Malaquías 3
3
1Dupa Pujnuéngaisṍri chojninga: "A yiroque yiroi aja Yiquei to jne jeta chajo dajetique iji Yiquei to. Ga jé u jeta uacajnati Pangarádejnai uyu yĩri iji uaque to. Ga yĩri ga jĩraque yacája yiguíjna cuchábi iji uacajade to. Uacajnátuyo Dupade Utocaidi jeta uté di ga pésu Dupade áyipie ejodie úringáringui ujñapetei ome uaque to, ga idógosi ujetiga uté di jne ga pésu uacáringáringo ujñapetácho to ome Dupade."
2¡Ujetiga chise diri tuté jne jeta uté di ga a ca ayorérique déji jeta cháguena uté iquei to! Chamáñaje a pisadodéringai jogadi tu ome erámi unirisórone ore jnese jne gu jeta Pangarádejnai uté di ome dáringai pirosobate. A uté di doidi dabioque údi iji yoque jne ga chejna ate gajnaréngone ipesusórone jnese iji yocujade jne. Ga Pangarádejnai uté a di doidéraque jabón údi iji yoque to. Gaidi tu gu ujetiga churu yoque ga yoquisijnaringuéone bijna jne ome yoque ga ayoré ichápise yoque jne iji quigade. 3Pangarádejnai gajnui u jnanírique uje chãru guebéode uje i tu óro, ga chácariji pioi ejoi ujetiga suse daborigode guio, ga iguirode bijna ome óro uté enga quene chijnimíji pioi. Ga jé Pangarádejnai isocai tu uté to ome Leví ape disi ejode ore to uje ore gajnepídi tu Dupade úringárique picatecãraite ome darasade ore to. Chinoningasipise udore jne ga ore gajnúone a jé u óro orerenie iji quigade to jne. Ga quene ore tẽrája Dupade to ome cucha ujñapetade. Enga jé u jne uje Dupade e chimesẽre ore gueranone cucha to, ga jogadi u jne jeta pajesereringai dépoji Dupade, irógode ore ome ñane rĩ. 4Enga a quene Pangarádejnai Dupade irasigápo judágosode ore to rĩ iji ore idai Jerusalén. Chimo gu uje e ueradípiso ore gueranone cucha ome uté to. Enga a chopise taninga cásodicáite jne uje irasiguipise ore to nanique.
5Ga Pangarádejna Dupa Pujnuéngaisṍri chojninga: "A yĩri to jne enga a yiqueta uaquedodie to jne enga a yinguíra dipoi taja uaque jne. Yojningane u ate gajnarénguipísode uaque uje jecucha ga uacapótayo pujopié gajnarénguenie isocade to, jé aja uaque uje uacapótayo chequé quedéjnanie iji uacacotépisedie ejode to, jé aja uaque to uje uacaráño uacojode ayoré ore to ga uacojnicho: 'Jé ũrepise yu to.' Mu táquechoquí uaque to, jé aja uaque uje gajnareque uacasocade to ome uacarógode ore ga uacaráño ore to, jé aja uaque to uje que posongaquérique déji uacajénique to ome abai toguedie, disijádode ore to rĩ, jé aja uaque to uje gajnareque uacasocade to ome purása quedéjnane iji uacajade. Mu cuchiyi tupúsu uaque uje uacoyo cucha iyiéguiji yu to ga que beyopoi yuru quitique to rĩ."
Dupa Pujnuéngaisṍri pota jeta ore chisecãrúpusu daplátadie nanique enga ore chisi ome eruemitodie ome uté
6Dupa Pujnuéngaisṍri chojninga: "Gosójningai Pangarádejnai uyu ga que yécãre yatique iji dire uñeque to. Jecute que yejna ¡jaripe! Jacob abode uaque. Chamáñaje yijnoraquei ome uté ape disi ejode uaque jé qué jogate uyu to gu. Uje jecucha uacasocade gajnarécho mu. 7Uacarajáyopise yuru iyiejájnane quigode mu que apótayo jeta apéso aja quigode to. Ga uacajnane u uacayode ore uje jecucha ore adode u unojo ome yu to nanique. Enga uyu u Dupa Pujnuéngaisṍri ga uyu darai ome uaque to uje yósi tome uaque to: ¡Enga ajníño yibai ga jé basa ga yajníja uacabai to!
Mu yiraja uacáyipiedie uje uacoyo jnani ujñapetáguiji uaque to ga uacojnichome yu to: 'Que yicagóji quedéjnarique ome ua to. Mu bojningame yoque: Ajníño yibai.'
8Mu yojningame uaque to: Que pisoca gotique ujetiga ayorérique doi ga chãrárase Dupa Pujnuéngaisṍri. Mu uacapéso udore ome yu enga chiese ca yiraja uacaringaquéode udore ome yu.
Mu a ojnichórasome yu: '¿Ama ũrepise ua ga yarángo ua to a? Enga atatame yoque to yocaringaquéode.'
Enga jé ũré enga a yingome uacaringaquéode ome uaque. Uje chiese asecãcho uacaplátadie ga uacaplátadie chejna yijmanáyone enga chiese yajné eruemitodie iji uacaplátadie jnese to. Enga chiese ca gusu uacaplátadie eruemitodie, mu uaqueranone déji udire iquéode. Mu taque uaque uje qué déji yúode. Uje chiese cucha iyiégape yu ome uaque to uje chiese que yiraja uacarupatáringane to. 9Mu Dupa Pujnuéngaisṍri uyu to ga que pãraque yu to. Yiraja uacaringaquéode to. Mu que gusu uaque mu jé ore doi uacasocade udore iji uacaniri údode jnese to. Jecute a yo yurúja uaque jne enga a ca iyieque yuruode ome uaque to jne. 10Ga Dupa Pujnuéngaisṍri uyu ga qué uyu darai to uje yojningame uaque to: Enga beyoi yuruode enga asecãchópusu uacaplátadie enga asíñopísome eruemitodie ome yu jnese to enga ũrepise uágome uacasecaranenie to. Ga boyo údi aja yiguíjna cuchábi cajo ajei to ga aráño aja ajei to. Ga jé u jetiga yirógode ca cuchárique chona ore to iji yiroquéode gáyode. Ga jé qué etingachope yuruode to enga a amóño jne yicaniratiguédatéode ome uaque to. Ga cho jetiga yuchẽre yidáidatéi iji gaté ome uaque ga a cucha omone tṍraji uté ome uaque to jne ga cucha omone a sué uacabáyode to. 11Enga a amóño jne jetiga cucha chagúode doi uacacapiedie mu yiji ga yicha yu aja yúode enga a amóño uacacade cucha adie jne enga a aráño adie jne mu sué uacabáyode. Ga jé isocai tu to jne ome uacacadie úvai to. Enga cuchárique a ca tagu árigui to ga uacaráño mu sué uacabáyode to adie. 12Enga uacojode ayoré iji punire quedéjnane a ore chojningame ñane: '¡Cajicho to israélgosode ore uje a ore angureni Dupa irasiguipise ore!' Enga a ore pañapísiji jnese ujetiga yatire uacaniri ingoningájnai gai to jne. Dupa Pujnuéngaisṍri u yu darai to ome uaque ga que yajéninga yurúrique to."
Dupade a pésu cuchade aja quigode ome darasade israélgoso, ujetiga chopo darása iji ore, ga ore gajneque osongaquéode to
13Enga Pangarádejnai chojningame uaque: "Uacaruode gajnarenguipísome yu gatuaque to.
Mu uacojnichome yu: '¿Ama gajnarenguirase yocurúrigo ome ua to a? Be ga atata yocuru gajnarétigo jogatígo to ome ua to.'
14Enga e yatata uacaruode ome uaque to uje uacachócho yeranone cucha ome uaque to. Ga uacojnicho: '¡Chi! Yicopísi Dupade iroquéode mu que cucha pagutíyabátique déji iroquéode to. Yibógoji Dupade iquei mu que chajirápo gadórique to rĩ. 15Yimóngo uje ayoré dicotáreode ore u uje ijõripise ore to aja ore ajesúode. Ugúcharánguipíse ate gajnaréngone ore to ga cho jetiga ore chetingare Dupade ome dapesute gajnaréngone mu cho jetiga ca chetaque ore ipesute gajnaréngone to ga ore chojninga: 'Que Dupade ujuyaquérique cuse to ome ate gajnaréngone uyoque.' Ga jé ore chajo raja dasijnaringuéone iji erámi tudé ga ore irasique re gaté.'"
16Jé basa ga Dupade chudute jnani parágode ore uruode gatuaque to rĩ. Ga ududigode u ore uruode uje ore chijnóra ga jecucha ore catecã́ri ñane ome átegoningáne, ipesútedatéode ore. Ga jé basa ga Dupade tibidi darujna aode irajasórone ujetiga ore churúsãre jnani parágode uruode quigode enga chojninga: "Arúsãcho ore uruode quigode uje uneréjnapise ore uruode quigode ome yu gu, ga a ca yicadígui quigode jne." Ga que gusu darade uruode mu churúsãre parágode ore áyipiedie to iji ore ajéode uje ore jnusina Dupade átedatéode to iji dáyipiedie.
17Enga Dupa Pujnuéngaisṍri chojninga: "E yipésu cuchade aja quigode ome yurasade ore. Enga a chise diri jne jeta e dimane cuchade ga yopo yurása iji ore to jne rĩ. Enga yajnui tu jnanírique jne ome ore jne uje dayé irasiguipise uje jecucha ujnacari chaguesipise ome iroquéode to. Enga a yosõripise ore to enga a yo yabi iji ore to jne. Yajnui tupo eduguéjna ugúcharã́tique ome ore to jne uje doi oredie ome cucarané orerejnanie to, ga yijnorasórone ore a ore gajnua u cucarané orerejnanie udire ome yu to jne uje a yo yaparagádiji ore to jne gu. 18Enga a jogadi upo to jne rĩ jetiga ajníño yibai. Enga quene jogadi tu ujetiga oyo pisoca omone ipesusórone iji yijnorasórone, jé basa ga a oyo cucha gajnaréngone ipesusórone iji yetesórone ore. Chamáñaje a quene arajáyopise pisoca omone, cucha gajnaréngone ore iji uñane ujade to gu. Enga a arajáyopise yanguresõripísode iji tágode ujade to jne rĩ."
Currently Selected:
Malaquías 3: Ayore
Highlight
Share
Copy
Want to have your highlights saved across all your devices? Sign up or sign in
© 2021 Ethnos360