Malaquías 2
2
1-2Dupa Pujnuéngaisṍri chojningápome darógode sacerdóteo ore rĩ: "Ujetiga yajegaite gosi ome yiroquéode enga jé tiógara jeta uté gosi tangaripísi yuru quigode. Jé tiógarapo to rĩ ujetiga uté gosi chijnorapise yu to. Jecute a yo yurúja yirógode uaque jne ujetiga angoninguite parique uágome yu. Ujetiga ca beyoi yuruode quigode ga a yo yurúja uaque jne ga a yuru bajade uje ueracho quigode jnese nanique a nóña ga gajnareque quigode jnese ome uaque jne. Uacamóño uje yeranone cucha omío jiépisi ome yirógode uaque to uje jecucha acho uacajnepídode to iji uacarasade gueranone cucha ome yu. Mu yo yurúja uaque jne enga gusu cucha gajnaréngone jne jeta oyo uacajnepídode iji ore." Dupa Pujnuéngaisṍri uruode u unojo ome darógode sacerdóteo uaque.
3Pangarádejna Dupa Pujnuéngaisṍri chojningápome darógode rĩ: "Enga a yĩro uacamenuringuéone enga a uacarasade ore cho cucha bisidéguiji uaque to jne. A boyo ore gueranone cuchiso noñácho údi aja yaserani gai jne, mu a yisa uchaque ajeminórone iji jnumi to jne ga yatingare uaquedodie ome ¡chaque! to jne. Ga a uacajnúone u ore uchaque paranone to uje a yariguéta uáguiji uacajogadi tuté ga a yṍra uágaja guesi to ¡bu! 4Enga jnani bajai Leví ape disi ejode uaque a arajáyo jne uje yaquĩ́ra uágome uacasijnaringuéone uje yigaidi tu gu ujetiga ayáyo uacasijnaringuéone úringáringo pipesucho enga ajníño yibai. Enga jogadi u jne ujetiga yuruode ome uacai jnani bajai Leví jé jogate iji deréjnane jnese.'" Pangarádejna Dupa Pujnuéngaisṍri uruode u udojo ome uaque.
5Enga Pangarádejnai Dupade qué jno daruode udore údi ga chojninga: "Uje yisi ome yuru iyiejájnane ome uacai jnani bajai Leví nanique enga yigaidi tu pucuecaringuei, pajesereringai ome uté nanique. Yigaidi tu jetiga angoninguite guesac uté ome yuruode to. Enga uacai jnani bajai Leví uté tangaripísi yu ga doi yojningane cucha jnese to nanique. 6Uje uté chacate darasade ore nanique ga chedu yuru uréone ome ore to nanique. Ga que chimere purupatáringane iji dabijnani to nanique. Jecute yocajéode chopise sere ome ñane nanique. Ga chajiripise darasade yúode nanique ga chaquĩ́ra ore ome ore isijnaringuéone to nanique. Ga jiei ore uje chimate ore aja ore úringane ate arécho. Ga yiroguipise uté nanique.
7Uté ape disi ejode uaque ga uacasocade a jé chorase uté isocágoningáne ome yu to. Ga yirógode jnese ore isai turásu jeta ore chacate darasade ore ome yadode enga ore chiraja yu to ome udore ore isocade ome yu to. Ga jé isocade u to jeta ore urásarique ca chiraja cuchárique enga ore chucué yirótique uñeque ome darajátique cucha jetiga ore chacate ore ome to ga ore chiraja cuchade gu ore. Uje Pangarádejna Dupa Pujnuéngaisṍri uyu ga jé basa yirógode u uaque ujetiga acacho uacarasade ome yuruode quigode ga ore chirajapise yadode to.
8"Cho jetiga yiroque bajade udore ore chajnapise yu iji jnumone to nanique, jé basa ejode uaque uacacayoi quedéjnane ome yũrajei to. Mu que gusu uaque uje uacacayóji quedéjnane ome yu, mu uacarasade ore tangári uacacajnaquéode ga ore chicapísiji uacaquigade ome yu to. Uacai jnani bajai Leví dopísi yuru iyiejájnane quigode nanique, mu disi ejode uaque uacayóyo yiroquéode gáyode ga uacoyo cucha bisidéguiji yuru omone. Jecute a ca togápo jne rĩ jeta yuru omone udore ome uacai jnani bajai Leví tocade ome uté ape disi ejode uaque. 9Ga yetégode u udojo uje obiréjnapiso enga u uacangoninguite paritigade, ga jorane u uje jĩraque uacajnicho jmatágode ore iyoguéode ga jĩraque uacapéso uacajuyaquéode ome ore. Jé basa ga atade ga ore pésu dapesute noñángone to, mu cho jetiga ca amóño ore isijnaringuéone úringáringo pipesucho, ga que angoño ore bade cucha ome ore gotique. Uje que yise uacasocade udore unétique ga yipésu uacarasade ore ichietabáitigade ome uaque jne, ga a ore chopise cucha bisidéguiji uaque to." Que cachi yurúo ome uaque to, mu udojo garani tu Pangarádejna Dupa Pujnuéngaisṍri ome uaque to.
Dupade chacãra israélgosode aja pacotedie iyásõreméone uje ore cha dacotedie to
10¿Ama ca yocanique chojmára jnese a? Chojmára arĩa, ga Dupapísi u, ga yoquipesusṍri u jnese. Yitojmárangopísiji jnumi jnese ga jé tiógara jeta ũrepise yógome ñane gatuaque. Jecute ¿gotique gu a uje yarángo ñane? ¿Jé ca arajáyo to a? uje gosi chãra dojórique ayoré enga jé chopise jeta cho bisidéguiji dangureni Dupa uru iyiejájnane uje yocayode jnani bajácho ore gajnecho udore nanique.
11Judágosode e ore chicapísiji quedéjnane ome Dupade adode, ga e Dupade chujãpise ore isocade to iji ore idáidatéi Jerusalén uté. Mu que gusu iji Jerusalén mu e chise israélgosode uñane iji yocuniri tudé jnese to. Dupade chijnorapise daguíjnai, ga cucha iyiejnai urásu ome yoque to. Mu judágosode ore cho cucha bisidéguiji Dupade iguíjna cuchábi uté. Chamáñaje ore u gu uje ore chisa dacotedie iji purása quedéjnanie to. Ore chiraja uje que pijnoraquei déji dacotedie udire ome Pangarádejnai Dupade iguíjna cuchábi gotique, mu qué ore chijnóra ore. Yojninganie udire ore catecã́ri dangurenone cucha bisidécho ga ore cho Dupade iji ayoré gajnúone to. 12¡Yipésupú ga Pangarádejnai Dupade doi ga chinoningasipise udore ore jnese iji yocujade to uje ore chisa dacotedie iji ayoré gajnúone icatecãraitodie udire! Ujetiga yocasutedie urásu mu doi enga chĩro ore to, jeoga ayoré gajnarécho mu chĩro ore to rĩ. Ujetiga udore uñeque dérasi uje jno dẽrapáitigo cucha údi ome Dupa Pujnuéngaisṍri to, mu a Dupade jé chĩropórase gosi to rĩ ome cutejmai gosi isijnaringuei uje que suse deo ome pate gajnarenguipísode udore.
13Mu datéringai u uje uacabóyo uaquejode ga arupaché Pangarádejnai gajnei aseradéjna ome uaqueducadode to. Ga uacajnicho: '¿Jé gotique gu a uje Pangarádejnai que chimesẽre yoqueranone cucha ome yoque to? Uje que yimójo dínique mu ome yoqueranone cuchiso ome to.' 14Quedéjnapise uacaruode udore quigode ome yu to uje chiese ca arajáyo uacabárique cucha to uje Dupade que chisápo uacanétique to rĩ. Cachi Pangarádejnai etétigai u uje uacasíyo uacaru ũrepísode ome uacacotedie ore to nanique iji uté iquei uje uacojnichome ore nanique: 'Gusu ua ome yu jne ga a yijnóra ua to jne iji deréjnane jnese.' Mu uaquecãcho uacacotedie iji uacacotépisedie ejode to. ¿Ama jé ca gajnareque uacasocade udore to a? uje uacacotedie, uacajõrápise ñane nanique, ga uacajnórañopise uacacotedie nanique iji ore úringanie gapu uéguei to nanique. Mu e chequepise ore to ga uacanganáchopo ore ujodie chequé quedéjna iji ore ejode to. 15Pangarádejnai Dupade u uje cháta ua aja bacoté nanique ga cho jeta uacaoi chojmarápise iji jnumi to nanique, jé aja uacáyipiedie to. Ga Dupade gajneque bacoté, uhuaque. Enga jnatupúsu jeta uacatígo cuse to, ga bacoté, ua, jé aja uacabode atojmaráñopísiji jnumi ome adode jnese to. Jecute Dupade pota jetiga jnanione chaquĩ́ra re to ome chequé quedéjnanie. Chamáñaje bacoté gajneque baru uréone udore nanique iji dáringa gapu, ga gajnarenguipísome Dupade ujetiga ca be udore quigode ome. 16Pangarádejnai, israélgosode yocangureni Dupa chósi tome uaque to: "Yetaguipise 'el divórcio.' Jecute ajusópise uacáyipiedie guio to ujetiga ca uacáyipiedie jno uacádi aja pisijnaringuérique to. Enga ca ajuécho uágome chequé quedéjnaraque ujetiga chijnime uacapotiguériguiji uacáyipiedie to. Chamáñaje yujãpise pacotedie iyásõreméone gu uje jecucha ore cha dacotedie to. Uje cho jetiga gosi cha dacotéraque enga e iyoguéode choqui iji guesode ome yu to."
Dupa Pujnuéngaisṍri uruode jé u udojo ome uaque.
A pajirique yocatígo aja quitígo jne iji dire uñeque jne
17Pangarádejnai chachopise uacacatecãraitigade ome re. Mu uacojnicho:
"¿Jé yoquipesutique a, uje chiese Dupade chacho tangári yoquicatecãraitigade ome uté to?"
Cachi iyonguerãque uaque to arĩa mu chiese ca arajáyo uacayoguérique to. Mu Pangarádejnai chacho uacacatecãraitigade uje uacacatecãchoi iji uacasijnaringuéone jmainie, enga cho jetiga angoninguite parique uágome to. Uje uacacacho uacarasade ga uacojnichome ore to: "Ueradéjna pisocade udojo ome Pangarádejnai Dupade to," mu táquechoquí uaque to uje Dupade chetaguipise pisocade udore to jnese. Enga uaque ga uacotigáso Dupade ujuyaquéode yúode to ga oyósi tome uacacadigode ore: 'A ca Dupade chajire yocadode aja quigode to. Jecute apéso uacapotigádode cucha to ga ca atodóyo Dupade yui.'
Currently Selected:
Malaquías 2: Ayore
Highlight
Share
Copy
Want to have your highlights saved across all your devices? Sign up or sign in
© 2021 Ethnos360