MATIUS 2
2
Intau mita in Mayusi nongkon Pomukaan
1Naonda in ki Yesus pinononggadídon kon Betlehem, kon tungkuḷ intua butá in Yudea pinareta i Datu Herodes, bo dodai intua namangoidon kon Yerusalem in intau mita in Mayusi nongkon Pomukaan. 2Bo mosia noḻibó magí-mako: “Kon onda degá in Sia, datu intau Yahudi inta bagu pinononggadí tua? Kami aindon nokoontong kon tundi-Nea kon dotá in Timur, bo kami naa mamangoi sin mosumba kon i-Nia.”
3Naonda in ki Datu Herodes bo bayongan intau kon Yerusalem nokodongog kon soaḷ tatua, noitaḻikokog totok mosia. 4Dá sinipunnea in imang mita tongguḷunea bo guru mita in agama intau in Yahudi. Bodongka noḻibó kon i monia, “Kon onda in popononggadían kon i Mesias?”
5Tubag monia kon inia: “Kon Betlehem, butá in Yudea, sin nanaa in pinais kon bonu in buk i nabi:
6 #
Mi. 5:1
Bo iko Betlehem, butá i Yohuda,
iko in deemanbí totok in mointok kon sigad monia inta nomarenta kon Yohuda.
Sin nongkon inimubí naa moisindog in tobatú intau inta mobaḻí itoi,
Sia inta moḷukad kon bayongan umat-Ku kon Israel.”
7Bo inumado-adop mako ki Herodes nogoiní kon intau mita in Mayusi tatua bo noḻibó kon i monia kinotaḻit mongo kon dodai in onda in tundi tatua inontong. 8Onda intua pinotabánea in intau mita in Mayusi tatua minayá in Betlehem, takin koyow: “Bayá bo tayakdon kotaḻit adí tatua, bo naonda i mouḻí monimu in Sia, ḷagi angoi poguman kon inakó sinbá akuoi mamangoi doman mosumba kon i-Nia.”
9-10Nokodongog mako kon koyow i datu natua, nobuatdon in mosia, bo mosia nokoontong kon tundi inta aindon inontong monia kon Pomukaan inumuna kon i monia bo nogogai kon tombutungmai in tampat inta pinogukatan kon Adí tatua. Naonda in mosia nokoontong kon tundi tatua, nopia-pia totok in gina monia. 11Bo sinumuotdon in mosia kon bonu in baḷoi tatua bo noindoi kon Adí tatua takin ki Maria ki iná-Nea. Mosia sinumungkud bo nosumba kon i-Nia. Mosia nobuká kon tampat pobobonuan kon pakakat monia bodongka nobogoi in barang pinosumba kon i-Nia. Barang inta inogoi monia tua in buḷawan, kamania, bo taḷong mobondu.#2:11: kamania: bahan dupa inta nomahaḷ in boḻinea, pinomia nongkon naonda bo pangkoi in kayu. Taḷong mobondu: puḷut inta ain noingkag bo mobondu nongkon naonda bo pangkoi in kayu. (Indoiai in kamus). 12Bo popisí in mosia aindon kinoyowan kon bonu in togoindop sinbá donaaidon mayá bui kon i Herodes. Dá mosia nobuidon kon ḻipú monia tontaní táe nongin daḷan ibaneadon.
Noḷagui minayá in Mesir
13Naonda intau mita in Mayusi minayádon, malaekat i Tuhan nokipogontong kon i Yusup kon bonu in togoindop bo noguman: “Pobangondon iko bo gamádon in Adí tatua takin ki iná-Nea bo dia, poḷaguidon kon butá in Mesir bo pogutunpa kon tua modapot in Akuoi bui mosingog kon inimu, sin ki Herodes moḷongasi motayak kon adí tatua bo ḻimodon”.
14Doḷompa doman tua ki Yusup nobangon bo nodia kon Adí tatua takin ki iná-Nea bodongka noḷagui minayá in Mesir. 15#Hos. 11:1 Bo nogutun kon tua, nodapot in ki Herodes minatoi.
Tua komintan nobaḻí sinbá motompodon onu in pinoguman i Tuhan kon nabi-Nea, nanaa: “Nongkon Mesir inoiní-Ku in ki Adí-Ku.”
Pinoḻimodan kon adí mita kon Betlehem
16Naonda in kinotaauan i Herodes kon sia aindon inakaḷan in intau mita in Mayusi tatua, sinumorú totok in sia. Manangka intua pinoki ḻimodnea in bayongan adí kon Betlehem bo kon ḻipú inta noyodiugneamai. Bayongan in adí inta nodapot in umur doyowa notaong, tua in sinantúnea podudui wakutu inta kinotaauannea nongkon intau mita in Mayusi tua.
17Tua in nobaḻí sinbá motompodon singog i Tuhan inta pinoyaput i Nabi Yeremia, nanaa:
18 #
Yer. 31:15
“Kinodongogandon in tombá kon Rama,
ombaḷ bo amui inta totok mokokuyang;
ki Rahel mongombaḷmai kon i adínea mita,
bo sia in doí dondouḷugan,
sin ki adínea mita in diá don.”
Nongkon Mesir minayá in Israel
19Naonda in ki Herodes minatoi, malaekat i Tuhan namangoidon bui nokipogontong kon i Yusup kon bonu in togoindop, bo noguman, 20“Pobangondon, gamádon Adí tatua bo dia takin ki iná-Nea bo bayádon kon butá in Israel, sin mosia inta moḻimod kon Adí tatua, ain minatoi.” 21Dá ki Yusup in nobangon domandon, ginamánea in Adí tatua bo dinianea takin ki iná-Nea bo minayá kon butá in Israel.
22Táe naonda in dinongognea kon ki Arkelaus in nobaḻí datu kon Yudea nomaḷui kon i Herodes ki amánea, noondok in sia in mayá intua. Táe malaekat in bui noguman kon inia kon togoindop, dá ki Yusup minayá in Galilea. 23#Mrk. 1:24; Luk. 2:39; Yoh. 1:45 Kon tua, sia nogutun kon ḻipú inta tangoinea in Nazaret. Tua komintan nobaḻí sinbá motompodon Pirman inta aindon pinoyaput i nabi mita, kon sia in tangoion, “Intau in Nazaret.”
Currently Selected:
MATIUS 2: INOMOG
Highlight
Share
Copy
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.