Matéo 2
2
Guédodie irajasórone ore chucué eduguéjna ichai
1Uje Jesús e basíji guidai Belén iji ore uniri Judéa nanique, ga Heródes qué déji dáringai eduguéjna cuchape iji ore uniri uté. Iji Jesús uté batigai quigade enga guédodie irajasóningo ore chise idai cuchábi Jerusalén. Enga udore ore tṍraji punire quedéjnai iji guedé garani. 2Enga ore catecã́ri jerusaléngosode enga ore chojninga:
–¿Jé disabi idánique a uje chi basosíji duruñeque? Uje israélgosode chi ore eduguéjna cuchape suté jne. E yimóngo gãrapié guédo iji guedé garani diríca. Enga yoquigaidi tu ujetiga yẽcója ome úringai cuchape.–
3Enga Heródes chopise dáyugu re uje chudute uje a disatique basosíji duruñeque uje a eduguéjna cuchape suté jne. Que gusu Heródes, mu urasade ore cho dáyugu raque to iji Jerusalén údode.
4Enga eduguéjna cuchábi Heródes e chamáta judíode angaránone ore asutedie. Chamátapo Moisés urusarane atatasórone rĩ. Enga chojningame ore: –¿Jé uacajnati Crísto basíji rique jne a ome uacajirigode, Dupade uruode atatasórone ore urusãracho?–
5Udore ore chajnai Heródes enga ore chojningame:
–A uté batigai tu ore idai Belén jne iji judéagosode ore uniri. Uje Dupade uruode atatasórone uñai, jé urusãracho nanique gu uje chojninga:
6"Belén á, guidai atíami jóroque ua iji judéagosode ore uniri,
Mu a jé eduguéjna cuchátique tṍrasiji ua jne.
Enga a chirote yurasade israélgose ore jne."–
7Uje ore chejna daruode udore guesi, enga jé u uje eduguéjna cuchábi Heródes tibidi guédo irajasórone ore. Mu Heródes pógu daruode uje catecã́ri ore enga chojninga:
–Atatayo díningo iji gãrapié guédo yui ujetiga amóño diríca.– Enga jé u uje ore chingo.
8Quigade enga Heródes chiroque guédo irajasórone ore aja Belén ujetiga ore chucuesi disabi tiji. Enga uté chojningame ore:
–Ujetiga esósi disabi suté jne enga ajníñopo aja ne rĩ enga jé u jne ujetiga yibágosi to jne rĩ ujetiga yẽrásia suté to ome úringai cuchape.–
9Uje e ore chejna eduguéjnai Heródes uruode guesi enga jé u uje ore jnopome dajei te rĩ. Mu ore imo bajé guédo jé u uaté uje tṍraji guedé garani, jé jogate ore iquei, jé aja Belén. Uje ore chise Belén, guédo uaté chapísiji disabi jogadi gai. 10Uje ore chimo guédo uje cha, enga guédo irajasórone ore nína raque uje ore chiraja gu uje e ore chise daqui. 11E ore chacája guiguíjnai ajei enga ore chimo disabi, daté María ore iji. Enga udore ore chichaga dagataidie aja suté iquei. Mu jĩraque ore chuchẽre daborapíode gáyode ujetiga ore chisi ome deranone cucha ome suté. Enga ore gueranone u óro, cucha ai unérone uje i tu inciénso, mírra ore. 12Diga Dupade chiqueta raja ore iji ore imoi enga chojninga:
–Ajníño jne enga oyo carúja uacaniri. Enga ayóyo Heródes gai jne. Mu angaráño uacajnatique dajeque jne ome uacajnaque baja casica.–
José jno Jesús, daté ore údi aja Egípto
13Uje guédo irajasórone e ore jno, enga Dupade iroi gaté unirísõre chiqueta raja José iji imoi. Enga chojningame uté:
–Heródes jmongarásija disabi. Pota chujési. Jecute ãriji jne enga bosi disabi, daté ore údi jne aja ore uniri Egípto. Enga ayáyoji ta to jne, jé aja ujetiga yujuégapo arorai ome uaque rĩ.–
14Enga José niji jmame iji damochápi. Enga ca chajire cuchárique. E jnosi disabi, daté ore údi jé iji dejai uté. Enga ore chicáji punire idájai uje i tu Egípto. 15Enga ore cháji te, jé aja Heródes itoringai. Cuchade unojo pésu re gu ujetiga Dupade uruode atatasórone uñai urusarane tocade uje chojninga: "A chise dínique jne ujetiga yingome yabi ujetiga jnoji egíptogosode ore uniri."
Heródes pota chujési disabode iji Belén
16Uje Heródes e cha dangoroné ome guédo irajasórone ore, enga cho júruru uje ore tagúja. Jecute chiroque dasoldádode aja Belén ujetiga ore chujé disi parátagabode ore iji, jé aja acorásedie jogonórone disío iji Belén ejode to. Enga ore yugode urásu disiode jnese uje cáma sequeréraque gare iji ore yui. Uje e chasingara guédo irajasórone ore ojñane aja guédo yui uje ore chimo diríca. Jecute chiraja uje ore ucuegábi disabi suté jé irába guédo.
17Jecute Dupade uruode atatasṍri jnani bajai Jeremías urusarane quene tocade uje chojninga:
18"Ducududique pisorã cuchábode uje tṍraji ore idai Ramá.
Chequé bajé Raquel u uje chisa dabade ome dabode gajnei pocaninga.
Que paquĩraquérique chajni uaté ome jnusiétigai ome abode.
Uje ore chejna ore jnese."
19Diga Heródes toi. Enga Dupade iroi gaté unirísõre chiqueta raja José iji imoi uje qué déji Egípto. Enga chojninga:
20–Disabi jmongarájasórone e ore toi. Jecute ayague enga bosiapo disabi, daté ore údi rĩ aja israélgosode uacaniri.–
21Jecute José chague jmame. Enga jnosi disabi, daté ore údi aja israélgosode ore uniri. 22Mu uje uté qué déji dajei, chudute to uje judéagosode ore eduguéjna ichai tu Heródes ujnacari Arqueláo. Jecute José cájnaru rágome ore uniri Judéa yui. Jecute que chiraja dasocárique. Mu Dupade chiquetápo raja José iji imoi rĩ. Enga chingome ujetiga chicáji ore uniri dosate uñai uje i tu Galiléa. 23Uje ore chise Galiléa enga ore quítequiguíji ore idai uje i tu Nazaret. Enga jé isocai upúsu Dupade uruode atatasórone ore urusarane úringane tocachucho ome Jesús uje chojninga: "A nazarétgose Crísto jne."
Currently Selected:
Matéo 2: Ayore
Highlight
Share
Copy
Want to have your highlights saved across all your devices? Sign up or sign in
© 2021 Ethnos360