Nüxíraxü̃xü̃ ga popera ga Coríntiuwa yexmagüxü̃ ga yaxõgüxü̃tanüwa namuxü̃ ga Pauru 1
1
Pauru rü nüxü̃ narümoxẽ ga yema yaxõgüxü̃ ga Coríntiuarü ĩanewa yexmagüxü̃
1-2Pa Chauenexẽgü i Coríntiucüã̱xgüx i Yaxõgüxü̃x, choma i Pauru rü namaxã i taenexẽ i Chótene nixĩ i pexü̃ tarümoxẽgüxü̃. Rü choma nixĩ ya Tupana norü ngúchaü̃maxã choxü̃ yaxuxü̃ nax Ngechuchu ya Cristu norü puracüwa choxü̃ muxü̃ca̱x. Rü pema rü marü Tupanape̱xewa pixüüne yerü Ngechuchu ya Cristu marü pexü̃ nixüünexẽxẽ. Rü Tupana rü marü pexü̃ nade nax norü duü̃xü̃gü pixĩgüxü̃ca̱x wüxigu namaxã i guxü̃ma i ngẽma duü̃xü̃gü i guxü̃wama tórü Cori ya Ngechuchu ya Cristuxü̃ icua̱xüü̃güxü̃. Rü nüma ya Ngechuchu ya tórü Cori ixĩcü, rü ngẽma duü̃xü̃güarü Cori rü ta nixĩ.
3Rü chanaxwa̱xe ya Tanatü ya Tupana rü tórü Cori ya Ngechuchu ya Cristu norü ngechaxü̃gagu poraãcü pexü̃ narüngü̃xẽxẽ rü pexü̃ nataãẽxẽxẽ.
Tupana tüxü̃ narüngü̃xẽxẽ erü Cristuarü duü̃xü̃gü tixĩgü
4Rü taguma nüxü̃ charüchau nax Tupanana moxẽ pexca̱x chaxãxü̃. Rü moxẽ nüxna chaxã naxca̱x i ngẽma ngü̃xẽxẽ ya Ngechuchu ya Cristugagu Tupana pexna ãxü̃.
5Yerü Cristugagu Tupana pexna nanamu ga Naãxẽ ya Üünexü̃ nax pexü̃ nangü̃xẽẽxü̃ca̱x. Rü pexna nanaxã ga norü ore, rü naétü pexü̃́ nanatauxchaxẽxẽ nax nüxü̃ pecuáxü̃ca̱x nax ñuxü̃ ñaxü̃chiga yixĩxü̃ i ngẽma norü ore.
6Rü yexguma nüxü̃ pexĩnüegu ga yema ore ga Cristuchiga rü aixcüma peyaxõgü.
7Rü ñu̱xma nax ípenangu̱xẽẽxü̃ nax wena táxarü núma naxũxü̃ ya tórü Cori ya Ngechuchu ya Cristu, rü taxuxü̃ma i Tupanaarü ngü̃xẽxẽ pexü̃́ nataxu.
8Rü Tupana rü tá pexna nadau ñu̱xmatáta nawa nangu i ngẽma ngunexü̃ i Cristu nagu núma ũxü̃. Rü tá pexü̃ narüngü̃xẽxẽ nax taxúema chixexü̃maxã pexü̃ ixugüxü̃ca̱x i ngẽxguma wenaxarü núma naxũxgu ya tórü Cori ya Ngechuchu ya Cristu.
9Rü Tupana rü guxü̃guma nayanguxẽxẽ i norü uneta. Rü nüma nixĩ ga pexü̃ nadexü̃ nax wüxigu Nane ya tórü Cori ya Ngechuchu ya Cristumaxã pexãmücügüxü̃ca̱x.
Nügü nitoye ga yema yaxõgüxü̃
10Pa Chauenexẽgüx, tórü Cori ya Ngechuchu ya Cristuégagu pexü̃ chaca̱a̱xü̃ nax wüxigu perüxĩnüexü̃ca̱x. Rü tama name i pegü pitoyex. Rü name nixĩ i aixcüma pegü pengechaü̃gü nax wüxigutama perüxĩnüexü̃ca̱x.
11Pa Chauenexẽgüx, pemaxã nüxü̃ chixu i ngẽma ore, yerü Croétanüxü̃tanüwa nüxü̃ chacuáchiga nax pegümaxã penuexü̃ rü tama aixcüma wüxigu perüxĩnüexü̃.
12Rü pemaxã nüxü̃ chixu i ngẽma erü ñuxre i pema rü ñaperügügü: “Choma rü Pauruwe charüxũ”, ñaperügügü. Rü togue rü: “Choma rü Apóruwe charüxũ”, ñaperügügü. Rü togue rü: “Choma rü Pedruwe charüxũ”, ñaperügügü. Rü togue rü: “Choma rü Cristuwe charüxũ”, ñaperügügü.
13¿Rü ñuxãcü nixĩ i ngẽma? ¿Pexca̱x rü Cristu rü marü niyauxye? ¿Ẽ̱xna pema nüxü̃ pecua̱xgu rü choma i Pauru chixĩxü̃ ga curuchawa pexca̱x chipotaxü̃ rü chayuxü̃? ¿Rü ẽ̱xna pema nüxü̃ pecua̱xgu rü chauégagu yixĩxü̃ ga ípebaiü̃xü̃?
14Rü Tupanana moxẽ chaxã, yerü taxúema pexü̃ íchabaiü̃xẽxẽ ga pemax. Rü Críspo rü Gáyuxicatama nixĩ ga íchabaiü̃xẽẽxü̃.
15Rü ngẽmaca̱x taxucürüwa texé tügü tixu nax chauégagu ítabaiexü̃.
16Rü to ga íchabaiü̃xẽẽxü̃ nixĩ ga Etéfanatanüxü̃, natürü cha̱u̱xca̱x rü taxúema ga togue tüxü̃ íchabaiü̃xẽxẽ.
17Yerü nüma ga Cristu rü tama choxü̃ namu nax duü̃xü̃güxü̃ íchabaiü̃xẽẽxü̃ca̱x, natürü choxü̃ namu nax duü̃xü̃gümaxã nüxü̃ chixuxü̃ca̱x i norü ore i mexü̃. Rü nanaxwa̱xe i tauxchaxü̃ i oremaxã nüxü̃ chixu i ngẽma ore. Erü ngẽxguma chi ñoma nüxü̃ cua̱xüchixü̃rüxü̃ nüxü̃ chixuxgu i ngẽma ore, rü ngürüãchi i duü̃xü̃gü rü tá chauguama narüxĩnüe rü tá nüxü̃ inayarüngümae nax Cristu yixĩxü̃ ga tüxü̃ maxẽxẽẽcü ga yexguma curuchagu nayu̱xgux.
Cristuwa nixĩ ga Tupana inawéxü̃ ga norü pora rü norü cua̱x
18Rü ngẽma ore i nüxü̃ ixuxü̃ nax tórü pecaduca̱x curuchagu nayuxü̃ ya Cristu, rü wüxi i natüca̱xmamare nixĩ naxca̱x i ngẽma duü̃xü̃gü i poxcuwa ĩxü̃. Natürü yixema nax Tupana tüxü̃ maxẽxẽẽxü̃, rü taxca̱x rü ngẽma ore rü Tupanaarü pora nixĩ.
19Erü norü ore i ümatüxü̃wa rü ñanagürü ga Tupana:
“Tá ichayanaxoxẽxẽ i norü cua̱x i ngẽma duü̃xü̃gü i nüxü̃ cua̱xüchigüxü̃.
Rü tá nüxna chanayaxu i norü cua̱x i ngẽma naãxẽxü̃ cua̱xgüxü̃”,
ñanagürü.
20Rü ñu̱xmax, Pa Chauenexẽgüx, ¿Tupanape̱xewa rü ta̱xacüwa namexü̃ i ngẽma duü̃xü̃gü i nüxü̃ cua̱xüchixü̃? ¿Rü ta̱xacüwa namexü̃ i ngẽma ngúexẽẽxruü̃gü i Moiché ümatüxü̃ i mugüwa ngu̱xẽẽtaegüxü̃? ¿Rü ta̱xacüwa namexü̃ i ngẽma duü̃xü̃gü i mea nüxü̃ cua̱xgüxü̃ i ñoma i naanearü cuáchigagu nax yadexagüxü̃? Erü guxü̃ma i ngẽma cua̱x rü duü̃xü̃gü nagu rüxĩnüemarexü̃ nixĩ, rü Tupanaca̱x rü taxuwama name.
21Natürü nüma ya Tupana ya guxü̃xü̃ma cuácü, rü tama nanaxwa̱xe nax ñoma i naanecüã̱x i duü̃xü̃güarü cua̱xgagu nax yixĩxü̃ i naxü̃tawa nangugüxü̃ i nümagü. Natürü nanaxwa̱xe nax ngẽma norü ore i mexü̃gagu nax yixĩxü̃ inamaxẽxẽẽãxü̃ i ngẽma duü̃xü̃gü i yaxõgüxü̃ woo ngẽma togü i duü̃xü̃güca̱x rü natüca̱xmamare yixĩxgu i ngẽma ore.
22Ngẽma Yudíugü rü nüxü̃ nadaugüchaü̃ i cua̱xruü̃gü i Tupanaarü poramaxã üxü̃. Rü ngẽma Griégugü rü naxca̱x nadaugü i ñoma i naanecüã̱x i duü̃xü̃güarü cua̱x.
23Natürü ngẽma ore i toma nüxü̃ tixuxü̃, rü Cristu ga curuchawa ipotacüchiga nixĩ. Rü ngẽma ore rü naãxẽwa nangu̱x i ngẽma Yudíugü. Rü ngẽma duü̃xü̃gü i tama Yudíugü ixĩgüxü̃ca̱x rü wüxi i natüca̱xmamare nixĩ.
24Natürü ngẽma duü̃xü̃gü ya Tupana dexü̃ i Yudíugü rüẽ̱xna ngẽma tama Yudíugü ixĩgüxü̃ rü ngẽma duü̃xü̃güca̱x Tupana inanawe̱x i norü pora rü norü cua̱x ga yexguma pecaduca̱x nayu̱xgu ga Cristu.
25Rü yema Tupana üxü̃ ga yexguma nayu̱xgu ga Cristu rü duü̃xü̃güca̱x rü wüxi i ngeãẽmare nixĩ. Natürü ngẽma Tupana nagu rüxĩnüxü̃ rü guxü̃ma i ñoma i naanecüã̱x i duü̃xü̃güarü cua̱xarü yexera nixĩ. Rü yexguma curuchagu nayu̱xgu ga Cristu rü duü̃xü̃güca̱x rü natura ga Tupana ga yexguma. Natürü yexguma nixĩ ga inawéãxü̃ nax duü̃xü̃güarü yexera naporaxüchixü̃.
26Pa Chauenexẽgüx, name nixĩ i nagu perüxĩnüe nax Tupana pexü̃ dexü̃ nax norü duü̃xü̃gü pixĩgüxü̃ca̱x woo noxretama pixĩgü nax nüxü̃ pecua̱xüchixü̃ ega duü̃xü̃gü pexü̃ ngugügu. Rü woo noxretama pixĩgü nax ãẽ̱xgacügü pixĩgüxü̃, rü woo noxretama pixĩgü i ngẽma itaarü diẽruã́xü̃tanüxü̃ pixĩgüxü̃, natürü Tupana rü pexü̃ nade nax norü duü̃xü̃gü pixĩgüxü̃ca̱x.
27Rü woo ñoma i naanecüã̱x nagu narüxĩnüe nax pema rü duü̃xü̃gü i taxuwama mexü̃ pixĩgüxü̃, natürü Tupana pexü̃ nade nax naxãnexü̃ca̱x i ngẽma duü̃xü̃gü i nügügu rüxĩnüexü̃ nax nüxü̃ yacua̱xüchixü̃. Rü Tupana pexü̃ nade i pema nax duü̃xü̃gü pexü̃ ixugügu nax peturaexü̃ nax ngẽmaãcü naxãnexü̃ca̱x i ngẽma duü̃xü̃gü i poraexü̃.
28Rü Tupana nanade ga yema duü̃xü̃gü ga togü nüxü̃ oexü̃, rü ñoma i naanewa taxuxü̃ma ixĩgüxü̃ rü taxuxü̃ma nüxü̃́ ngẽxmagüxü̃. Rü yemaacü Tupana nanaxãneexẽxẽ i ngẽma duü̃xü̃gü i ñoma i naanewa tachigagüxü̃.
29Rü ngẽmaca̱x taxucürüwama texé tügü ticua̱xüxü̃ i Tupanape̱xewa.
30Rü nümatama ga Tupana nixĩ ga Ngechuchu ya Cristuarü duü̃xü̃güxü̃ pexü̃ yaxĩgüxẽẽxü̃. Rü tatanüwa nanamu ga Cristu nax nüma rü Tupanaarü cua̱x taxca̱x yixĩxü̃ca̱x. Rü Cristugagu nixĩ nax Tupana tüxü̃ dexü̃ rü tüxü̃ yamexẽẽxü̃ nax nape̱xewa ixüünegüxü̃ca̱x rü pecaduwa ínguxü̃xü̃ca̱x.
31Rü ngẽmaca̱x i Tupanaarü ore i ümatüxü̃wa rü ñanagürü:
“Rü ngẽxguma texé tügü icua̱xüxü̃chaü̃gu rü name i tügü ticua̱xüxü̃ naxca̱x i ngẽma tórü Cori ya Cristu üxü̃”,
ñanagürü.
© 2022, Wycliffe Bible Translators, Inc. All rights reserved.