1 Pita 5
5
Kulyang balna yakat yul diyulnin kidika
1Waralaih manna pasyakat muihbararak balna#5.1 Muihbararak balna: yulni kidika laih kurihni yakat yulnin sipki, dawak Ju muihni balna amput yalalahwa kidika yakat bik yulnin sipki, tawanbin yakat tunan muihni as yakna atnin. (Talah S.d 2.) yakat yul diyulna atnik dukih yawi, yang bik muihbarak yang kidika sihm witingna kapat dawak bik yang laih witnis yang Krais dalani wauhna kidika, dawak yang diki bik duki ki alasna yaksihni kalahwarang kidika yakat. 2Papang#Jn 21:15-17. sīpni balna kidika maintalnauh manna tingmana yakat dana kidika; kulnamna yamni karuk yamtanauh, Papang dukih kalawa kaput, dawak taihna lani dawak lalah dunin yulni laih awaski, kaunah dukih yamnin. 3Manna maintalamana dini balna kidika sihm manna dimana awas kapat yamtanauh, kaunah traitalnauh witingna niningna yakat niningkanin as kapat di balna kidika yamtanauh. 4Kaput, sīp maintalyang tatuna#Hib 13:20. kidika kalahwarang mani kat, manna laih alasna yaksihni kraunni kidika dutanama, kraun as sip daukalwas karang kidika.
5Sihm kaput bik, manna wawahma balna mana kidika muihbararak lanina dinityakat awanauh. Manna bitik kulnin bukna lani karuk biri biri muihbararak balna tingnina dinityakat āwanamna ki, kat:
“Papang laih angdika muihni balna witingna manah kapat kaldakakawa kidika niningnakauh yaklauwi,
kaunah kulnin buknin lani duduwa muihni balna yakat laih ilp diawi.”#Pro 3:34; Jm 4:6.
6Bahang sau yakat buktanauh, Papang parasni duwa kidika tingni dinityakat, mani kiwi kawakat witing yaklau manadulauna atnin yulni.#Mt 23:12; Lc 14:11; 18:14; Jm 4:10. 7Manna kulta kalbautamana dini balna bitik kidika Papang tingni yakat datanauh, kat witing laih manna yulmana kulwi kalbauwi.#Sal 55:22; Mt 6:25-34.
8La yamni dutanauh dawak bik sahmuhni bang-awanauh, kat manna namangnakauh yaklauwa muihni sitan kidika laih, sihm layan as kapat, wais yakat kasnin kidika walwi. 9Rahm kulnin lani yakat niningkauh barangni lawanauh, amanglatinah sau akat pa balna bitik yakat manna wanaihmana balna bik sihm kidika dini balna wawauhwa kidika. 10Kaunah manna ma balna buas dalani wauhtamana usnitkat, Papang yaklau yamni, barangni, dadasni dawak bik rahm manayamna karang. Sihm kidika Papang witing dalani lani nuhni duwa kidika karak maiyulwakat mahaiwana witing alasnina yaksihni yakat mayang bik madiki ban kaput atnin dini kidika duna atnin yulni Jisas Krais karak aslah. 11Witing parasni kidika laih ban kaput atnin karang. Kaput karang.
Parasnin lani witni kidika
12Silvano#Ap.w 15:22,40. munah, yang wirahki as barangni kalkultayang kidika, adika wauhnitaya parahni manaulnayang, manna yakat yul manayulna atnik dawak bik rahm manayulna atnik manna blisin dunamana kidika laih Papang dalani lani rahm wauhnin as ki. ¡Kidika dalani lani yakat barangni awanauh!
13Babilonia#5.13 Babilonia: Tatuna krisnitian balna yuyulwa dai Roma kidika kaput yulna atnin. yakat suts sakkidika, kidika bik Papang yaklau walwi yakna sihm manna kapat, parasnin lani manasihwi, dawak yang walakibis al Mark bik parasnin manasihwi.#Ap.w 12:12,25; 13:13; 15:37-39; Col 4:10; Flm 24. 14Biri biri dalani lani kalumnin as karak kalparastanauh.
Manna bitik kulnin aslah lani dutanauh, Krais dini balna mana kidika.
Currently Selected:
1 Pita 5: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998