Génesis 50
50
1Kaput laih José witing papangni yakat wakaihna, kaidīnah muhni yakat umna. 2Dawak usnit kat witing yaihnit kau daktar balna duwadai kidika yakat diyulna, witing papangni Israel muihni kidika daukalwas atnin sinika kahnin diyulna, bahang witingna kaput yayamna dai. 3Bahang witingna kidika sinika kakahna kidika ma 40 kat kahwi dadanadai, kat ma kaput praisni kat warkni kidika yamwi danin dai bahang.
Dawak Egipto muihni balna kidika kulninna bukna dudunadai ma 70, 4dawak kulninna bukna kidika bayak dawakat, José witing yuldibauna dai fero ūnikau muih bangdai kidika balna yakat:
5—Yang papangki daunin manah yakat yayulwak pramis yamnayang, witing kidika nuna atnik witing silp sau-ū yamna yakat, bahang kidika laih Canaán sauni yakat sakki.#Gn 47:29-31. Kaput bahang yang manna yakat manayultayang yadatanang kat yawik papangki kidika nukuh; kidika nuki usnitkat yang aiwaki.
6Dawak Fero yaklauwi nangnitlana:
—Yawa papangma kidika nutah, witing yaklauwi mayulna kaput.
7Dawak José witing kiwi papangni nuna, dawak Egipto yakat fero ūni kau tunan muihni balna bangkidika bitik José yakat minikdawi uinadai, 8Jacob sulani balna, José sulani balna, wirahni balna bik. Gosén yakat walabis manah dawak tinglau balna bik damukwi uinadai. 9Kaput bik laih muih balna ūk bik aras kau kar sitwi murwa kapatnah kau bik uinadai José yakat minikdawi, kaput bahang muih kidika laih mahni palni dai. 10Goren-ha-atad yakat uiwak, bahang kidika laih Jordán wasni makilwa niningyakauh ki, kidika yakat watwi kakaidana, dawak José laih witing ma tiaskaubu kulnin bukna dai.
11Dawak cananeo balna kidika pāni yakat yalalahwadai kidika talwi yuyulna: “Egipto muihni balna muih dauna kat nunin yulni risnipik nuhni karak yayamwi.” Kaput laih kidika pāni ayangni papakna Abel-mizraim#50.11 Hibru kau, Abel-mizraim tanka laih Egipto muihni balna panina, yulni kidika sihm kapat yulwi Egipto muihni balna kulninna bukna. kidika pāni laih Jordán wasni kidika makilwa niningyakat pakki.
12Jacob walanbis balna papangnina ais diyulna yakat yayamna, 13Canaán yakat duwi uina dawak Macpela sauni kau pasulihni yakat nununa, Abraham bakanna dai Hitita muihni Efrón kaupak, kaput laih kidika pāni sulihni kidika witing sulani balna bitik dinina atnin. Kidika sauni dawak pāni sulihni kidika laih Mamre kaupak makilwa niningyakauh sakki.#Ap.w 7:16. 14Dawak papangni nuwak usnit kat, José watwi wirahni balna karak nawatwi Egipto yakat kiuna, witing karak kalpakwi uina muihni balna bitik karak.
José mani witni yakat
15Jacob kidika dauna bahang José wirahni balna kidika kukulna: “Sipki José kidika mayang akat dutni maikulnin, bahang kaput laih mayang malawi dutni kalyamnamayang kidika bitik yulni biriwi maiyamnin.” 16Kaput laih aput yul kalsisihna: “Papangma dauwas tanitkauh witing yaklauwi yanapakna 17mayulna atnikna: ‘Plisma wirahma balna dutnina kidika datang diswang, dutni mayayamna kaunah.’ Kaput bahang man kalma dinit yakat bukdi mayuldi dutkina datang diswang, yangna laih papangma Papangni dini yamyang yangna.”
Yul dukiwa muihni kidika kalyulwi dawas baisa kalyulwasak kat, José kaidana dai. 18Kaput laih wirahni balna palni uiwi witing muhni yakat limbabahwi muhnina sau kat lakwi, dawi kalyuyulna:
—Man yanadutaman akat. Yangna laih man dima yamyang yangna.
19Kaunah José biriwi diyulna:
—Yamaduduwinih. Yang sip-awasyang Papang pāni yakat awinik. 20Manna dutni yamnin kulnamana, kaunah Papang yaklauwi dutni kidika yamni yakat wirlana, kidika laih yamna atnin warmani talda kidika: muih mahni sangnika laihwi yakna atnin yulni. 21Kaput bahang yamaduduwinih. Yang lawik manabayahki ki dawak manna walamanabis balna kidika bik bayahki ki.
Kaput laih José yaklauwi walanina āna, kat minikun talnin yulni karak yuldibauna dai bahang.
José dauna
22José dawak witing papangni sulani balna karak ban Egipto yakat yalalahna dai. José witing kurih 110 sangka dai, 23dawak Efraín buhni balna bik talna dai. Kaput bik laih witing mani Maquir walaninabis balna bik laih duna dai, kidika laih Manasés walanibis dai.
24Mani as kat José yaklauwi wirahni balna yakat diyulna: “Yang laih daunik manah ki, kaunah Papang kaiwi ilp manawarang, dawak adika sauni kaupak manayakwi pramis sauni yakat maduwi kiwarang, Abraham, Isaac dawak Jacob yakat pramis diyamna dai kidika.” 25Dawak kaput laih diyamna Israel walanibis balna kidika pramis kalyamna atnin, bahang diyulna: “Rahm kidika laih Papang kaiwi ilp manawarang ki. Kidika kaput kalahwarang mani kat manna yang wakalki balna kidika duyawanamna karang.”#Ex 13:19; Jos 24:32; Hib 11:22.
26José Egipto yakat dauna kurih 110 laihna mani kat, dawak witing muihni kidika, muih dauwak dia kakahwa dini kidika kau muihni bitik kakahna dai, dawi baksni payakat ahana dai.
Currently Selected:
Génesis 50: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998