ahi huhuloko-huhuloko; o hidoku moi aha yätoma deʼ o hidoku moi aha yäaniaya!ʼ 50Ma Jou Madutu wodiai gënanga hupaya o nyawa o öraha nënanga yähukumu karana o doma yadodiaioka o nabi mata-mataika ka dema dero o dunia idadi, 51#Kej. 4:8; 2Taw. 24:20-21 muläenge de o Habel iwi töma hiädono o Zakharia iwi toma, kiaka ima dadi o huhuba mangï deʼ ma Jou ai Tau mahi dogorona. Ningaku: O nyawa o örahanënanga marai aha yähukumu karana mata-mata gënanga.
52Nibodito ngini, o agama maguru-guru! O kusi la ihihelenga o sawaro mangorana igogonika nginioka, mä ngini mahirete nioluku niwohama magoronaika la nialingiri o sawaro gënanga. Ilio yaino ngini niatätatoko o nyawa imahidodailako yowohama magoronaika!”
53Maöraha o Yesus wamal̄a o ngï gënanga, o agama maguru-guru deʼ o Farisi manyawa iwïngëlo o Yesus de magiria. Onanga yomuläenge manga demo yaumo-umo o Yesusika hupaya Unanga womau woade-ade o hali mangöe. 54Deʼ oraha gënanga önanga iwi tailako ihidodiai la yatagoko mangale moi wohidemo ihöhowo-howono.
Currently Selected:
O LUKAS 11: TLB
Highlight
Share
Copy
Want to have your highlights saved across all your devices? Sign up or sign in