MALEAKHI 3
LAIGOR

MALEAKHI 3

3
1Totametai lo Eeya Taa Laba-labaalo kawasa, “Wau̒ mamolao mai utoliya-U̒ u mopodapato dalalo ola-U̒. Yi wolo tumahuo̒lo mola Wau̒, Eeya tahe lolohu olimongoli, mamei dungga ode Belee-U̒. Utoliya-U̒ tahe wooloolo limongoli boito mamei dungga mai wau mopo malalumu daantiaa-U̒.”
2Bo tatoonu tamoo̒ taahangi todulahu Eeya dungga-dungga mai wau mopobilohe batanga-Lio? Sababu Tio debo odelo tulu lopani tamoo-powolangoa logamu, wau debo odelo sabongi lo tamoo-muboa̒wa. 3Tio mamei dungga u momutoo̒, debo odelo taa u mopobelesi wau mopo wolango talaa̒. Debo odelo ngotaalio pani lo logamu mopo wolango hulawa wau talaa̒, odi-odieelo mola utolia lo Eeya mopobelesi mao̒ mongo iimamu alihu timongolio mopodewo babaa-keyaalo wolo dudelo u kahandakia lo Eeya. 4Yi debo odelo tojamani muloololio mai Eeya mamo tuhatawa to babaa-keyaalo u pilodewo o-Lio lo umati lo Yehuda wau Yerusalemu.
5Tahuda lo Eeya Taa Laba-labaalo kawasa, “Wau̒ mamei dungga mai ode olemu u momutoo̒. Wau̒ mahua̒a mowali sakusi ode tahi posihiria, tau-tauwalo tahi pojinawa, tahemo sakusi wimbulo, tahe mohutu diila motulidu hale todelomo mongohi wuupa ode taa hewupaalo, tamodeehe mongo janda, tadidu otiilo otiyamo, wau tau deli, ode ngoa̒amila taa udiila mohulumati ola-U̒.”
Dewo ngotayade mopulu
6“Wau̒ulo Eeya, wau Wau̒ diila mobolio̒. Sababu uito timongoli, wali mai lei Yako, diila pobinasaalo. 7Debo odelo loluuhurumu muloololio mai, timongoli ngoa̒amila malo lambanga lonto bubuu-too̒o-U̒ wau diila tatapu wau molotolo hilao̒ moponao̒ mao̒.
Muli pohualingolo mai ode Olau̒, yi Wau̒ olo mamuli mohualingao̒ ode limongoli. Bo timongoli hemohintu, ‘Wolo u musi pohutuo lo mongowatotia u muli mohualinga ode Eeya?’ 8Botia Wau̒ mohintu mai olimongoli: Tingga mowali manusia mohimbulo to Allahu Taa̒ala? Tantuulo mao̒ diila mowali. Bo timongoli hemo himbulo ola-U̒ olo, Timongoli hemohintu, ‘Woloolo mola?’ Totametu-U̒ mai: Todelomo sua̒li momaayali ngotayade mopulu wau mongohi dewo. 9Ngoilanggubu bangusa hemo himbulo ola-U̒, yi timongoli ngoa̒amila mao̒tuhata lolaa̒nati.
10Delowaalo ngotayade mopulu limongoli ngoa̒amilalo ode Belee-U̒ alihu woluo ua̒alo laba-labaalo daata mola teto. Tesiyaalo Wau̒, yi timongoli mamoo̒onto deu̒ Wau̒ momuo̒ huhuu-hebuwaalo sologa wau mopoo̒daata mai daa̒ olimongoli wolo totoonulalo u mopiohu. 11Wau̒ diila tamo poluli mao̒ buhudu moporuusa tilapulo hutaamu; bubuu-ngowaala lo anggurumu mamopolu wau mobuheeto hungolio. 12Yi timongoli maloiyaalo sanangi tutu lo ngoa̒amila bangusa, sababu lipumu mowali tambati umopiohe upoti biluloa̒alo.”
Allahu Taa̒ala lodaantia mai odehu hilao̒
13 Eeya lotahuda, “Loloo-iyaamu boito otutu mohina ola-U̒.” “Bo timongoli mohintu, ‘Wolo uiloi̒ya lo mongowatotia pasali lo Eeya?’ 14Timongoli hemoloi̒ya, ‘Diila ohuna wambai̒o motaa̒luku wau mohulumati to Allahu Taa̒ala. Wolo hunalio olanto u moponao̒ uwajibu olanto ode Eeya Taa Laba-labaalo kawasa, meaala mopobiloheo̒ to Eeya deu̒ ito molee̒ to totalanto? 15Iloontonganto lohihilao deu̒ tau-tauwalo tahi sombongia sanangi tutu. Taa u moleeto diila bo heo̒duhenga mola maa̒mulu, bo olo wonu timongolio motesi osaabali lo Allahu Taa̒ala wolo huhutu u moleeto, timongolio molopata olo.’ ”
16Lapatao̒ tau-tauwalo tahi woohea to Eeya loloi̒ya ngota timongota. Eeya lodungohe wau lopoo̒tuoto wolo uiloi̒ya limongolio. Tau-tauwalo tahipo hulumatia o-Lio wau moohe to Olio, tiluladu mao̒ tanggulio todelomo buku daputali tuwau uwoluo totalu-Lio.
17 Eeya Taa Laba-labaalo kawasa lotahuda mai, “Timongolio mamowali umati-U̒. To dulahe Wau̒ mohutu mai, timongolio mamowali miliki tailo hilaa-U̒. Wau̒ mamomonu olimongolio, debo odelo ngotaalio lotiyamo motolia̒ngo walai̒o tahemo tiwato to olio. 18Umati-U̒ mamoo̒onto poli hiihedio wolota lotaa opaladu mopiohe wau taa opaladu moleeto, wolota taa u hemo tiwato to Olau̒ wau tadiila.”