2Mak 15
15
Mũvango Mũthũku wa Nikanoli
1Nikanoli nĩwesie kũmanya kana Yuta Makambii na andũ make maĩ kĩsionĩ kya Samalia, na kwoou atw'a kũthi kũmavithũkĩa mũthenyanĩ wa Savato, ũla mataĩ matonya kũmwĩka ũndũ. 2Ayuti ala malikĩtw'e na vinya nguthunĩ ya asikalĩ make, nĩmatatie kũmwĩsũva ndakathi kũaa andũ asu kwa nzĩa ĩthũkĩte ũu, ĩndĩ anenge ndaĩa mũthenya ũla Ngai, ũla wonaa maũndũ onthe, wavathie na aũthesya mbee wa mĩthenya yonthe. 3Nĩvo ĩndĩ Nikanoli, mũndũ ũũ mũthũku kwĩ andũ onthe ĩũlũ wa nthĩ, wamakũlilye kana ĩtunĩ ve mũsumbĩ ũla wameaĩie malilikanae mũthenya wa Savato. 4Nĩvo ĩndĩ mamũsũngĩie mamwĩa atĩĩ, “Ĩĩ, Mwĩai ũla wĩ thayũ, Mũsumbĩ wa ĩtunĩ, nĩwe watwĩaĩie tũlilikanae mũthenya wa Savato.” 5Ĩndĩ Nikanoli nĩwamasũngĩie amea atĩĩ, “Nakwa ninyie mũsumbĩ wa nthĩ, na nĩmwĩaĩa mwose mĩio ya kaũ na kwĩka ũndũ mũsumbĩ ũkwenda.” Ĩndĩ ndaaĩsa kwĩanĩĩsya mũvango wake mũthũku.
Yuta Makambii Ayũmbany'a Asikalĩ make Mathi Kaũnĩ
6Nũndũ wa ngathĩĩo syake mbingĩ na ũng'endu, Nikanoli avangĩte kwaka kĩtuĩ kya ũlilikany'o nũndũ wa kũsinda Yuta Makambii na asikalĩ make. 7Ĩndĩ Yuta Makambii aendeeie kwĩthĩwa na mũĩkĩĩo mũlũmu kana Ngai akamũtethya. 8Nĩweekĩie asikalĩ make vinya nĩ kana maikakĩe mavithũkĩwa nĩ Andũ-ma-mbaĩ-ingĩ, ĩndĩ malilikane ũtethyo ũla makwatĩte kuma kwa Ngai ĩvindanĩ ĩvĩtũku, na mayĩĩkĩĩa kana ĩvindanĩ yĩĩ o nayo Mwene Ũtonyi W'onthe nũkũmatethya. 9Nĩwamathangaaisye kwa kũmalilikany'a ndeto sya mĩao na sya athani, na kũmalilikany'a makaũ ala mokitĩte na makasinda, na kwoou atuma methĩwa na wendi wa kũthi kaũnĩ. 10Amina kũmekĩa ũkũmbaũ, nĩwameaĩie na o ta ũu amea nĩmesũvĩe ũkengani wa Andũ-ma-mbaĩ-ingĩ, nũndũ nĩmevĩtaa wĩvĩto na mailea kũwĩanĩsya. 11Nĩwoombanisye kĩla ũmwe woo, ti kwa kwĩkwatya ngao na matumo, ĩndĩ kwa kũmatavya ndeto sya kũtuma methĩwa na ũkũmbaũ, na amatanĩthya kwa kũmatavya ĩũlũ wa ndoto yake ya mũthemba wa woni ũla waĩ ũtonya kũĩkĩĩwa. 12Woni wake wailyĩ ta ũũ: Oonie Oniasi, ũla waĩ Mũthembi Mũnene, mũndũ waĩ wa ndaĩa na mũseo, waĩ wĩnyivyo na mũuu, mũneeni mũseo mũno na wamanyĩĩtw'e kwĩkala thayũ wa kwĩkaa ũla ũseo kuma wana wake. Amwonie atambũũkĩtye moko make ĩũlũ akĩvoyea mbaĩ ya Ayuti yonthe. 13Yuta Makambii nĩwasyokie oona mũndũ ũngĩ wa kwendeesya waĩ na mbuĩ, mũndũ wĩ ndaĩa na waĩ na ũtonyi. 14Oniasi nĩwaneenie asya atĩĩ, “Ũũ nĩ Yelemia, mwathani wa Ngai, ũla wendete andũ ma mbaĩ yake na ũmavoyeaa mũno, na kũvoyea Yelũsalemu ndũa ntheu.”
15Nĩvo ĩndĩ Yelemia watambũũkisye kw'oko kwake kwa aũme na amũnenga Yuta Makambii ũvyũ wa thaavu akĩmwĩa atĩĩ, 16“Osa ũvyũ ũũ mũtheu, nĩ mũthĩnzĩo kuma kwa Ngai; ũkamina amaitha maku naw'o.”
17Ndeto nzeo ila Yuta Makambii waneenie nĩsyathangaaisye kĩla mũndũ eethĩwa na ũkũmbaũ, na syatuma anake mew'a matonya kũkita ta andũ aima. Kwoou nĩmatwie kana o na mayĩamba maeema ma kaũ, ĩndĩ methi ĩmwe ta ngũmbaũ mavithũkĩe amaitha moo, nũndũ ndũa yoo, ũthaithi woo mũtheu na Ĩkalũ, syaĩ mũisyonĩ. 18Mayathĩnaa mũno mathayũnĩ moo nũndũ wa iveti syoo na syana, ana-a-inyia na andũ moo, ta ũndũ mathĩnĩkaa thayũnĩ nũndũ wa Ĩkalũ yĩu ĩtheu. 19O namo ala maaĩlĩte kũtiwa ndũanĩ mathĩnĩkaa o ũu, maisaanĩw'a kaũ ũsu ũkũkitĩwa vandũ ũtheinĩ wĩĩsa kwĩthĩwa ũilyĩ ata.
Kũsindwa na Kũawa Kwa Nikanoli
20Yĩla kĩla mũndũ weeteelete one kĩla kĩkwĩsa kwĩkĩka, na amaitha moo makathengeea meyũmbanĩtye kũkita, na nzou ikavangwa kũndũ kũseo na asikalĩ malĩsĩte mbalasinĩ makaũngama kĩla ngalĩko, 21Yuta Makambii nĩwasyaisye oona asikalĩ aingĩ ala maĩ mbee wake me na mĩio yoo ya kaũ yĩ kĩvathũkany'o, na nzou syoo mbai. Nĩvo ĩndĩ wookĩlilye moko make melekele ĩtunĩ, na amwĩkaĩla Mwĩai ũla wĩkaa syama, aimanya kana ũsindi ndũetawe nĩ mĩio ya kaũ, ĩndĩ wumanaa na ũtw'ĩo wa Mwĩai, ũla ũnengae ũsindi o ũla waĩlĩte. 22Nĩwavoyie Ngai asya atĩĩ, “We Mwĩai, nĩwatũmie mũlaĩka waku ĩvinda ya Esekia mũsumbĩ wa Yutia, na ooaa asikalĩ ngili ĩana na mĩongo nyanya na itano ma Senakelivu. 23Kwoou yu Mwĩai wa ĩtunĩ, tũma mũlaĩka waku mũseo mbee waitũ, atume amaitha maitũ matelema na kũtetema nĩ w'ĩa. 24Makũne ũmamine na kw'oko kwaku kwĩ vinya, andũ aa makũumangaa na mokie kũtũkita ithyĩ mbaĩ yaku ntheu.” Yuta Makambii nĩwaminie mboya yake na ndeto isu.
25Nikanoli na asikalĩ make nĩmathengeeie mokite, mavuvĩte masoo na kwina mbathi sya kaũ, 26ĩndĩ Yuta Makambii na asikalĩ make malikile kaũnĩ mavoyete na kũmwĩsũva Ngai. 27Kwoou mayũkita na moko moo, na kũmũvoya Ngai ngoonĩ syoo, nĩmooaie andũ mbee wa ngili mĩongo ĩtatũ na itano. Nĩmeewie mũyo mũno nũndũ Ngai nĩweeyonanisye kũla maĩ. 28Kaũ wathela, Ayuti menũkĩte me na ũtanu mwingĩ, nĩmoonie Nikanoli avalũkĩte nthĩ e mũkw'ũ e na mĩio yake yonthe ya kaũ. 29Nĩvo ĩndĩ mookĩlilye mawasya, malonzany'a na mamũtaĩa Mwĩai Mũsumbĩ na kĩthyomo kyoo ene.
30Yuta Makambii, ũla mavinda onthe wokitĩaa andũ make na vinya wake w'onthe na ngoo yake yonthe, enenganĩte o tondũ weeyumĩtye e mwanake, nĩweeaĩie asikalĩ make matile mũtwe wa Nikanoli na kw'oko kwake kwa aũme na mayĩikua maitwae Yelũsalemu. 31Yĩla mavikie Yelũsalemu, nĩweetie andũ onthe moombana vamwe, aũngamya athembi mbee wa kĩthembeo, na atũmana asikalĩ ala maĩ mwakonĩ mũlũmu. 32Nĩwamonisye mũtwe wa Nikanoli, mũndũ ũsu waĩ mũumanĩe, na kw'oko kwa mũndũ ũsu mũthũku kũla wookĩlilye na ngathĩĩo aneenea Ĩkalũ ĩtheu ya Ngai Mwene Ũtonyi W'onthe. 33Nĩvo ĩndĩ Yuta Makambii watilile ũĩmĩ wa Nikanoli mũndũ ũsu ũtamũkĩaa Ngai na eeyĩaa ũnengawe nyũnyi kĩlungu kwa kĩlungu, naw'o mũtwe wake ũikolelw'a vau mbee wa Ĩkalũ, wĩthĩwe ũkũsĩ wa ĩtuvi ya ũtumanu wake. 34Nĩvo ĩndĩ andũ onthe masyaisye ĩũlũ ĩtunĩ na mamũtaĩa Mwĩai ũla weeyonanĩtye kwoo mayasya atĩĩ, “Ũkathwe we, ũla ũsũvĩie wĩkalo waku ndũkavukw'e!” 35Yuta Makambii nĩwakoleilye mũtwe wa Nikanoli ũkũtanĩ wa mwako mũlũmu, wĩthĩwe ũkũsĩ wĩ ũtheinĩ kwa kĩla mũndũ kana Mwĩai nũmatethetye. 36Andũ onthe nĩmavĩtũkĩthisye kwa kũkũna kula kana maikolwa nĩ mũthenya ũsu, ĩndĩ makaũtanĩaa kĩla mwaka, mũthenyanĩ wa ĩkũmi na itatũ, mwei wa ĩkũmi na ilĩ, ũla kwa Kĩalamaiki wĩtawa Atali. Mũthenya ũsu nĩ ũla wĩ mbee wa Mũthenya wa Molitekai.#15.36 Mũthenya wa Molitekai: Ũũ nĩ mũthenya ũla Mboka ya Vulimu yatanĩawa nũndũ wa kũnenga Esita na Molitekai ndaĩa, nũndũ wa kũtangĩĩa Ayuti ala matwĩe Velisia (Sisya Esita 9.17-22)
Ndeto sya Kũmina
37Ũu nĩw'o ũndũ mũminũkĩlyo wa Nikanoli wailyĩ. Kuma ĩvinda yĩu ndũa ya Yelũsalemu yĩkalĩte mokonĩ ma Ayuti. Kwoou o nakwa nĩngũminĩa ũvoo wakwa vaa. 38Ethĩwa ũvoo ũũ nũtavanĩtw'e nesa na ũkaelew'a kwa ũtheu, nĩneanĩsya kĩeleelo kyakwa. Ĩndĩ ethĩwa ũtavanĩtw'e naĩ na ti wa kwendeesya, ũu now'o nĩĩ ndonya. 39O tondũ twĩsĩ kana kũnyw'a ndivai yĩ yoka ti ũseo, na o na kũnyw'a kĩw'ũ kĩ kyoka ti ũseo, ĩndĩ ndivai yavulanw'a na kĩw'ũ yĩ mũyo, nĩyendeeasya na nĩtumaa mũndũ aendeea kũtana, now'o ũvoo mũseo ũtavanĩtw'e na ũĩ wendeeasya ala meũwĩw'a. Yu ĩndĩ nakwa nĩminĩa vau.
Currently Selected:
2Mak 15: KAMBA
Highlight
Share
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011