MALEAKHI 4
LAIGOR

MALEAKHI 4

4
Dulahu Eeya mamei dungga
1Tahuda lo Eeya Taa Laba-labaalo kawasa, “Mamei dungga dulahio ngoa̒amila taa sombongi wau moleeto tumbilalo debo odelo laato. To dulahee boito timongolio matumbilalo mopulito, wau diaaluo tao̒labita monto olimongolio. 2Bo to olimongoli taa modungohe ola-U̒, kawasaa-U̒ u mopoa̒ahu mamobutu mai debo odelo mato lodulahu, wau tinelio mowali mopoo̒oluli. Timongoli mamolopato wau meengahe debo odelo walao̒ sapi u boheli yilumualai monto lantunga. 3To dulahee boito Wau̒ mamohutu mai, wau timongoli mamopo olaaheo̒ tau-tauwalo tahileeta, tilinggula timongolio debo odelo peaahuo̒ u yilu-yilumbetaa̒ limongoli.
4Eelailo mola ngoa̒amila pongaajali lowato-U̒ tei Musa, eelai mao̒ bubuu-too̒waalo wau papaa-lentawalo uilohi-U̒ olio to Hui̒dee Sinai u dilungohe lo ngoilanggubu umati lo Isirai̒lu.
5Bo tou̒ diipo dulahee upolu-polutuo̒ wau moo̒tihela hapato u tilantu-U̒ boito meidungga, Wau̒ mamolao mai ode olemu ti Nabi Elia. 6Tio mamohutu mao̒ mongo dulaa̒ wau tau̒kekeei̒ motituwau lohilao, alihu Wau̒ diila monao̒ mai mopobinasa lipumu.”