MATIUS 3
3
Ki Yohanes Mobobaptis
(Mrk. 1:1-8; Luk. 3:1-18; Yoh. 1:19-28)
1Kon wakutu intua ki Yohanes Mobobaptis namangoidon kon padang gurun Yudea, bo nopoyaput in koyow nanaa, 2#Mat. 4:17; Mrk. 1:15 “Pogogaidon mogaid kon dosamu mita, sin diádon moonggot bo mamangoi in ki Allah momarenta saḷaku Datu!” 3#Yes. 40:3 Ki Yohanesbí naa inta pinopomakusudan in singog i Nabi Yesaya nanaa:
“Oyúon intau inta nobaḷú kon padang pasir:
Sadiadon daḷan kon i Tuhan,
tuḻidon in daḷan kon i-Nia.”
4 #
Dat.2. 1:8
Ki Yohanes nogiḷambung jubah nongkon bubuḷ in unta. Baannea in nongkon kuḻit, kaanonnea in pangkoḷá bo dilú in kayuon. 5Naonda in nokodongog kon onu in pinoyaputnea tatua, noroangoidon in intau mita, inta nongkon Yerusalem, nongkon bayongan butá in Yudea, bo nongkon bayongan ḻipú inta kon diugmai in Ongkag in Yordan. 6Mosia nongaku muna kon taḷá monia bodongka binaptis i Yohanes kon Ongkag in Yordan tatua.
7 #
Mat. 12:34, 23:33 Tongá wakutu in sia nokoontong kon nobayong doman intau in Parisi bo Saduki in namangoi bo mokibaptis kon inia, siningognea nanaa in mosia: “Ei intau mita inta moraat. Ki ine in noguman kon moiko nion in kotaḻiban in hukuman i Allah inta kon singgai moiduduimai? 8Poponiatapa muna kon oaid monimu kon moiko aindon totu-totuu nogogai in mogaid kon dosamu mita. 9#Yoh. 8:33 Bo naaipa muna morai kon moiko in mosaḷamatbí sin moiko in moguman kon bonu in gina kon ki Abraham in ki amá nami, pogumankudon kon i monimu, kon batu mita tanaa in motaaubí aidan i Allah ki buí mita i Abraham. 10#Mat. 7:19 Pokotorop! Boḻiung aindon inukat mako kon uakat in kayu. Bo pomuḷoi in pangkoi inta diá mopomungai in mopia yo notantú kon pupuḷonbí bo pogonag kon tuḷu. 11Akuoi mopobaptis in tubig kon i monimu, saḷaku bukti kon moiko aindon mogogai in mogaid kon inta diá mopia, táe Sia inta mamangoi moiduduimai kon inakó naa, kawasa-Nea moiḻiu totok kon inakó, sedang tongá mobuka kon togot in sapatu-Nea yo diá patus in akuoi. Sia in mopobaptis kon i monimu in Roho i Allah bo tuḷu. 12Digu ain kokada-kadai-Nea mako. Tampat posipunan kon gandum toko daritan-Neadon, gandum sipunon-Nea bo uaban, inta mopia tagúonnea kon tampatnea, táe bayongan pangkoinea in tubáan-Nea kon tuḷu inta diá mopio-piong.”
Ki Yesus binaptis i Yohanes
(Mrk. 1:9-11; Luk. 3:21-22)
13Nongkon Galilea ki Yesus namangoi kon i Yohanes kon Ongkag in Yordan bo nokibaptis kon inia. 14Táe ki Yohanes nongampag kon i-Nia, kainia: “Akuoibí naa in musti baptison i Pak Guru, táe tanaa in noyoḻiudon, ki Pak Gurubí in mamangoi bo mokibaptis kon inakó!”
15Táe ki Yesus in notubag: “Pomayádon mako, diábí nongonu, sin natuabí in kita aka mogintompod kon bayongan inta kinoibog i Allah.” Dá binaptis domandon i Yohanes in Sia.
16Naonda in nopaḷut binaptis, ki Yesus ḷagi nobatun nonaḷámai kon tubig tatua, bo kon dodai doman intua ḷangit nobukat bo inontong-Nea in Roho i Allah naonda bo ḷagapan paḷoma noponag kon i-Nia. 17#Kḻn. 22:2; Mzm. 2:7; Yes. 42:1; Mat. 12:18, 17:5; Mrk. 1:11; Luk. 9:35 Bo kinodongogandon in singog nongkon soroga noguman: “Naadon ki Adí-Ku inta kinotabi-Ku, Sia naa inta kinoibog-Ku.”
Currently Selected:
MATIUS 3: INOMOG
Highlight
Share
Copy
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.