2 Pita 2
2
Alas yulni sumamalwa muihni balna kidika
(Jud 4-13)
1Israel tawanni yakat bik Prapit dauh balna bang dai; dawak manna pasyakat kaput sumalyang dauh balna bangkarang ki. Witingna laih kulninna lani dutni kidika lāih yakwi sumamalwas karang, kaput karak witingna dilaihwi yakna Daniwan kidika tatalwas karang; adika dini yaklau sirihni palni pāt duduna karang. 2Muih mahni palni kidika sangnika suhlsuhl yakat usnit uhuina karang, dawak witingna yulnina rahm tani kidika yakat dutni yuyulna karang. 3Lalah dukih diawa yakat, alas yulni balna karak dimana kidika duduna karang; kaunah pāt kidika laih witingna yakat tanina awi sinika dis, bahang lanina yamna kidika laih ma mahni palni dawi.
4Papang laih insal balna dutni yayamna kidika dutnina dawak diswas dai, kaunah kuh yakat diruhmwi puksani yakat didamukna dai, sin kau disitwi dana dai la yamnin kidika yulni. 5Sau umani dai kidika bik Papang yaklau dutni dawak diswas dai, kaunah kidika muihni balna dudutni kidika minitna yakat wasnuh sihna dai, dawak Noa yakat manah laihwi yakna dai, sangnika barangni atnin yulni sumalna dai kidika, dawak muih ūk tiaskaubu kidika balna bik dilaihwi yakna dai.#Gn 6:1—7:24; 8:18. 6Papang yaklau Sodoma dawak Gomorra tawanni nunuhni balna bik daukalmukna dai, buswi wan#Gn 19:24. manah yamna dai, dutni yamyang balna kidika yakat kaput dikalahwarang kidika talna atninna yulni. 7Kaunah Lot yakat laih laihwi yakna dai, muih al as la kat dai witing laih dutni yamyang balna sangninaka yakat dutni yamnin suhlsuhl kidika yulni kulwi kalbauwa dai.#Gn 19:1-16,29.
8Adika alni la kat witingna pasningna yakat yalahwa dai kidika, witing isning yamni kidika yakat dalani wauhwa dai di dudutni balna ma bitik yakat talwa dai kidika dawak dakawa dai kidika yulni bik.
9Dawan laih amanglawi witing yakat wiryaklalana balna kidika yakat wauhnin kaupak dilaihwi yakna atnin, dawak bik amanglawi dutni yamyang balna kidika wah diawi diduna atnin la yamwarang kidika mani kat. 10Dawan yaklau wah diana karang maisihni dini dukih diawa kidika balna yakat dawak witing lani yakat dutni yayamwa balna yakat bik. Witingna laih tunanina dadasni ki dawak bik tingnina kapahni ki, dawak parasni nuhni duyang balna yakat dutni yulninna kidika yamaduduwas ki; 11wirlawakat, insal balna kidika, parasnina nuhni duduwa karang bik, tingnina kapahni karuk dutni yulwinah pāt yakat sisihwaski kidika parasni balna Dawan kaupak kidika yakat.
12Adika ahalni balna laih sihm di wail balna kapat ki: di amanglalawas ki, minit aslah manah sangka ki dawak witingna laih batatahnwi dilaihwi dihina atninna yulni. Di amanglalawas dini kidika yakat dutni yuyulwi; kaunah sihm di wail balna kapat dadauna karang,#2.12 Kaunah sihm di wail balna kapat dadauna karang: wirlana ūk yakat laih aput yulwi: kaunah daukalnin yakat di dutni yayamwa balna kidika laih witingna silp dadauna karang. Grik sani. 13dalani wauhwīnah muih ūk balna yakat diyayamwakat dalani wawauhna kidika yulni. Minit as alasnina balna kidika duwi alasna kaldakakawi. ¡Witingna laih asalni dawak muih usyang balna as ki manna karak kalpapakwa mani kat witingna kasninna alasnina balna yakat, alasninana dauh balna kidika yakat alasna duwinah!
14Muih yal as tatalwa kidika dukih diawas laih awaski; sip disuhwaski dutni yamnamanah. Sol balna parasnina dis yakat laih diyayamwakat dutni yakat bubukwi; dukih lani kidika niningkauh laih lan palni ki; witingna laih muih dudutni ki. 15Ta didisna ki, kat ta barangni kidika kaupak naikau kalalahna kidika yulni. Beor#2.15 Beor: tingkau ulna balna buas kidika laih aput yuyulwi dawak Nm 22:4-35. Grik sani. walanibis al Prapit Balaam di yamna kidika yakat talwi usnit uhuiwi, di dutni yamwīnah lalah dukuh atna dai kidika 16dawak witing silp dutni kidika yaklau bilna dai: biriku yal yulbauwas kidika yulkalbauna dai muih dinit kapat karak dawak di dauh balna yamwa kidika baisa kaldawakat yamwas dai.#Nm 22:4-35.
17Kidika sumalyang balna laih sihm was butnin pāni kudungni was dis kidika kapat ki, sihm wing yaklau mukus balna yakat murwi duwi kiwa kapat ki; witingna laih puksani palni kidika pāni yakat ban kaput atnin pātni yakat kakana. 18Witingna laih di yayamni dawak dauh balna kidika yuyulwi, dawak di suhlsuhl karak dawak muihnina nuhni dukih diawa lani kidika karak diyayamwakat dutni yakat bubukwi angdika muihni balna di dudutni balna pasyakat muih ūk balna yalalahwa kidika kaupak kalahwi kiri yaklalawa balna yakat. 19Pramis diyayamwi pri lani diana atnin, witingna palni daukalnin#2.19 Daukalnin: wirlana ūk yakat laih aput yulwi: Daunin. warauni#Jn 8:34; Rom 6:6,16. balna karang bik; kat angdika muihni balna kidika dini yaklau ditaihwi duna kidika laih warau balna. 20Bahang angdika muihni balna Madakiwan Jisas Krais yakat amanglalana kidika laih, dawak sau maisihni kaupak kaput kiri yaklalana kidika laih, dawak watwi dadawakat kidika dini balna yakat tunanina balalakwarang kat dawak bik kidika dini balna yaklau ditaihwi duduwarang kat, baisa dutni wawatwarang ki muhnilau dai kidika karak dawakat.#Mt 12:45; Lc 11:26. 21Baisa yamni dai witingna ta barangni kidika amanglalawas dai kat, amanglalana usnit kat, lā holi diana dai kidika kaupak naikau kalalahna kidika. 22Kaunah witingna yakat di rahm kidika kalahna kulnin lani as rahm aput dai kidika: “Sul kidika laih tiningyakna#Pro 26:11. kidika watwi kaswi dawak kusih kidika laih was kalsiwa minitni yakat watwi wasmak kawi kalpiramwi.”
Currently Selected:
2 Pita 2: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998