Mark 16
16
Jisas watwi yaklauna kidika
(Mt 28:1-10; Lk 24:1-12; Jn 20:1-10)
1Yakurupdinin mani bayakna usnit kat, Mery Makdalen, Jims nanangni Mery dawak Salomé kauna kalpakwi kahnin dini walapni as bakakanna dai Jisas muihni nuhni kidika kahna atnin. 2Dawak sandi walsah ma tatuna yakat sau ū yakat pukkau uina dai, 3biri biri aput yulwi dakawinah:
—¿Sau ū pāni kungmak kau kipala sakkidika wais yakwi mayawarangyah?
4Kaunah tatalwakat, sau ū pāni kungmak yakat kipala nuhni as taihna sakdai kidika pāni yakat sak-awasdai. 5Sau ū pasyakat kakana kat, tingpal niningyakat muih al wahma as prak pihni kawi yalahna sakkat tatalna dai. Muih yayal balna kidika laih muihsakdadauna dai, 6kaunah witing yaklau diyulna:
—Manna muihsak dadauwinih. Manna laih Jisas Nazaret kaupak kidika waltamana, pan prihni yakat ilwi papana kidika. Watwi yaklauna; kaunah akat diski. Ahana dai kidika pāni yakat talnauh. 7Manna yawa disainipil balna yakat diyultanauh, dawak Pita yakat laih kalyultanama: ‘Witing laih tatuna Galilea yakat kiwarang ki manna karak dawakat;#Mt 26:32; Mk 14:28. kidika yakat kaltalnama, witing yaklau amput yulna dai kidika kaput.’
8Bahang yayal balna kidika laih sau ū kaupak kalahwi kikirana, dawak muihsakdauwi diyukna dai. Dawak muih as kau bik yul yuyulwas dai kat yamaduduwadai kidika yulni.#16.8 S.d. 9-20 kidika laih, tingkau ulna balna buas yakat diski. Ūk balna yakat laih kidika pāni yakat aput kalahwi: Yulni bulah karak, muih yayal balna yaklau Pita yakat dawak kaltalyang yayamni balna duwa yakat bik diyuyulna dai insal yaklau diyulna dai kidika yulni balna. Kidika usnit kat, Jisas witing palni yaklau disainipil balna munah sihna dai, ma kilwa kaupak ma kawa kat, laihwi yaknin yulni holi daukalwas ban kaput atnin kidika. Kaput karang.
Jisas Mery Makdalin yakatkalkalahna kidika
(Jn 20:11-18)
9[Sandi walsah ma tatuna yakat Jisas watwi yaklauna usnit kat, Mery Makdalen sitan tiaskaubu kangwi yakna dai kidika yakat tatuna kalkalahna dai. 10Yal kidika kiwi Jisas karak kalpakwi bang-atna dai kidika muihni kulninna bukwakat kaidabangdai kidika balna yakat diyulna dai. 11Kidika muihni balna witingna dakakawakat Jisas laih sangka kat, dawak yal kidika bik talnayang takat, rahm kukulwas dai.
Jisas disainipil balna bu yakatkalahna kidika
(Lk 24:13-35)
12Kidika usnit kat, Jisas watwi satuk kalahna dai disainipil balna bu di dahnin pāni niningyakat yakat lapakwi uiwa tulukat. 13Adika balna laih uiwi ūk balna yakat diyuyulna dai; kaunah witingna yakat bik rahm dikukulwasdai.
Jisas yaklau apostel balna yakatyamnin diyulna kidika
(Mt 28:16-20; Lk 24:36-49; Jn 20:19-23)
14Kidika usnit kat, Jisas laih disainipil balna 11 kidika tibil yakat yalahna bangkat kalahna dai. Dibilna dai rahm kulnin lani dis dawak tunanina dadasni kidika yulni, kat watwi yaklauna kidika muih balna talwi diyuyulwakat rahm kukulwas dai bahang. 15Dawak aput diyulna: “Manna sau bitik yakat yawa muih balna bitik yakat diyultanauh laihwi yaknin yulni kidika.#Ap.w 1:8. 16Angdika muihni rahm kulwi was kal-utuhwi kalahwarang kidika laih, kallaihwi yakwarangki; kaunah angdika muihni rahm kulwas kidika laih, dauna karang. 17Dawak adika sainni balna witingna karak karang rahm kukulwarang muihni balna kidika: yang ayangki kau duwi sitan balna kangwi yayakwarang; yulni wisamni yuyulwarang; 18bil balna kidika yakat tingnina kau lalaihwarang; dawak di dutni didiwarang bik, dutni diyamwas karang; baisa kidika minityakat siknis muihni balna kidika minitna yakat tingnina dulalauwa kat sikninanis kaupak yamni diyamna karang.”
Jisas kisang yakat kilwi kiuna kidika
(Lk 24:50-53)
19Yuldibauna usnit kat, Dawan Jisas kidika laih makau kisang#Ap.w 1:9-11. yakat kilwi kiwi Papang tingnipal niningyakat yalahna. 20Witingna laih kalahwi yul kidika pa balna bitik yakat yuyulna; dawak Dawan yaklau ilp diawadai, dawak yul kidika rahm yulwadai taldas sainni balna karak libitwi.]
Currently Selected:
Mark 16: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998