Luk 1
1
Tatuna
1Muih mahni palni uhulna mayang mapas kingyakat di kalahna balna yulni umani kidika, 2muih balna yaklau amput maisumamalna dai kidika kaput, dawak tatuna kaupak talwinah, yul yamni kidika yulnin warkni dudunadai. 3Yang Teófilo#Ap.w 1:1. yamni palni yang adika bik, tatuna kaupak waltik talnayang, dawak yamni talnayang adika dini balna adika pāni kat kat maulna atnik, 4kaput laih man yamni amanglana atnam di rahm masumamalna kidika.
Insal as yaklau Jan muih was utuhyangbatahnna kat yulna kidika
5Herod witing Judea kingni dai mani yakat, sumalyang as yalahwadai ayangni laih Zacarías, witing laih Abías sulani paskaupak dai.#1 Cr 24:10. Yalni ayangni laih Isabel,#1.5 Isabel: ispayul kau laih kaput ki; Elisabet grik dawak latin yulni kau laih kaput ki. kidika laih Aarón sulani dai. 6Witingna laih la kat dai Papang muhni yakat dawak Dawan lāni balna kat dakakawadai, kaput bahang muih as bik sip witingna dutnina yuyulwasdai. 7Kaunah witingna walabis dis dai, kat Isabel sip duwasdai kidika yulni; baisa kidika minityakat, witingna laih uman muihbararak kakalna dai.
8Ma as kat Zacarías sumalniyang balna uduhna as kidika Papang muhni yakat wark yamnin dibukna dai, 9kidika laih sumalyang balna pasyakat ninihng kaput yayamwadai, Zacarías yakat suerte kalbukna dai Dawan ūni holi pāni yakat kawi walapni yamni kidika busna atnin. 10Witing laih walapni yamni kidika buswa kat, muih balna mahni kidika laih ahni yakat minitna yulwabangdai. 11Kidika yakat Dawan innisal as Zacarías yakat kalkalahna, kidika laih sakripais walapni busnin pāni kaupak tingpal nining yakat kasakni sakdai. 12Zacarías witing insal yakat talna mani kat, amangnilawas danadai dawak bik uba palni yamaduna dai. 13Kaunah insal kidika yaklau kalyulna:
—Zacarías, yamaduwinih, kat Papang laih man mamatyulnaman kidika dakana, dawak yalma Isabel yaklau walamabis as mawarangki, kidika ayangni laih Jan pakma ki. 14Man laih alasna awamaki dawak muih balna mahni bik witingna alasna kalalahwarang ki witing batahnna yulni, 15kat man walamabis kidika laih Dawan muhni yakat nuhni palni karangki. Witing laih wain dawak wasak bik diwas karang ki,#Nm 6:3. kaunah Spirit yaklau kalbangna karangki baisa batahnwas tanitkauh. 16Witing yaklau yamwakat Israel ninisan balna mahni palni Papangnina Dawan yakat wiryaklalana karang. 17Adika Jan laih Dawan tanityakat kiuna karang, spirit karak dawak prapit Elías parasni karak bik, papang balna kidika dawi walabis balna karak watwi yamni diyakna atnin yulni#Mal 4:5-6. dawak muih kulninna dudutni balna kidika laih yul kat dakana atninna. Kaput karak laih tawan yakat ridi yamna karang Dawan kaiwakat duna atnin.
18Zacarías yaklau insal yakat kalyulwi dakana:
—¿Yang amput rahm kulkiyah adika dini? Kat yang laih uba palni muihbarakyang dawak yalki bik sihm muihbarak ki.
19Insal kidika yaklau nangnitlana:
—Yang kuduh Gabriel,#Dn 8:16; 9:21. dawak yang laih Papang dini yamtayang; witing yaklau yasihna man karak yulbauna atnik dawak adika yulni yayamni balna adika bik mayulna atnik. 20Kaunah waralaih, yul balna mayulnayang kidika rahm kultasman dai bahang, tubi kalma ki; sip yulbautas awamaki, angkat mani adika dini balna bitik kalahwarang kat.
21Kaput bahang, muih balna kidika laih ahni yakat Zacarías tani-awi biri biri yulwi dakawabangdai ais yulni holi pāni kaupak sirihni kalahwaspa. 22Kalahna mani kat, sip yuldibauwas dai; bahang witingna amanglalana dai holi pāni yakat sahmuhni amana kapat talna kidika, bahang witing laih sain kau manah yuldibauwādai; dawak sip yulbauwas, kaput manah tanityakat kiunadai.
23Warkni balna kidika witni kat kiuna mani kat, Zacarías laih ūni kau kiunadai. 24Kidika usnit kat, yalni Isabel kidika laih muihkaruk danadai, dawak waiku singka pasyakat ūni kaupak kalahwasdai, aput kulwīnah: 25“Waralaih Dawan yaklau adika aput yayamna, muih balna yaklau dutni yāyamnin awas yulni.”
Insal as yaklau Jisas batahnin yulniyulna kidika
26Waiku tiaskauas laihwa yakat, Papang yaklau insal Gabriel kidika sihna dai Galilea tawanni as ayangni Nazaret yakat, 27yal as baisa al karak kalpakwas ayangni laih Mery yakat kaltalna kiuna atnin, kidika yalni laih king Devid sulani kaupak muih al as ayangni José karak kaldunin pramis kalahna dai.#Mt 1:18. 28Insal kidika laih muih yal sakdai kidika pāni yakat ka'kiwi aput kalyulna:
—¡Maparastayang, Papang yaklau yamni matalna! Dawan laih man karak ki.#1.28 Tingkau kau ulna balna as as yakat laih aput minitlalakwi: Papang yaklau yayal balna bitik pasyakat man kauh baisa blis mayamna.
29Insal yakat kaltalna mani kat, yulni balna yulna kidika dakawi amanglawasdana dai, dawak witing alas kalyulwi dakawadai kidika parasnin lani kidika ais tankapa. 30Insal kidika yaklau kalyulna:
—Mery, man yamaduwinih, kat man laih Papang ilpni dutaman. 31Waralaih man muihkaruk kalmaki: walabis al as duma ki, dawak witing ayangni laih Jisas pakma.#Mt 1:21. 32Witing laih muih al nuhni karang, Papang makau sakkidika Walanibis kalatwarang kidika, dawak Dawan Papang yaklau king kalyamna karang, sihm witing muihnibarak Devid kau kalyamna dai kapat, 33kaput laih Israel ninisan yakat ban kaput king kana atnin yulni. Witing kingni lani kidika laih saran diskarang.#2 Sam 7:12,13,16; Is 9:7.
34Mery yaklau insal yakat kalyulwi dakana:
—¿Amput adika dini kalahwarangyah, yang muih al as karak bik yalahtasyang adika?
35Insal kidika yaklau nangnitlana:
—Spirit Holi kidika laih man mamatyakat kaiwarangki, dawak Papang makau sakkidika parasni kidika laih man mamatyakat sihm mukus kapat kaiwi watwarangki. Kidika bahang, muihbin batahnwarang kidika laih Holi dawak bik Papang Walanibis pakna karangki. 36Man wanaihma Isabel kidika bik walabis al as dawarangki, witing laih muihbarak kaunah; walabis yaknin sip-awaski kalatwadai kidika, witing laih muihkaruk dana kaupak waiku tiaskauas duwi. 37Papang niningyakat laih di as bik sip-awas laih awaski.#Gn 18:14; Jr 32:16,27.
38Bahang Mery yaklau yulna:
—Yang laih Dawan warauni yang; bahang Papang yaklau yang yakat ais yamnin yayulna kidika yamwang.
Kidika yulni karak insal laih kiunadai.
Mery yaklau Isabel yakat kiwikaltalna kidika
39Kidika mani balna yakat, Mery laih sirihni palni tawan as kau kiunadai, Judea sauni asang manas yakat, 40dawak Zacarías ūni yakat kawi Isabel yakat kalparasna dai. 41Isabel witing Mery yaklau kalparaswa yulni kidika dakana mani kat, muihbin kidika laih witing bani yakat kalitikna dai, dawak witing laih Spirit Holi yaklau kalbangna dai. 42Bahang yulni parasni aput yulna:
—¡Papang yaklau muih yayal balna bitik pasyakat man kauh baisa blis mayamna, dawak walamabis kidika bik blis kalyamna!#Jue 5:24. 43¿Yang adika waisyang, Dakiwan nanangni kaiwi yatalna atnin? 44Man yaparastaman kidika sirihni palni dakanayang bahang, yang walakibis kidika alasna duwi bāki pasyakat kalitikna. 45¡Yamni palniki Dawan yaklau di yamnin balna mayulna yakat rahm kulnaman kidika!
46Mery yaklau yulna:
“Yang solki kidika laihDawan nuhni kidika yakatayangni nuhni yamwi;#1 Sam 2:1-10; Sal 113:5-9.
47yang spiritki kidika laihyang Papangki yalaihwi yakyang yakatalasna ki.#Is 61:10.
48Kat Papang yaklau witing minikpa kidika
yang yakat yatalna kidika yulni,
witing warauni minikunni kidika,
dawak waradika kaupak alasna ismanglakmuihniman yatwarang ban kaput;
49kat parasni bitik duwa kidika
yaklau yang yakat di nunuhni yamna kidika yulni.
¡Witing ayangma kidika laih holi ki!
50Papang laih dalani lani kidikaban kaput atnin duwi
angdika muihni balna yaklauwiting yakat rispik kalyayamwa balnakidika yakat.
51Witing parasni bitik karak di yamna:
witingnamanah kapat kaldakakawamuihni balna warknina kidika laihdismukna,
52king balna kidika laihtronnina kaupak lakmukna
dawak muih miniknakunni balna kidikalaih mayakat ilna.
53Yuh wawauhwa muihni balna yakat laihdi yayamni diana
dawak di duyang balna yakat laihtingnina pāni manah disihmukna.
54Israel tawanni yakat ilp kalana,witing warauni yakat,
dawak dalani didakawa kidika laihdinitkahwasdai.
55Kaput pramis diyamna dai mayangmamuihkibararak balna yakat,
Abraham#Gn 17:7. yakat dawak sulani balnakalalahwarang kidika yakat bik.”
56Mery laih Isabel karak waiku bas kalpakwi raudai, dawak kidika usnit kat ūni yakat nawatwi kiunadai.
Jan muih was utuhyang batahnna kidika
57Isabel witing muihbin dunin mani kiwi kana mani kat, walabis al as duna dai. 58Witing yaihnit muihni balna dawak wanaihni balna bik uiwi alasna lani kalalana dai Dawan yaklau witing karak yamnidai kidika dakakana kat. 59Ma tiaskaubās laihwa yakat, muihbin kidika laih Papang sainni ānin duwi uina dai,#Lv 12:3. dawak witing papangni ayangni Zacarías kaput paknin kukulna dai. 60Kaunah nanangni yaklau yulna:
—Dikah. Witing ayangni laih Jan paknin ki.
61Nangnitlalana:
—Man wanaihma balna pasyakat muih as bik diski kidika ayangni kaput.
62Bahang muihbin papangni yakat sain kau kalyulwi dakakana, muihbin ayangni kidika amput paknin dukih kalawa kidika amanglana atnin yulni. 63Papangni kidika laih tat labanni as yulna kidika yakat ulna atnin, dawak aput ulna: ‘Witing ayangni laih Jan.’ Dawak muih balna bitik laih yamni tatalna dai. 64Kidika minitni yakat Zacarías witing watwi yulbauna, dawak Papang yakat ayangni nuhni yamna dai. 65Witing yaihnit muihni balna bitik laih amanglalawasdai, dawak Judea sauni asang balna kidika bitik yakat ais kalahna kidika yuyulna dai. 66Muih balna dakakawa kidika bitik biri biri aput yulwi dakakawadai: “¿Adika muihnibin ais kalwarangpah?” Kat rahm palni Dawan laih witing parasni kidika manikingkawadai muihbin ilpni yakat.
Zacarías unbauna
67Muihbin papangni Zacarías kidika, Spirit Holi kau kalbuhng dawak Papang ayangni kau yulbauwīnah, aput yulna:
68“¡Dawan laih ayangni nuhniyamnaki, Israel Papangni,
kat witing laih tawanni yakatlaihwi yakna kaina!
69Mailaihwi yakyang muihniparasni nuhni duwa asmaisihna,
witing dini yamyang Devid sulanikaupak as.
70Adika ki muhnilaukau pramisyamna dai kidika
witing pranipit holi balna munah:
71mayang manikingkauh yaklalauwamuihni balna kaupakmailaihwi yakwarang kidika
dawak dutni maiyayamwa balna bitikkaupak bik,
72mayang mamuihkibararak balna yakatminiknakun ditalwarang kidika
dawak witing pranimis holi yakatdinitkahwas karang kidika.
73Dawak adika ki pramis yamna dai kidika
mapapangki Abraham yakat:
74mayang manikingkauh yaklalauwabalna kaupak mailaihwi yakwarang kidika,
di as bik yamadudas witing diniyamna atnin
75dawak witing muhni yakat barangnidawak bik holi atnin
masangkika bitik yakat.
76Man namangkauh laih,yang walakibis bin,
Papang makau sakkidika pranipitmapakna karang,
kat man laih Dawan tanityakatyawama bahang
witing tani balna kidikaridi yamtinah,#Mal 3:1.
77witing tawanni kidikaamanglana atnin
Papang yaklau witingna dutninadawak diswa kidika
dawak laihwi yaknin lani bikdiawa kidika.
78Kat mayang maPapangki,
witing dalani lani nuhni duwakidika munah,
mayakaupak ma wisamni as duai'mayawi,
79yaringni diana atnin yulni
puksani pasluihni yakat yalalahwabalna yakat,#Is 9:2.
lapakda balna kidika yakatmatakituna kana atnin
kulnin aslah tani munah.”
80Muihbin kidika laih barakwadai dawak spiritni niningyakat bik parasni kalwadai, dawak kauhmak wanilang yakat yalahna dai Israel muihni balna muhnina yakat kalahna kat.
Currently Selected:
Luk 1: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998