Mat Ũelesyo wa Ĩvuku Yĩĩ
KAMBA

Mat Ũelesyo wa Ĩvuku Yĩĩ

Ũelesyo wa Ĩvuku Yĩĩ
Ũvoo Mũseo o tondũ ũandĩkĩtwe nĩ Mathayo wĩtavany'a ũvoo kana Yesũ nĩwe Mũtangĩĩi ũla wathanĩtwe, na ũla kwĩsĩla kwake Ngai weanĩisye watho ũla wamathie andũ make nthĩnĩ wa Ũtianĩo Mũkũũ. Ũvoo ũũ Mũseo ndũandĩkĩwe mbaĩ ya Ayuti yĩ yoka, vala nĩvo Yesũ wasyaĩiwe na eanĩa, ĩndĩ ũandĩkĩtwe kwondũ wa andũ ma nthĩ yonthe.
Ĩvuku yĩĩ ya Mathayo yĩandĩkĩtwe yĩatĩanĩw'e nesa. Yambĩlĩĩlye na kũsyawa kwa Yesũ, na yĩkaelesya kũvatiswa na kũtatwa kwake. Kuma vau nĩyĩeleetye wĩa wake wa kũtavany'a, kũmanyĩsya, na kũvosya awau andũnĩ ma Kalilii. Ĩtina wa ũu, ĩvuku yĩĩ nĩyĩwetete ĩũlũ wa kyalo kya Yesũ kya kuma Kalilii na kũthi Yelũsalemu, na maũndũ ala meekĩkie kyumwanĩ kyake kya mũthya kũũ nthĩ. Yĩminũkĩlĩĩlye na kwambwa kwa Yesũ ngelany'onĩ na kũthayũũka kwake.
Ĩvuku yĩĩ yonanĩtye Yesũ ta we mũmanyĩsya ũla mũnene wĩ na ũkũmũ wa kũelesya Mĩao ya Ngai, na ũmanyĩasya ĩũlũ wa Ũsumbĩ wa Ngai. Maũndũ maingĩ ala ũmanyĩĩtye nĩmatũngĩanĩwe kũndũ kũtano: (1) Ũtavany'a wake Kĩĩmanĩ, naw'o nĩ ĩũlũ wa mwĩkalo wa andũ ala ma ũsumbĩ wa ĩtunĩ, mawĩa moo, ĩtuvi yoo na vala melekele (Kĩlungu 5-7). (2) Ũmanyĩsyo wa Yesũ kwa amanyĩw'a make ĩkũmi na elĩ ĩũlũ wa ũthũkũmi woo (Kĩlungu 10). (3) Ngelekany'o syake ĩũlũ wa ũsumbĩ wa ĩtu (Kĩlungu 13). (4) Ũmanyĩsyo ĩũlũ wa mwĩkalo ũla waĩlĩte mũatĩĩi wa Yesũ Klĩsto (Kĩlungu 18). (5) Ũmanyĩsyo ĩũlũ wa mũminũkĩlyo wa nthĩ na kũka kwa Ũsumbĩ wa Ngai (Kĩlungu 24 na 25).
Maũndũ ala me Ĩvukunĩ Yĩĩ
Aaũmae ma Yesũ Klĩsto na kũsyawa kwake 1.1—2.23
Ũthũkũmi wa Yoana Mũvatisi 3.1-12
Kũvatiswa kwa Yesũ na kũtatwa kwake 3.13—4.11
Ũthũkũmi wa Yesũ andũnĩ ma Kalilii 4.12—18.35
Yesũ ayuma Kalilii na kũthi Yelũsalemu 19.1—20.34
Yesũ e vakuvĩ na Yelũsalemu na e nthĩnĩ wayo kyumwanĩ kyake kya mũthya e kũũ nthĩ 21.1—27.66
Kũthayũũka kwa Mwĩai na kũmaumĩlĩĩla amanyĩw'a make 28.1-20