Maleaki 2
2
1Idokken Jahowa Pergegoh Sisotercodi i ngo taba imam-imam, “Bagèen ngo perèntahKu bai ndènè: 2Pesangap mo Aku merkitè pengelako ndènè. Mula oda kènè uè mendengkohken katangKu, Kusumpahi mo kènè. Karina sinijalo ndènè sibagè rejeki mobah gabè sumpah. Situhuna, karina simendè i enggo Kusumpahi, kumerna oda isarihken kènè perèntahKu. 3Kuhukum mo dukak-dukak ndènè, janah abè ndènè Kulapui dekket kotoren binatang sinipèlèken ndènè, janah iruah mo kènè mi pulguken kotoren. 4#4 Ms. 3:11-13 Nai satdar mo kènè enggo kin ngo Kuruapken perèntah èn, asa dak tong hot padanku dekket imam-imam pemparen si Lewi.
5 #
4 Ms. 25:12
I padan i Kujandiken ngo bai kalak i nggelluh merkemènaken janah mersennang-sennang, janah Kudokken asa ipesangap kalak i Aku. Tikanna i tuhu ipesangap kalak i ngo Aku janah merkebiaren bangKu. 6Iajarken kalak i ngo situhunna, oda ngo sisalahna. Kompak ngo kalak i dekket Aku janah bujur mengèkutken lemmo atèngKu. Mèduk ma ngo janah iurupi kalak i jelma, asa ulang nèngè iulaken jahat. 7Nemmuken ulaen imam-imam ngo mengajarken kebenaren tersèngèt Aku Jahowa Sintèmbul i. Taba kalak i ngo kennah mengkuso jelma nterrem, kadè lemmo atèngKu, kerna kalak i ngo pasulakkenKu.
8Tapi bagèndari, enggo mo menurimpang kènè imam-imam i dalan sènteng nai. Peddah ndènè enggo memabaken mèduk jelma mengulaken salah. Enggo iosè kènè padan sienggo Kubahan dekket kènè. 9Nai Aku pè kubaing ma mo kènè irèmèhken bangsa Israel kumerna oda iuèi kènè hendakKu, dekket kumarna ipisah-pisah kènè jelma sinderrang ipedahi kènè bangsangKu.”
Oda setia jelma nterrem taba Dèbata
10Otang karina ngo kita merbapaken sisada i? Otang karina ngo kita itempa Dèbata sisada i? Mula bagidi ngo kasa kita meradu mengosè perpadanen janah merkitè bagidi siosè padan sinibahanken Dèbata dekket empungta? 11Enggo iosè kalak Juda perpadanen Jahowa dekket kalak i dekket mengulaken simengerri i Jerusalem bak i suberri aur. Enggo ilamuni kalak i Bages Jahowa sinikekelengenna janah jejap dekket daberru-daberru simenembah sembahen bangsa sidèban. 12Katerra pè ipedaoh Jahowa mo nemmu kalak simengulaken bagidi bai bangsa Israel nai. Katerra pè ulang nè mo dekket kalak i rasken bangsanta memèlèken pèlèen bai Jahowa Pergegoh Sisotercodi.
13Janah èn dèng ma mo dèba nai ulah-ulah ndènè. Iremrem kènè ngo langgaten Jahowa dekket èluh; tangis milangi dekket muo-uo ngo kènè kumarna oda lemmo nè atè Jahowa menjalo pèlèen ndènè. 14Ikusoken kènè mo kasa oda nggèut nèngè ia menjalo. Kumarna ibettoh Jahowa ngo oda setia kènè taba daberru sinikabinen ndènè tikan poso dèng kènè. Denganmu nggelluh ngo daberru idi, tapi enggo iselbuh kènè ia, tukasi pè merpadan kènè ihadeppen Jahowa, asa tong setia kènè tabasa. 15Otang Jahowa sada-sada i ngo memaing kènè gabè sada daging dekket sada kessah bak daberru i? Kadè ngo sura-sura Jahowa merkitè i? Oda lot si- dèban, imo asa lot dukak-dukak ndènè gabè bangsa Jahowa tuhu-tuhu. Kumara i jaga kènè mo diri ndènè, asa ulang lot bai ndènè nai siso setia taba sinibagesna. 16“Nggogo ngo atèngku midah kalak sirang,” nina Jahowa Dèbata Israel, “Nggogo ngo atèngku mula lot sada kalak bai ndènè nai mahanken bagi kejamna taba sinibagesna. Asa jaga mo diri ndènè, ulang lot menelbuh sinibagesna.”
Enggo ndessing ari perhukumen
17Pèahen ngo ibaing kènè Jahowa merki- tè rana-rana ndènè. Tapi mengkuso ngo kènè, “Bakunè pana kami memaing pèahen Jahowa?” Merkitè idokken kènè, “Karina jelma simengulaken jahat, iètong Jahowa ngo i mendè, janah lolo ngo Ia midah kalak sibagidi.” Barang merkitè mengkusoken, “Idikè ngo Jahowa siniètong adil i?”
Currently Selected:
Maleaki 2: LAIBTD
Highlight
Share
Copy
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)