Miqueas 6
6
Papang kalbilna Israel nining kauh
1Manna dakanauh, waradika Papang di yulwa balna kidika:
“¡Lawaman yulma balna kidika asang yakat diyulta,
dawak asang balna kidika man yultaman kidika dakakana karang!”
2Asang balna manna dakanauh, sau rahni parasni mana kidika;
Papang kidika witing tawanni lani yamwarangki,
dawak Israel niningkauh kalbilna karangki.#Is 3:13; Os 4:1; 12:2.
3Adika Papang yulwi:
“Yang tawanki nangkitlata,
¿ais mayamnayang, kidika awaskat, ais yakat mausnayang?
4Egipto kaupak mayaknayang,#Ex 12:50-51.
warau tingni kaupak malaihtik yaknayang;
Moisés, Aarón#Ex 4:10-16. dawak María,#Ex 15:20.
sihnayang witingna kidika tamanatuna duduna atnin.
5Yang tawanki, waradika manna ismangna aitanauh,
Moab kingni Balac witing ais yamnin kulna kidika,
dawak Beor#Nm 22—24. walanibis Balaam yaklauwi ais kalyulna kidika.
Ismangkatta man Sitim kaupak Gilgal#Jos 3:1—4:19. yakat lawanama kidika,
dawak Papang kalbauwi minit bayakna balna yakat talah.”
Papang, witing muih al kaupak tahawa kidika.
6¿Ais kau dutik yawakiyah ayangni nuhni yamnin
Dawan, Papang makau sakkidika yakat?
¿Witing muhni yakat yawakiyah turuh ahalmuk kurih as lalaihna kidika karak,
sakripais karauni kauna buswa kidika yamtik kalanik?
7¿Papang kulnin alasna kalahwarang,
sīp ahalmuk tausin kalaki kat
kidika awaskat disala was murwa kapat kat tausin salap kalaki kat?
¿Kidika awaskat walakibis tatuna kidika kalaki kat
dutki balna yamnayang kidika yulni minitlautik kalaki kat?
8Dawan yaklauwi uman mayulna, muih al,
ais kidika di yamniyah
ais tahawi witing kidika man kaupak dunin:
la kat yamtah, barangni awah
Papangma yakat yulni dakah kulnam mamakun.#1 Sam 15:22; Pro 21:3; Os 2:19-20; 6:6; Am 5:22-24; Zac 7:9-10.
9Dawan kidika tawan nuhni yakat kalyulwa sakki,
sins tuhni duwi, rispik karuk kaldakanin:
“Dakanauh, tawan, dawak, muih la sumalyang balna:#6.9 Tawan, dawak, muih la sumalyang balna: kaput ulna kidika yamni kapatki. Hibru kau laih amangladas ki.
10Muih dudutni ūni yakat malna ritsni sakki,
paun kau mamalna kidika dutni talayang.
11¿Amput dutni kidika dating diswarangyah,
di balna kidika paun kau āwi muih balna yakat taihwa kidika?#Lv 19:35-36; Dt 25:13-16; Am 8:5.
12Adika tawanni nuhni paskau di duyang balna kidika laih muih taihyang balna,
dawak alas yulyang balna, kaput bik muih bitik laih alas lani manah yayamwi.
13Kidika bahang wah makiki,
dawak madaukalpamki ki, man dutni yamnaman kidika yulni.
14Kasma kauna ismanglak-awas karang, bahang man yuh wauhma,
kasnin dini balna kidika uduhta duma,
kauna di as bik laihta yaktas awama,
dawak laihta yakma karang kat wār yaklauwi laih daukalna karang.
15Dahma kauna minik yaktas awama olib minik kidika tikma kauna salani yaktas awama,
kaput bik wain minik kidika atakma kauna wasni laih ditas awama.
16Ais yamta usnit uinamahn sumalna balna dawak yamna balna kidika
Omri,#1 Re 16:23-34; 21:25-26. dawak Acab sulani balna,
witingna yayamna kapat man bik yamnaman.
Kidika bahang man yakat mayamki dawak muihma balna yakat bik
muihsak daunin dawak sarahni bik,
yang tawanki asalni kidika man mamat yakat bukwarang.”
Currently Selected:
Miqueas 6: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998