2 Pita 1
1
Parasnin yulni
1Yang Saiman#1.1 Saiman: tingkau ulna balna buas laih aput yuyulwi: Simeón, hibru kau bik kaput yulwi sihm ayangni kidika. Pita, Jisas Krais dini yamyang dawak aposnitel, parasnin lani disihwi rahm kulnin lani minit nuhni mayang duda kapat duduna muihni balna kidika yakat, kat Mapapangki dawak mailaihwi yakyang Jisas Krais#Tit 2:13. laih la kat bahang. 2Minikun talnin lani dawak kulnin aslah lani bik minitbayak dutanauh Papang kaupak dawak Madakiwan Jisas kaupak bik sins lani dutamana kidika karak.
Kristian as muihni yakat duwa atnindini balna kidika
3Papang parasni duwa kidika yulni, mayang masangkika yakat dawak minikun talnin yakat bik ais dini balna dukih mayawa kidika bitik mayana, witing nuhni dawak warkni taldas dini balna bik yamna kidika muihni maiyulwakat mawana kidika yaklau maamangkilana mani kat. 4Adika dini balna munah witing pranimis balna kidika mayana, kidika laih nunuhni dawak bik minit nuhni kulna ki, kidika balna munah manna dimana duna atnamna Papang dini kidika yakat dawak sau akat dukih lani dudutni balna duaina kidika kaupak bik ira lawana atnamna. 5Dawak adika yulni manna muihmana taihta rahm kulnin lani dutamana yakat nuhni yamnamna ki di yamni yamnin kidika; di yamni yamnin yakat, amanglanin kidika; 6amanglanin yakat, mamuihki taihnin kidika; mamuihki taihnin yakat, makulnik laihwatnin kidika; makulnik laihwatnin yakat, minikun talnin lani kidika; 7minikun talnin lani yakat, yamnin kaltalnin kidika, yamni talnin yakat, dalani lani.
8Manna adika dini duta nuhni yamtanama kat, sangmanaka kidika laih dauh awas karang dawak Madakiwan Jisas Krais kidika bik dauh amangnilatas mana karang. 9Kaunah angdika muihni kat dis laih sihm minikpa dis kapat ki kidik awaskat naikau talwas kapat ki; witing dinitkahna dutni balna yamna dai kidika kaupak maisihni dis kalyamna kidika. 10Kidika bahang, wanaih ki balna, uman Papang yaklau manayulwakat aiwanaman dawak manawalwi bik yakna kidika, manna traitalnauh adika dini manna yakat rikmana laihna atnin, kaput manayamwarang laih sip buktas awanama. 11Aput laih Madakiwan dawak mailaihwi yakyang Jisas Krais king kāwa dūrni balna kidika bu bu apahwi manana karang.
12Kidika yulni adika dini bitik ban ismangnapakta awaki ki, manna laih uman amanglatamana dawak yul rahm manasumamalna kidika yakat bik barangni mana karang bik. 13Yang sangka awaki mani kat, yang kultingkat manna yakat yul manayulnik kidika yang yamnik dini kapat ki adika yulni balna karak. 14Madakiwan Jisas Krais yaklau yayulna adika sangnika sirihni palni daki kidika; 15kaunah traitalik yamki ki yang dauki usnitkat manna ismangnakatna atnamna adika dini balna yulni.
16Madakiwan Jisas Krais parasni dawak watwi kaiwarang kidika yulni manasumalnayangna kidika laih, kisi minitlakwi yulna dini awas dai, bahang mayang silp mamikpa karak talnamayang Dawan witing nuhni kidika. 17Papangni yaklau risnipik lani dawak alasnina yaksihni kalawakat talnamayang, Papang yulni kidika laih alasna yaksihni aput kalyulna dai: “Adika ki yang walakibis dalani, yang lawik waltik yaknayang kidika.” 18Yangna silp dakanamayang dai yulni as kisang kaupak kaina dai kidika, Bahang Dawan karak holi asangni yakat bangyangna dai.#Mt 17:1-5; Mk 9:2-7; Lc 9:28-35.
19Adika laih Prapit balna yulnina kidika rahm yamwi, kidika yulni manna laih rahmmana karuk duta kultamana. Bahang kidika yulni laih sihm puksani yakat awas yaringni dahlwa kapat ki, payahlawarang kat dawak mapiris yalani kalahwi ismangna kidika yaringni yamna atnin. 20Kaunah di bitik pasyakat adika dini laih kulta awanauh: Prapit as bik ulna wauhnitaya kidika witing alas kulwi talwi ulwas ki, 21kat Prapit balna kidika laih wat as bik muih kulnin lani kau duwi yulbabauwas dai; nawatkauh, witingna laih Papang yulni yuyulwa dai, Spirit Holi yaklau tanitna kawakat.
Currently Selected:
2 Pita 1: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998