Miqueas 7
7
Israel dutni yamna
1¡Alakaih yang! Muih watwi walwa kapat ki
di minik bahwi dulauna usnit kat,
wain minik dawak ani damni minik bik yakwas kapat,
kidika minik balna kasnin kalana dai kidika.
2Sau akat baisa diski
muhni barangni balna kidika Papang yakat;#Sal 12:1.
bitik laih kidika minitni yakat manah tahahawi
kalbaunin lani kidika;
biri biri malnikau laihnin dini kidika ahawi.
3Kidika balna laih maestro, dutni yamnin;
wark tunan nuhni balna kidika minitna yuyulwi,
wihta balna kidika dadawak tanina duduwi,
parasni duyang balna kidika ais yamkih kidika yayamwi
tawan nuhni kidika daukalpapamna.#7.3 Tawan nuhni kidika daukalpapamna: kaput kidika yamni wirlana. Hibru kau laih amangladas ki.
4Witing pasyakat tanit yamni kidika laih pan ukuning as kapat ki;
dawak tanit alas yulwas kidika laih pan wakalni duwa kapat ki.
Kauna mani balna kaiwi, lanina yamnin,
makau kilwi maintalwa muihni yulwarang mani kat.
Kaput laih witingna pasyakat pini sinsnina diswarang.
5Man wanaihma yulni dakawinih,
dawak man kaltalyang muihni yamni dutaman kidika yulni dakawinih,
kaput bik man yalma karak yulbauta man kidika bik ismang aitah.
6Kat walanbis balna kidika papangni yakat sarahni tatalwa bahang,
walaninabis yayal balna kidika nanangnina niningkauh yaklauwi,
walaninabis balna yalnina kidika uninasah yal niningyakat yaklalawi,
dawak witingna waihninala balna kidika laih kalwanaih balna pasyakaupak kalahna.#Mt 10:35-36; Lc 12:53.
7Kauna yang laih Papang yakat tahaki ki;
yang tahanik kidika laih Papang yakat ānayang, yalaihwi yakyang yakat,
kat witing laih yadakana karang.
Israel yaklauwi minit bayakna
8Yang waihkila balna alalaswi dutniyang kidika yulni,
buknayang kauna lawaki ki,
yaihkit kidika puksani manah ya-awaihki,
kauna Papang kidika laih yaringni yawi.
9Papang niningkauh dutni yamna yang.
Kidika bahang witing kulnin daukalwa kidika wauhna awaki,
kaput laih witing yang laki yamna karang,
la kat Papang yaklauwi yaringni yakat yaduwi kiuna karang;
dawakat witing minit bayakwa kidika nikingkawarang.
10Yang waihkila bik talnakarang,
dawakat kidika asalni kalahna karang.
Witing yayulwādai: “¿Angkat man Damawan, Papangma sakyah?”#Sal 79:10; Jl 2:17.
kauna waradika laih talkih talki ki
tapas kau sau atatakwa kapat.
11Jerusalén mani balna dai kaiwi,
watwi daklana balna dai kidika laihwi dulauwi yamna atnin,
dawak sauma pāni kidika baisa nuhni duna atnin.
12Mani balna kaiwi,
pa balna bitik kidika man yakat manah aiwarang:
Asiria kaupak Egipto kat,
Nilo wasni kaupak éufrates wasni kat,
kuma as kaupak kuma ūk kat, asang as kaupak asang ūk kat.
13Sau kidika kauhmak wanilang yamna karang,
muihni balna dutni yayamna kidika yulni,
dutni yayamna kidika kaput kaiwi kalahna.
14¡Dawan, tawanma kidika main talah,
man sīpma, dima balna kidika,
witingna manah bangki asangpas yakat,
sau yamni pasyakat yakat!
Duyawah, ma bayakna balna dai kaput,
Basán dawak Galaad sirhnisihr yakat.
15Diatangkat, di yamni yaksihni kidika tatalwang,
Egipto kau yaknaman mani dai kaput.
16¡Nisan balna ūk kidika bik tatalwang,
dawak asalnina bik dudurang
parasma nuhni duwa karang bik!
¡Tubi, dawak, tappuk kapat kakalwang!
17¡Bil kapat sau yahamni uhukwarang
kidika awasbik bil satuk balna kapat!
¡Panina sulihni kaupak diyukwīnah kalalahwang
muihsak manah uiwang
man yakat, Dawan, yangna Papangkina!
Papang witing tawanni dutni yamna kidika dawak diswi
18Papang ūk diski man kapat,
kat man laih dutni kidika datang diswi,
kulninna dutni ahanwa kidika bik datang diswi
man tawanma sutni bulah bin adika.
Man dalani lani dutaman kidika manikingkataman,
kulnam daukaltaman kidika ban laihta dutas man.
19Watta yangna akat miknakun yanatalah,
dawak madutki balna kidika sau yakat nutah.
Yangna dutkina kidika ruhmta
kuma tuhni yakat.
20¡Dawan, barangniman dawak dalani lani kidika ban maiduta,
sara mani balna yakat pramis yamnaman dai kidika
muihkinabararak balna Abraham dawak Jacob yakat!#Gn 12:1-3; 17:6-8; 28:13-15; Lc 1:55,73.
Currently Selected:
Miqueas 7: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998