Malaquías 1
1
Dupade chijnorapise israélgosode uje jé ajegaite ore gu
1Pangarádejnai Dupade arecujaidie u udiji nanique ome israélgosode. Enga utocaidi u daruode atatasṍri Malaquías nanique ome daruode udore ome israélgosode ore ujetiga chingome uru quigode ome ore to nanique.
2Enga Pangarádejnai Dupade chósi tome israélgosode: "Yijnorapise israélgosode uaque jnese."
Mu achajnáñoi uté uruode ga ojnichome: "¿O ringome ujetiga yirajágo baruode úringane ũrepíso uje chiese ajnorapise yoque to?"
Pangarádejnai Dupade chajnai uacaruode udore to ga chojninga: "Yijnorapise uaque gu uje jé yajegaite uaque. Yijnoraquei ome uaque adi tu yijnoraquei ome uacayode jnani bajaque uñai uje i tu Jacob nanique. Uje uté uyai cuse to nanique, mu que yajegaite ore jnese nanique. 3Jacob u nanique uje yijnorapise nanique. Jé basa ga yetaque uyai Esaú to nanique. Esaú uté gajnei cucarãte ueradípise nanique iji taningai, mu quigade ga yĩro ¡taque, taque! nanique ga íjnoque ueratigai nanique ga nóña ga erãpe noñaque nanique. Quigade nanique ga que ayorérique cunguésõri gajnei jnupe nanique. Ga gusu cuchiso sijnángone nanique uje ore chácariji."
4Esaú uté ape disi ejode u edómgosode nanique, ga a ore chojningárasome Dupade: "Bãro yocuniri mu a yipécopo yocunire ueradéjnarique jne, ga a yocujnomei cusapo rĩ."
A ore urúrasu udore mu a Dupa Pujnuéngaisṍri a chajnárasi ore enga chojningárasome ore: "A apésopórasu uacanínique to rĩ, mu a yĩropórase ¡taque, taque! rĩ. A uacajnomei cuse mu pujnomé gajnarenguipise jne. Uje a ore chojninga: 'Sijnanguipise edómgosode ore.' Jeoga ore chojninga: 'Ore chijnimipise Pangarádejnai Dupade ájningai ome raque, ga ca Dupade ájningai uté chise deruei jne iji deréjna pitade jnese.'"
5Israélgosode uaque á, a amóño cucha dacadode udore enga a ojnicho jne: "Pangarádejna Dupa Pujnuéngaisṍri imenuringuei obiréjna iji yocuniri Israel tudé, mu yajico yocuniri uéchade jnese ga yimóngo uje uté chijna damenuringuei ome purása quedéjnane to."
Dupade uruode gajnaréngome darógode sacerdóteo udore uje ore isai tu picatecãraitigade ome Dupade ome darasade israélgoso
6Ga Dupa Pujnuéngaisṍre nararápo rĩ ga uruode unojo gajnengórone u darógode sacerdote udore uje ore isai tu picatecãraitigade ome Dupade ome darasade israélgoso. Ga chósi tome ore: "Yimo jnacarode uje ore tangaripísi dayode uruode. Yimópo pirógode ore rĩ uje ore dopísi darósorone uruode. Jé basa yirógode uje uacacatecãchoi uyu ome uacarasade israélgose ore ga quĩrique beyoi yáyipiedie quigode. Ujetiga jé ũré enga uacai tu yu, enga ¿gotique gu a uje que angáchoi yu to? Ujetiga uacarósõri u yu, ga ¿jé gotique to a uje que beyoi yuruode quigode? Jé ũrepise yuruode udore ome uaque to uje uacadojnóchopísaja yu iji deréjnane jnese.
Mu yiraja uje a uacuñeque chajnárasi yuruode udore to ga uacuñeque chojningárasa: 'Taguipise ua. Que yidojnójoja ua gotique to. Enga atata yoquisocárigo uje chiese yidojnójoja ua to.'
7A yingopísa uacachietabáitigade aja uaque to jne. Uje uacapesute yaseradéjnai úringai noñaque gatuaque.
Mu uacojnichome yu: 'Taguipise ua. ¿Ama yipécorásu baseradéjnai iñoñaringuérique to a? Enga atata baruode quitígo ome yoque to.'
Mu yósi tome uaque: Que apéso yajéchietaringuérique to enga uacoyo cucha bisidéguiji yaseradéjnai to. 8Yiraja uje uacacacho uacarasade ome ore guẽrapáidode cucha ome yu uje chiese jé arec jeta ore tẽrája yu ome dachite edoparigode to, jeoga cucha ibicaque, ga ore chisi ome yu to. Jeoga péroque, jeoga ejnarétaque. Jecute ore di yojningane udojo údi iji uaque, enga jĩraque uacasayo yojningane udojo ga uaquẽchome yu to. ¿Ama ueradéjna uacasocade udojo ome uaque to a?" Beyoi uacachite ejnaretade, edoparigode ore, tatógode ore enga boyo ore údi aja uaqueduguéjna gobernador to, enga ajicho jeta uté chisa to jeoga chetaque to. Jeoga irasiguipise re ome uaqueranone udore to jne.
9Jecucha Pangarádejnai Dupade irógode sacerdote uaque uacajóchayo Dupade ajei údi ga uacojnichome: "Dupade á, atapísaja yoque to, ga yimóngo bosongaquédatérigo ome israélgosode uyoque to."
Mu ujetiga jé boyo uacasocade udore údi uje uaquẽcho Dupade ome cuchiso noñángone, enga ca anguretáyo jetiga Dupade chátaja uágome cuchárique to. Uje Dupade a ca chise uacasocade unétique enga a ca toc jetiga tẽrája uaque to ome cuchade.
Ga Pangarádejnai Dupa Pujnuéngaisṍre uruode u udojo ome uaque to. 10Ga chojninga: "Ueradi turásu ome yu jeta yirógode uacuñeque doi yiguíjna cuchábi ga surúrasu gai ujetiga ca piquetápo piotíguiji yaseradéjnai gai to rĩ ome uaquẽrapáidode cuchiso yúode. Uje cachi uaquẽrapáidode cucha ome yu u cuchiso edoparigode, pérogode ore gu. Enga que yise yirógode uacanétique to enga a ca yajirápo uaqueranone cuchiso yúode to jne rĩ. 11Yanguresórone déji erámi údode jnese ga punirone unirisórone udore ore chijnorapise yu enga ore chĩ́care yi ueradéjnai uje ore catecã́ri yu. Enga ore gueranone inciénso ai uneréjnapise chise yu gatuaque uje ore chãru iji yiquei. Enga ore gueranone cucha uñane ome yu ueradéjnapise jnese. 12Udore ore cho cuchadaté iji yi uté, jé basa israélgosode uaque uacoyo cucha bisidéguiji yi uté. Chamáñaje uacarajáyo uje yaserani uje uaquẽcho cuchisode ome yu iji gai gajnui turásu ayorérique jeta taguíji damésa gai ome dabose ueradode. Mu cho jeta yácariji yaseradéjnai gai mu yirógode uaque uacaboyo yajnéone cucha piboso gajnaréngone údi ome yu iji uté to. 13Yudute uacaruode to que uje uacojnicho: '¡Uajadipíso Dupade iroquéode to ga yachógopise to!' Ga yanírone u unojo ome uaque to uje uacoyo uacarósõri iji yu, mu uacabóyoja uaque to ome yiroquéode. Que gusu cuchiso bajade unojo uje uaquẽcho ome yu to, mu uaquẽcho uacoridode cuchiso ome yu to, jé aja aquirájna tatóguedie, ejnaretedie ore to rĩ. Mu chiese yirasiguipise uaqueranone cucha to, ga chiese yisa ga que cucha ome yu úringane cucha ajnangócho. Uje chiese yapuse cuchisode aja jnese ome yaserani ga yirasiguipise yu ome uaqueranone jnese ome yu.
14Yurugaidipise gosi jne ujetiga chojningame yu: 'A yisíome yachite ueradéjnarique ome ua to jne.' Mu doi gachidode ga chajire ga chijnime cucha ajnangoi tiji ujade ga jé chisi ome yu to, ga jos eti ca yiraja urupatáringane quigode ome yu to. Cachi Eduguéjna Cuchape yu to arĩa ga yujnué peduguéjna cuchábode gáyode jnese iji erámi údode jnese. Ga jé yitiógarapísa yúringárique Pangarádejna iji erámi údode jnese to."
Yatatagode udore jnese que cachi yurúo to mu Dupa Pujnuéngaisṍri uruode u to. Jecute angachopísi quigode to.
Currently Selected:
Malaquías 1: Ayore
Highlight
Share
Copy
Want to have your highlights saved across all your devices? Sign up or sign in
© 2021 Ethnos360