YouVersion Logo
Search Icon

Malaquías 4

4
Pangarádejnai diringai a ueradéjna ome ijnorasórone jne
1Dupa Pujnuéngaisṍri chojninga: "Yujuyaquéode e garósi yui ome yetesórone ore to. Enga e dimane yiqueta ejojna ome dicotárechoquíode, ate gajnaréngone ore yúode jnese. Ga ore gajnúone u jnacaraque cajnórone enga a yṍra ore aja ejojnáraque ajénique to ga pioi chejnápise ore ¡jaripe! Enga a gosi dorási ejojna chaquipie ga chasája quedéjnai iji ajei mu que gosi chise dicotárechoquíode udore uñeque ajnoquetique iji ajei gotique iji chaquipie to. Ga jé ũrepise yu uje diri tuté a di jne enga sijnángone a ca ore chapite to jne. 2Mu yiríringai a ueradéjna ome yijnorasórone uaque to jne. Ga gajnua tu guedé uje tocade ga dírecaringuéi cho jnip aja gaté ga guedé ojodie chise uaque ga chiqueta gosi ome ejnaréngone to ga pésu uacáringane ijoréjna to. Ga unere yiríringai yui ome uaque ga uacajnua tu aquirájna ucatógabia uje quene gachisṍri chijnime iji pi ajei ga cana ga choja quedéjnane ¡chem! ¡chem! 3Iji diri tuté ga cho jetiga jnani sijnángone udore uje ore socárome yijnorasórone uaque e ore nóña ga puchucuru ore to ga uacachiéjnaño ore iji jnumone ¡pac! ¡pac!
4Enga ca acadíchoi yuruode uje cuchadatei tu yuruode ome uaque to gu. Yojningane yurúo u uje yisi ome yiro casica Moisés nanique iji cucarani ójo to nanique uje i tu Horeb. Ga yipotigádode cucha déji yuruode udojo, jé aja yetégode cucha to jetiga israélgosode beyopísi quigode.
5Angachopísi yuruode udojo to uje a yiroque yutocaitique aja uaque jne iji yiríringárique iquei ujetiga uté adode jé chopise yiroi jnani bajai Elías adode to, uje a yuruode atatasõre uté to jne. Enga quene dire pagutéjoragosi chise erámi unirisórone ore to iji uté quigade to. Enga dire uñeque a ca cho uté jne ome úringai dire pagutéjoragose. 6A yutocaidi tuté chaquĩ́ra ore ome ore ate gajnaréngone jne. Angoninguite gueságode a ore chajni yibai, ga a jogadi tu jne uje ore áyipiedie pajnotágapome ñane rĩ. Ujetiga jnanírique, abi ore chetaque ñane, jé basa ga a ore cha detétigade ome ñane gu uté aquĩraquéode. Ore chiraja gu uje a Pangarádejnai uyu a yĩri ga yurugaite ore uniri ujetiga jé ca ore chajni yibai.

Currently Selected:

Malaquías 4: Ayore

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy