Jonás 2
2
Jonás minit yulna
1Kaput laih Jonás minit yulna Papang yakat, waspadini bānipas kaupak, 2kaput yulna:
“Kulnik kaida pasyakat man yakat mayulnayang, Papang,
dawak man nangkitlana man.#2 Sam 22:7; Sal 18:6; 120:1.
Dauna pāni tuhni kaupak
man yakat mayulting kat yadakanaman.#Sal 130:1; Lm 3:55.
3Kuma tanit tuhni yakat yaruhm'anaman,
dawak was murwa kidika yakat yahana.
Was nuhni lalamwa balna sihnaman kidika
yang mikit munah bayakna.#Sal 42:7; 88:3-7.
4Yang kaldakanayang man kaupak naikau yayakpamnaman;#Sal 31:22.
kulnayang, yang wattik man uma maisihni dis kidika talas awaki.
5Was kidika bitik laih mikityakat dai;
kuma tuhni kidika yang mikit yakat dai
tunaki yakat dibasta balna kidika widitna dai.
6Tuhni nuhni#Sal 69:2. pasyakat āyawanayang dai;
¡silak yahanaman kidika ban kaput awaki kulnayang dai!
Kauna man Papang,
kidika kaupak yalaihta yaknaman dai daunin kaupak.#Sal 30:3.
7Yang ising aiting sangkika kidika mahka kalahkiwak,
Papang man yakat isingkatna dai;
yang mikit yulnayang kidika man yakat kiuna uma maisihni dis yakat.
8Dawan dauh yakat usnit uiwa balna kidika
man lama yakat uiwas ki;
9kauna yang laih, yang dikit yamni kau
man yakat sakripais buski ki;
yang pramis yamnayang yakat yamki ki.#Sal 22:25.
¡Papang man manah sip man yalaihta yaknam!”
10Kaput laih Papang yaklauwi pakna, waspa dini kidika yakat, Jonás kidika buhni yakat ilwi tiningyakna atnin.
Currently Selected:
Jonás 2: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998