Popera ga Rómawa yexmagüxü̃ ga yaxõgüxü̃tanüwa namuxü̃ ga Pauru 16
16
Pauru rü nüxü̃ narümoxẽ ga yema duü̃xü̃gü ga yaxõgüxü̃ ga Rómawa yexmagüxü̃
1Rü ñu̱xma rü pemaxã nüxü̃ chixu rü petanüwa ixũxchaü̃ i taeya̱x i Fébe. Rü ngĩma rü Chencréaarü ĩanewa diaconícha iyixĩ rü nüxü̃ irüngüxẽxẽ i ngẽma yaxõgüxü̃ i ngéma ngẽxmagüxü̃.
2Rü chanaxwa̱xe i mea ngĩxü̃ peyaxu, naégagu ya tórü Cori ya Ngechuchu, erü ngẽma nixĩ i mexü̃ nax penaxüxü̃ namaxã i guxü̃ma i yaxõgüxü̃. Rü chanaxwa̱xe i guxü̃ma i ta̱xacü i ngĩxü̃́ taxuxü̃wa rü ngĩxü̃ perüngü̃xẽxẽ, erü ngĩma rü poraãcü togüxü̃ irüngüxẽxẽ, rü choxü̃ rü ta irüngüxẽxẽ.
3¡Rü nüxü̃ perümoxẽgü i Prichíra rü Aquíra! Rü nümagü rü chomücügü nixĩgü ya Ngechuchu ya Cristuarü puracüwa.
4Rü nümagü rü ãũcümaxü̃wa nichocu nax chauétüwa nachogüexü̃ca̱x nax tama chayuxü̃ca̱x ga chomax. Rü ngẽmaca̱x moxẽ nüxna chaxã. Rü tama chaxicatama moxẽ naxca̱x nüxna chaxã, natürü moxẽ nüxna naxãgü ta i guxü̃ma i taenexẽgü i yaxõgüxü̃ i tama Yudíugü ixĩgüxü̃.
5¡Rü nüxü̃ perümoxẽgü ta i guxü̃ma i taenexẽgü i Aquírapatawa ngutaque̱xegüüxü̃! ¡Rü ngẽxgumarüxü̃ ta nüxü̃ perümoxẽgü ya chomücü ya nüxü̃ changechaü̃cü ya Epénetu! Rü nüma nixĩ ga nüxíra Cristuaxü̃́ yaxõõxü̃ ga Áchiaanewa.
6¡Rü ngĩxü̃ perümoxẽgü i María ga poraãcü petanüwa Tupanaaxü̃́ puracücü!
7¡Rü nüxü̃ perümoxẽgü i chautanüxü̃ i Andrónico rü Yúnia ga wüxigu chomaxã poxcuexü̃! Rü nümagü nixĩ i yatügü i aixcüma Tupana imugüxü̃ i guxü̃ma i yaxõgüxü̃ nüxü̃ ngechaü̃güxü̃. Rü nümagü rü nüxíra chauxü̃pa Cristuaxü̃́ nayaxõgü.
8¡Rü nüxü̃ perümoxẽgü ya Ampriáto ya chomücü ya nüxü̃ changechaü̃cü ya chauxrüxü̃ tórü Coriaxü̃́ yaxõcü!
9¡Rü nüxü̃ perümoxẽgü ya Urubáno ya tomücü ixĩcü i Cristuarü puracüwa! ¡Rü ngẽxgumarüxü̃ ta nüxü̃ perümoxẽgü ya Echatáqui ya nüxü̃ changechaü̃cü!
10¡Rü nüxü̃ perümoxẽgü ya Apére ya aixcüma tüxü̃ nüxü̃ dauxẽẽcü nax Cristuaxü̃́ yaxõõxü̃! ¡Rü ngẽxgumarüxü̃ ta nüxü̃ perümoxẽgü i Aritóburotanüxü̃!
11¡Rü nüxü̃ perümoxẽgü i chautanüxü̃ i Erodióü̃! ¡Rü ngẽxgumarüxü̃ ta nüxü̃ perümoxẽgü i Nachíchutanüxü̃ i tórü Coriaxü̃́ yaxõgüxü̃!
12¡Rü ngĩxü̃ perümoxẽgü i Triféna rü Trifócha! Rü ngĩmagü rü tórü Coriaxü̃́ ipuracüe. ¡Rü ngẽxgumarüxü̃ ta ngĩxü̃ perümoxẽgü i taeya̱x i Pérchide i ngĩxü̃ ingechaü̃gücü! Rü ngĩma rü marü poraãcü tórü Coriaxü̃́ ipuracü.
13¡Rü nüxü̃ perümoxẽgü ya Rúfu ya aixcüma mea tórü Coriaxü̃́ yaxõcü! ¡Rü ngẽxgumarüxü̃ ta ngĩxü̃ perümoxẽgü i naé ga chauérüxü̃ chomaxã ixĩcü!
14¡Rü nüxü̃ perümoxẽgü i Achíncrito, rü Fregónte, rü Érmex, rü Patróbax, rü Érmax, rü ngẽma togü i taenexẽgü i natanüwa ngẽxmagüxü̃!
15¡Rü nüxü̃ perümoxẽgü ta i Firórogo, rü Yúria, rü Neréo, rü naeya̱x, rü Orímpa, rü guxü̃ma i taenexẽgü i yaxõgüxü̃ i natanüwa ngẽxmagüxü̃!
16Rü chanaxwa̱xe i pegü pengechaü̃güãcüma pegü perümoxẽgü i wüxichigü. Rü guxü̃ma i ngẽma yaxõgüxü̃ i tóxnamana ngẽxmagüxü̃, rü pexü̃ narümoxẽgü.
17Pa Chauenexẽgüx, pexü̃ chaca̱a̱xü̃ nax pegüna pedaugüxü̃ca̱x nüxna i ngẽma duü̃xü̃gü i pexü̃ itoyechaü̃xü̃ rü chixexü̃gu pexü̃ yixẽẽchaü̃xü̃. Erü ngẽma duü̃xü̃güarü ngu̱xẽẽtae rü tama namaxã nawüxigu i ngẽma ngu̱xẽẽtae ga noxri peyauxgüxü̃ ga yexguma noxri peyaxõgügu. Rü name nixĩ i noxtacüma nüxna pixĩgachi i ngẽma duü̃xü̃gü rü tama natanügu pexãgü.
18Erü ngẽma duü̃xü̃gü rü tama tórü Cori ya Ngechuchu ya Cristuarü ngúchaü̃ naxügü, natürü noxrütama ngúchaü̃ nixĩ i naxügüxü̃. Norü dexa ga maixcuraxü̃maxã nayaxucu̱xẽgü i duü̃xü̃gü, rü ngẽmaãcü nanawomüxẽẽgü i ngẽma duü̃xü̃gü i tama mea nüxü̃ cua̱xgüxü̃.
19Rü guxü̃ma i duü̃xü̃gü nüxü̃ nacua̱xgü nax aixcüma mea Tupanaga pexĩnüexü̃ i pemax. Rü ngẽmaca̱x pemaxã chataãxẽ i chomax. Rü chanaxwa̱xe nax mea nüxü̃ pecuáxü̃ i ta̱xacü nixĩ i mexü̃ i Tupanape̱xewa nax penaxüxü̃ca̱x i ngẽma. Natürü ngẽma Tupanape̱xewa chixexü̃, rü ¡nüxna pixĩgachi nax tama nagu peyixü̃ca̱x!
20Rü ngẽxguma ngẽmaãcü mea pemaxẽgu rü nüma ya Tupana ya tüxü̃ taãẽxẽẽcü rü tá pexü̃ naporaexẽxẽ nax aixcüma nüxü̃ perüyexeraxü̃ca̱x i Chataná. Rü chanaxwa̱xe i tórü Cori ya Ngechuchu ya Cristu pemaxã inarüxã̱ũ̱x rü pexü̃ narüngü̃xẽxẽ.
21Rü pexü̃ narümoxẽ ya Timutéu ya chomücü ixĩcü i Tupanaarü puracüwa. Rü ngẽxgumarüxü̃ ta pexü̃ narümoxẽgü i chautanüxü̃ i Lúchiu, rü Yachóü̃ rü Chochípatru.
22Rü choma i Térchio nax chanaxümatüxü̃ i ñaa popera, rü choma rü ta pexü̃ charümoxẽ naégagu ya tórü Cori.
23Rü pexü̃ narümoxẽ ta ya Gáyu ya napatawa changexmacü. Rü nüma rü inanaxã ya daa napata nax nawa nangutaque̱xegüxü̃ca̱x i guxü̃ma i yaxõgüxü̃. Rü ngẽxgumarüxü̃ ta pexü̃ narümoxẽgü i Erástu i daa ĩanearü diẽruarü dauruxü̃ ixĩxü̃, rü taenexẽ i Cuártu.
24Rü chanaxwa̱xe i tórü Cori ya Ngechuchu ya Cristu pexü̃ narüngü̃xẽxẽ i guxãma i pemax. Rü ngẽmaãcü yixĩ.
Pauru rü Tupanaxü̃ yacua̱xüü̃ãcüma nanagu̱xẽxẽ i norü popera
25-26¡Rü ñu̱xmax, rü ngĩxã nüxü̃ ticua̱xüü̃gü ya Tanatü ya Tupana! Rü nüma nüxü̃́ nangẽxma i pora nax pexü̃ naporaexẽẽxü̃ca̱x nax mea peyaxõgüamaxü̃ca̱x, ngẽma norü ore i tüxü̃ maxẽxẽẽxü̃ tamaxã nüxü̃ ixuxü̃rüxü̃. Rü ngẽma nixĩ i ore i guxü̃wama nüxü̃ chixuxü̃ rü namaxã changúexẽẽtaexü̃ ya Ngechuchu ya Cristuchiga. Rü ngẽmatama ore i Cristuchiga rü taxcha̱xwa naxẽxü̃gu ga noxri, natürü i ñu̱xma ya Tupana rü marü tüxü̃ nüxü̃ nacua̱xẽxẽ i ngẽma. Rü nũxcüma tauta naane uxgu rü Tupanaxicatama nüxü̃ nacua̱x ga yema, natürü i ñu̱xma rü norü orearü uruü̃gü ümatüxü̃ ga orewa taxca̱x nanango̱xẽxẽ. Rü ngẽma ore rü namaxã nawüxigu ga yema ore ga nũxcüma nüxü̃ yaxuxü̃ ga Tupana ya guxü̃guma maxẽchacü. Rü ñu̱xma ya Tupana rü nanamugü i norü orearü uruü̃gü nax guxü̃ma i nachixü̃anecüã̱xgü i duü̃xü̃gümaxã nüxü̃ yaxugüexü̃ca̱x i ngẽma ore i Cristuchiga nax nüxü̃́ yaxõgüãxü̃ca̱x rü naga nax naxĩnüexü̃ca̱x.
27¡Rü ngĩxã guxü̃gutáma Ngechuchu ya Cristuégagu nüxü̃ ticua̱xüü̃gü ya Tanatü ya Tupana ya nüxicatama Tupana ixĩcü rü nüxicatama nüxü̃ cuácü! Rü ngẽmaãcü yixĩ.
Currently Selected:
Popera ga Rómawa yexmagüxü̃ ga yaxõgüxü̃tanüwa namuxü̃ ga Pauru 16: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.