Génesis 48
48
Jacob yaklauwi Efraín dawak Manasésbalna yakat blisin diawi
1Ma bulah bayakwak José yakat kalyuyulna, papangma siknis ki. Kaput laih José witing kiwi talna, dawak walanbis balna bu kidika duwi kiuna, Manasés dawak Efraín karak. 2Jacob yakat kalyuyulna, witing walanibis José kidika kaltalna kiuna, dawak witing ban traitalwi yaklauwi yalahna pa yakat. 3Dawak José yakat kalyulna:
—Papang parasni nuhni duwa kidika yang akat lāih kalahna Luz tawanni nuhni yakat, Canaán sauni yak, dawak blisin yana 4adika yulni balna karak: ‘Talah, yang lawik yamtingkat walamabis mahni duma, dawak man sulama balna kidika nisan as kalna karang. Dawak baisa minit yakat, man sulama balna yakat diana awaki adika sauni.#Gn 28:13-14. Bahang witingna nining yakat ban kaput atnin karang.’ 5Man walambis balna Efraín dawak Manasés, witingna Egipto akat batahndadana kidika, yang adika sauni akat aiwik man karak kalpaktasyang tanit kauh, witingna kidika laih yang diki balna. Witingna kidika laih yang diki balna palni ki, sihm Rubén dawak Simeón kapat. 6Adika balna usnit yakat man walamabis ūk duma kidika laih man dima karang, Efraín dawak Manasés wirahni balna bahang witingna bik, dinina pahni balna kidika duduna karang. 7Yang Padan-aram kaupak nawattik aiwingkat, man nanangma Raquel kidika dauna Canaán yakat, Efrata yakat yawik āwasyang tanit kauh; dawak kidika yakat nunayang, Efrata tāni yakat, bahang waradika laih ayangni Belén.#Gn 35:16-19.
8Dawak sirihni Israel kidika José walanbis balna yakat talna, kalyulwi dakana:
—Dawak ¿adika wais balnayah?
9—Adika balna kuduh Papang yaklauwi yāna kidika Egipto akat —José yaklauwi kaput nangnitlana.
Kaput laih papangni yaklauwi kalyulna:
—Plisma, yaihkit akat duaitah, yang blisinki diana atnik.
10Israel kidika muihbarak palni bahang witing minikpa di yamni talwasdai, kaput bahang José witing walanbis balna kidika papangni yaihnit yakat duwi kiuna, dawak witing wakaihwi umna. 11Usnit kat José yakat kalyulna:
—Tahatasyang dai wattik matalnik kidika, kaput kaunah, Papang yaklauwi yana man walambis balna bik talna atnik.
12José witing walanbis balna kidika papangni kalasnimak kaupak dulauwi dawi limbabahwi muhni sau kat lakna. 13Usnit kat walabis kidika bupak duna, Efraín kidika tingni palni yak dawak Manasés kidika laih wadahni yakauh duna dawak papangni yaihnit yakat duwi kiuna. Kaput laih Efraín kidika Israel wadahni niningyakauh watna, dawak Manasés laih tingni palni niningyakauh watna. 14Kaunah Israel witing tingni yuna kidika biri biri lāwi yuna, bahang witing tingnipal kidika Efraín minit yakat yuna, bahang witing laih bin yakauh dai, dawak tingni wadahni kidika laih Manasés minit yakat yuna, witing kidika kauh barakni dai kaunah. 15Kaput laih José yakat aput blisin kalana:
“Papang witing yakat yulni dakanamana kidika
Abraham dawak Isaac, yang papangki balna,
Papang yang akat mainyatalna kidika
batahndanayang mani kaupak,
16dutni bitik kau yalaihwi yakwa innisal kidika,
blisin diawang adika muihni ahal binina akat.
Witingna munah yang ayangki adika isningkatna karang
dawak yang papangki balna ayangnina bik, Abraham dawak Isaac.
Walaninabis bik mahnin yayakna karang
dawak sau akat muih mahni palni kalna karang.”
17Kaunah José witing dutni kaput talna witing papangni tingni palni kidika Efraín minit yakat yuna kidika; bahang kaput laih papangni tingni kidika laihna Efraín tunan minit kau yuna sakkidika yakwi walanibis Manasés tunan yakat ilna atnin, 18dawak aput yulna:
—¡Dikah, papang kaput laih awaski! Adika laih barakni kidika ki. Man tingmapal kidika tunan yakat yutah.
19Kaunah papangni kaput yamnin kulwasdai, dawak witing yaklauwi kalyulna:
—¡Amanglatayang, walakibis, amanglatayang! Witing bik nisan as nuhni kalkulna karang. Kaput kaunah witing wirahni binkauh kidika laih tanit karang ki, witing karak dawakat, dawak witing sulani balna kidika laih nisan manas kalalahna karang ki.
20Kidika mani Jacob yaklauwi blisin diana#Hib 11:21. adika yulni balna karak:
—Israel tawanni kidika manna ayangmana kidika duna karang, blisin dianin karang kat, bahang aput yuyulwarang: ‘Papang man yakat yamna karang Efraín dawak Manasés kau yamna kaput.’
Israel yaklauwi kaput āna Efraín kidika Manasés tanit yakat. 21Usnit dawak José yakat kalyulna:
—Talah, yang dauki ki; kaunah Papang manna karak karang, bahang witing yaklauwi yamwak watta muihmana bararak balna saunina yakat yawanama. 22Man laih tanit manayang, wirahma balna karak dawakat: Siquem#48.22 Hibru kau Siquem tanka laih salahni kidika awaskat asang labani dawak aput bik yulwi pis as tanit yamni kidika. kidika matayang, amorreo balna niningnakauh kalbautik dakyaknayang kidika.
Currently Selected:
Génesis 48: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998