Jonás 3
3
Nínive kulnin wirlawi
1Papang watbu Jonás yakat kiuna, dawi kalyulna: 2“Yawah, Nínive tawanni nuhni yakat, dawak ais mayulki kidika yulma.”
3-4Jonás mahka lapakwi kiuna Nínive tawanni yakat, Papang yaklauwi pakna kaput. Nínive tawanni laih nuhni palni dai, kidika bitik awaihwi lanin kat ma bās lapaknin dai. Jonás kidika pasyakat kawi lapakna ma as, bahang parasni yulna: “¡Ma muihasluih bu pasyakat Nínive laih dispamna karang!”
5Tawanni muihni balna kidika nuhni kaupak dibin kat Papang yakat kukulna, di kaswas dawi krukas prakni kat kakana dalani wawauhwa kidika tannika.#Mt 1 2:41; Lc 11:32. 6Yul kidika Nínive kingni dakana kat, witing yalahwa pāni kaupak yaklauwi witing king prakni kawa kidika yakpamwi krukas kat kawi sau yakat yalahna. 7Usnit kat, king witing yaihnit kau muih nunuhni balna duwa dai kidika balna karak la awi muih bitik yakat diyuyulna: “Muih as bik di kasnin awas ki. Dawakat kaput bik tuninaruh balna kidika di bayahnin-awas, dawak was bik bayahnin awas, sīpnina balna bik sihm kaput. 8Nawatkauh laih, manna bitik krukas asnina kau awanauh, dalani wauhwa sainni, dawak parasmana bitik kau Papang yakat yultanauh. Manna bitik kau dutni yamtamana kidika datanauh, kulnamna yakat kalbaunin lani dutamana kidika bik warmani kat; 9sipkat Papang kulnin wirlawarang, dawak kulnin anna kidika dawarang, dawak kaput laih daudas malawarang.”
10Papang talna dai Nínive muihni balna yayamwa kidika, amput dutni yayamwa dai kaupak dadawa kidika, dawak kaput laih dutni diyamnin yulna dai kidika yamwas dana.
Currently Selected:
Jonás 3: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998