Matéo 1
1
Jesús gãrapíode jnani bajaque ore íode u udojo
(Lúcas 3:23-38)
1A yurúsãre Jesucrísto quicujaidie ore íode jne. Mu obiréjnane u David, Abraham iji ore. Enga Jesús quicujaidie u ore to.
2Ore íode u unojo: jnani bajai Abraham ujnacari tu Isaac nanique. Enga Isaac ujnacari u Jacob. Jeque Jacob ujnacarode u Judá ore to nanique. 3Jeque Judá ujnacarode ore u Fáres, Zára ore. Enga udore ore daté i u Tamar. Fáres ujnacari cusapo rĩ enga i tu Esrom. Jeque Esrom ujnacari cusapo rĩ enga i tu Aram. 4Aram ujnacari cusapo rĩ enga i tu Aminadab. Aminadab ujnacari cusapo rĩ, enga i tu Naasón. Jeque Naasón ujnacari cusapo rĩ enga i tu Salmón. 5Salmón ujnacari cusapo rĩ enga i tu Booz. Enga Booz daté u chequé bajé Rahab. Jeque Booz ujnacari cusapo rĩ enga i tu Obed. Enga Obed daté u chequé bajé Rut. Jeque Obed ujnacari cusapo rĩ enga i tu Isaí. 6Isaí ujnacari cusapo rĩ enga i tu David uje eduguéjna cuchape nanique. Jeque David ujnacari cusapo rĩ enga i tu Salomón. Enga uté daté u Urías acoté nanique iji taningai.
7Salomón ujnacari cusapo rĩ enga i tu Roboam. Jeque Roboam ujnacari cusapo rĩ enga i tu Abías. Abías ujnacari cusapo rĩ enga i tu Ása. 8Ása ujnacari cusapo rĩ enga i tu Josafat. Josafat ujnacari cusapo rĩ enga i tu Joram. Jeque Joram ujnacari cusapo rĩ enga i tu Uzías. 9Uzías ujnacari cusapo rĩ enga i tu Jotam. Jotam ujnacari cusapo rĩ, enga i tu Acaz. Jeque Acaz ujnacari cusapo rĩ enga i tu Ezequías. 10Ezequías ujnacari cusapo rĩ enga i tu Manasés. Manasés ujnacari cusapo rĩ enga i tu Amón. Jeque Amón ujnacari cusapo rĩ enga i tu Josías. 11Quigade enga Josías ujnacarode cusapo rĩ enga uñai i tu Jeconías. Enga deréjnane jé u nanique uje israélgosode ore umajosórone ore chisa ore enga ore jno ore údi aja daniri uje i tu Babilónia.
12Quigade enga Jeconías ujnacari cusapo rĩ enga i tu Salatiel. Jeque Salatiel ujnacari cusapo rĩ enga i tu Zorobabel. 13Zorobabel ujnacari cusapo rĩ enga i tu Abiud. Abiud ujnacari cusapo rĩ enga i tu Eliaquim. Jeque Eliaquim ujnacari cusapo rĩ enga i tu Azor. 14Azor ujnacari cusapo rĩ enga i tu Sadoc. Sadoc ujnacari cusapo rĩ enga i tu Aquim. Jeque Aquim ujnacari cusapo rĩ enga i tu Eliud. 15Eliud ujnacari cusapo rĩ enga i tu Eleazar. Eleazar ujnacari cusapo rĩ enga i tu Matán. Jeque Matán ujnacari cusapo rĩ enga i u Jacob uñai. 16Jacob uñai ujnacari cusapo rĩ enga i tu José. Enga José acoté tu María. Enga Jesús daté jé u uaté. Enga uaté abi Jesús upúsu Dupade uruode atatasórone jnani bajácho ore atatai Crísto, uje a chiqueta darasade ore jne.
17E yingo ore íode ome uaque. Mu a jé yingopo ore guejnanie ayoré ome uaque jne rĩ. Abraham ape disi ejo eyúgode ore dayode gagájni iji pirídai aja eduguéjnai David. Jeque David ape disi ejo eyúgode ore dayode gagájni iji pirídai aja Jeconías uje basíji Babilónia nanique. Jeque Jeconías ape disi ejo eyúgode ore dayode gagájniapo iji pirídai te rĩ aja Jesucrísto.
Jesús batigai adode u unojo
18Jesucrísto batigai isocade u unojo: María, uje Jesús daté jé u jne, e José ore áyipiei ome ñane ujetiga ore chóji ñane gari jne. Uje cáma ore chisa ñane, mu María ica déji ajei. Mu José ca ica go, mu Dupade Ujopié Espíritu Sánto u uje ipesute María abi iji ajei. 19José gajma María mu cáma chisa. Enga jnani paráquedaté José. Uje e chiraja uje María abi e déji ajei mu que chingo ayorérique go. Pota jetiga cha mu que chingo erámi. Gaidi u gu ujetiga ca ore chedo iji erámi. 20Mu José qué cho dáyugu re eti Dupade iroi gaté unirísõre chiqueta raja iji imoi. Enga chojningame:
–José a, David ape disi ejo a, ca o báyugu ua. Enga ca etaque bajma María. Enga ca aya. Uje Dupade Ujopié Espíritu Sánto ipesute uaté abi iji ajei. 21Enga a uaté abi base jne enga ẽ́care Jesús aja jne. Uté a chiqueta darasade ore jne gu iji ore isijnaringuéone.–
(Jesús i qui tu piquetangore ome israélgosode ore uruode.)
22Cuchade unojo jnese pésu re gu ujetiga Dupade uruode tocade uje purusãracho nanique ome Dupade uruode urusãrasórone uñai uje chojninga:
23A gapu paréraque icáraque déji ajénique bisideque jne. Enga a atique cuse jne. Enga a ore chĩ́care Emanuel aja jne.
Uje Emanuel uruode qui tu: Dupade déji yocari.
24Uje José niji iji darigode quigade, enga doi Dupade iroi ojningane cucha. E que chetágapo dajma María gotique rĩ, enga ore nóna ñane aja quedéjnane. 25Ore déji ñane gari mu cáma ore moji ñane gari, jé aja María ape bajai quigade. María abi base enga José chĩ́care gojni Jesús aja.
Currently Selected:
Matéo 1: Ayore
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen-GB.png&w=128&q=75)
Want to have your highlights saved across all your devices? Sign up or sign in
© 2021 Ethnos360