Nüxíraxü̃xü̃ ga popera ga Coríntiuwa yexmagüxü̃ ga yaxõgüxü̃tanüwa namuxü̃ ga Pauru 2
2
Cristu ga curuchawa ipotacüchiga
1Pa Chauenexẽgüx, yexguma noxri petanüwa chaxũxgu nax pemaxã nüxü̃ chixuxü̃ca̱x ga Tupanaarü ore i Cristuchiga, rü tama ñoma nüxü̃ cua̱xüchixü̃rüü̃ãcüma pemaxã chidexa, rü tama ore ga guxchaxü̃maxã nixĩ ga pemaxã nüxü̃ chixuxü̃.
2Yerü yexguma petanüwa chayexmagu, rü Cristuchigaxü̃xicatama nixĩ ga pemaxã chixuxü̃. Rü taxuxü̃ma ga ta̱xacü ga to ga orexü̃ pemaxã chixu. Rü Ngechuchu ya Cristu ga curuchawa ipotacüchigaxicatama nixĩ ga pemaxã nüxü̃ chixuxü̃.
3Rü yexguma petanüwa chayexmagu rü cha̱u̱xca̱x rü nataxuma ga chorü pora rü pepe̱xewa chorü muü̃maxã chidu̱xrux.
4Rü yexguma pemaxã chidexagu rü pemaxã nüxü̃ chixuxgu ga Tupanaarü ore, rü tama ñoma nüxü̃ cua̱xüchixü̃ãcü pemaxã nüxü̃ chixu ga ore nax pexü̃́ chanangúchaü̃xẽẽxü̃ca̱x rü peyaxõgüxü̃ca̱x. Natürü Tupanaãxẽ i Üünexü̃arü ngü̃xẽẽmaxã rü Tupanaarü poramaxã nixĩ ga pexü̃́ chanangúchaü̃xẽẽxü̃.
5Rü yemaacü Tupanaarü poramaxã pemaxã nüxü̃ chixu ga yema ore nax Tupanagagu yixĩxü̃ nax nüxü̃́ peyaxõgüxü̃, rü tama ñoma i naanecüã̱x i duü̃xü̃güarü cuágagu nax yixĩxü̃.
Tupana rü Naãxẽ ya Üünexü̃wa nügü tüxü̃ nacua̱xẽxẽ
6Natürü pemaxã nüxü̃ chixu, rü ngẽxguma natanüwa tangexmagu i ngẽma marü meama yaxõgüxü̃, rü ngẽxguma nixĩ i nüxü̃ cua̱xüchixü̃ãcü tanangúexẽẽxü̃ i ngẽma ore. Natürü ngẽma cua̱x rü tama ñoma i naanewa ne naxũ, rü bai i ñoma i naanearü ãẽ̱xgacügü i paxa tá iyarüxoxü̃wa ne naxũ.
7Natürü ngẽma cua̱x rü Tupanawa nixĩ i ne naxũxü̃. Rü ngẽma cua̱x nixĩ ga noxri tauta naane uxgu Tupanaxicatama nagu rüxĩnüxü̃ nax ñuxãcü tá tüxna naxããxü̃ i maxü̃ i taguma gúxü̃.
8Natürü yema Tupana nagu rüxĩnüxü̃, rü taxuxü̃ma ga ñoma ga naanecüã̱x ga ãẽ̱xgacügü nüxü̃ nacua̱x. Yerü yexguma chi aixcüma nüxü̃ nacua̱xgügu ga yema Tupana nagu rüxĩnüxü̃ rü taxũchima curuchawa nayapotagü ga tórü Cori ya Cristu.
9Rü ngẽmachiga nixĩ i Tupanaarü ore i ümatüxü̃wa i ñaxü̃:
“Rü ngẽma duü̃xü̃gü i Tupanaxü̃ ngechaü̃güxü̃ca̱x, rü nüma nanamexẽxẽ i ta̱xacü i taxúema nüxü̃ dauxü̃, rü taguma texé nüxü̃ ĩnüxü̃, rü bai i texé nagu rüxĩnüxü̃”,
ñaxü̃.
10Rü ngẽma nixĩ ya Tupana i Naãxẽ ya Üünexü̃arü ngü̃xẽẽmaxã tüxü̃ nüxü̃ cua̱xẽẽxü̃. Rü ngẽma Naãxẽ ya Üünexü̃ rü guxü̃xü̃ma nacua̱x, rü aixrüxü̃ i ngẽma Tupanaxicatama nüxü̃ cuáxü̃ rü nüxü̃ nacua̱x.
11Rü duü̃xü̃gütanüwa rü ¿texé nüxü̃ tacua̱x nax ta̱xacügu naxĩnüxü̃ i wüxichigü i duü̃xü̃? Rü ngẽma naãxẽ i wüxichigü i duü̃xü̃wa ngẽxmaxü̃xicatama nixĩ i nüxü̃ cuáxü̃ i ngẽma nagu naxĩnüxü̃. Rü ngẽxgumarüxü̃ ta Tupanaãxẽ i Üünexü̃xicatama nixĩ i nüxü̃ cuáxü̃ nax ta̱xacügu naxĩnüxü̃ ya Tupana.
12Rü yixema rü tama ñoma i naanecüã̱x i naãxẽ nixĩ ga iyauxgüxü̃. Natürü tanayauxgü i ngẽma Naãxẽ ya Üünexü̃ ga Tupana taxca̱x núma muxü̃ nax nüxü̃ icuáxü̃ca̱x i guxü̃ma i ngẽma ngü̃xẽẽgü ga Tupana norü ngechaü̃maxã tüxna ãxü̃.
13Rü ñu̱xma nax pemaxã nüxü̃ tixuxü̃ i ngẽmachiga, rü Tupanaãxẽ ya Üünecü toxna ãxü̃ i oremaxã nixĩ i pemaxã nüxü̃ tixuxü̃. Rü tama ore i torü cua̱xwa tayaxuxü̃maxã nixĩ i pemaxã nüxü̃ tixuxü̃. Rü ngẽmaãcü Tupanaãxẽ i Üünexü̃arü oremaxã tayango̱xẽxẽ i ngẽma Tupana nagu rüxĩnüxü̃ rü tüxü̃́ naxwa̱xexü̃.
14Rü texé ya tama Tupanaãxẽ ya Üünecü tümawa ngẽxmaxẽ, rü taxucürüwa tanayaxu i ngẽma Tupanaãxẽ ya Üünecü tüxü̃ ngu̱xẽẽxü̃, erü tümaca̱x ya yíxema duü̃xẽ rü natüca̱xmamare nixĩ. Rü tama nüxü̃ tacua̱xéga erü yíxema Tupanaãxẽ ya Üünecü tümawa ngẽxmaxẽxicatama tixĩ ya nüxü̃ cuáxe nax tanangugüxü̃ nax ta̱xacüchiga yixĩxü̃ i ngẽma Tupanaãxẽ ya Üünecü tüxü̃ ngu̱xẽẽxü̃.
15Rü yíxema duü̃xẽ ya Tupanaãxẽ ya Üünecü tümamaxã icuáxe, rü mea nüxü̃ tacua̱x i guxü̃ma i ngẽma mexü̃ ya Tupana tüxü̃́ naxwa̱xexü̃. Rü taxucürüwa texé tümachiga chixexü̃ tixu.
16Rü Tupanaarü ore i ümatüxü̃wa rü ñanagürü:
“¿Texé nüxü̃ tacua̱x nax ta̱xacügu naxĩnüxü̃ ya tórü Cori?
¿Rü texé nüxü̃ tacua̱x nax Tupanaxü̃ taxucu̱xẽxü̃?”
ñanagürü. Natürü yixema nixĩ i aixcüma nüxü̃ icuáxü̃ i ngẽma Cristu nagu rüxĩnüxü̃.
© 2022, Wycliffe Bible Translators, Inc. All rights reserved.