Malakiya 3
3
1Haane, Zı g'axuvuna ı'qqə vor.
Mana Zale ögee ark'ın yəq qaa'as.
Şu t'abal ha'ana Xudaavand
sayangara Cune İyerusalimeene xaaqa qales.
Şos g'aces ıkkanna, mugaavileyn cuvab
allesda qales.
Məxüd Xəəne G'oşunbışde Rəbbee eyhe!
2Vuşune öörxəs Rəbb qarıne yiğıl?
Vuşune öörxəs Mana qarımee?
Mana xhiməə qa'an ts'a xhinneyiy
mətta'an sap'ın xhinne ixhes.
3Rəbbee Leviyna nasıl mətta'as.
Mang'vee man k'ınəəğəyiy nuk'ra ts'ayıka rışşi qı'ı,
mətta'ane insanee xhinne ha'as.
Mançile qiyğa manbışe Rəbbis qotkuyn q'urbanbı allya'as.
4Manke Yahudayne ölkeeyiy İyerusalimee
avaalıyne yiğbışil allya'an,
ögiylyne senbışil allya'an q'urbanbı xhinne
Rəbbisqa yugda qales.
5Zı vuşun məhkama alğahasdemee, şosqa ayres.
Cadubı ha'anbı, zina ha'anbı,
horbışika k'ın g'iysaranbı, işçiyn pıl qidelenbı,
adamer hapt'ı avxuyn yedariy
dek, yed dena avxuyn uşaxar t'yaats'axal haa'anbı,
menne cigeençe qabıynbı g'e'eebaşenbı,
Zale qı'dəəq'ənanbı man şu ha'an karbı
Zı sık'ınne gahıle aq'valqa qığahas!
Məxüd Xəəne G'oşunbışde Rəbbee eyhe!
6Zı Rəbb vorna, badaldexhena.
Yaaq'ubıke g'abıynbı, şunab badal meebaxhe!
7Yizde əmrbışilqa şu dekkaaşine gahıle gibğıl
yı'q'bı sak'al ha'a.
Zalqana savk'le, Zınar şolqa sak'alasda!
Məxüd Xəəne G'oşunbışde Rəbbee eyhe!
Şossemee «Nəhı'bna savk'alasva?»
qidghınıd ha'as əxə.
8İnsaneeyid Allahıke qöqəyee?
Şumee Zake qöqən.
«Vake hucoona qöqəva?» şosse qiyghanas əxə.
Yits'ınçina sa pay#3:8 Yits'ınçina sa pay: Allahee İzrailybışis huvuyne Q'aanune otk'unin: şagavnayiy həyvanaaşina yits'ınçina pay Allahne yəqqə hevles vukkan. Mane Allahne yəqqə huvuyne karaka Allahın Xav havace ıxha. Mane karake sayıd maane kaahinaaşe otxhan ıxha., sayid Zas ikkekan.
9Milletıncad Zake qöqənçil-alla,
vuşde gırgıng've bed-düə alyapt'ı.
10Yits'ınçina sa pay bıkırba able,
Yizde xaa oxhanasın kar ixhecen.
Şu mançika Zı siliys ı'xe!
Nya'a, Zı mançile qiyğa şos xəən g'uleppı aaqas dişde,
hexxalika barakat hevles dişde?
Məxüd Xəəne G'oşunbışde Rəbbee eyhe!
11Zı ts'irtyaaşisqa vuşun ezuyn
kar oxhanas hassaras deş,
vuşde tayangbışile t'ımılid nyaqacad ixhes deş.
Məxüd Xəybışde Xərıng'vee Rəbbee eyhe!
12Vuşda ölka micagne cigalqa savk'uva,
gırgıne milletbışecad şok'le baxtivarva eyhes.
Məxüd Xəəne G'oşunbışde Rəbbee eyhe!
Qopkuynbışda hək'
13«Şu Zak'le ivdyaak'asın cuvabbı uvhuva»
Rəbbee eyhe.
Şossemee «Nya'a, şi Vak'le hucoone uvhuva?»
qiyghanas əxə.
14Şu uvhuyn: «Allahıs ı'bəədat hı'iy,
nişiscad karaı'dəən kar vodun.
Mang'vee eyhenbı hı'ı,
Xəəne G'oşunbışde Rəbbine ögiyl hapq'ır iviykıriyke nya'a,
şas hucoone ıxha?
15Şi həşde cocab-co axtıba vukkekanbışik'le
baxtivararva eyhe.
Qəlasın ha'anbışin işbıd yugda ayk'an,
Allah siliys ı'xı'yxənbıb cazaake g'ittiviyxhananbı».
16Mane gahıl Rəbbile qəvəyq'ənanbı
sana-sang'uka yuşan haa'a vooxhe.
Manbışe yuşan ha'an Rəbbik'le g'iyxhe ıxha,
Mang'vee mançil yugda k'ırı iliyxhe.
Rəbbile qəpq'ı'n Mang'une doyus hı'rmat giviyxhenbışdemee,
Mang'une ögiyl manbışin işbı oyk'anan kitab aaqı eyxhe.
17Xəəne G'oşunbışde Rəbbee eyhen:
– Mane yiğıl Zı manbışike Zas gıranın insanar haa'as.
Dekkıs vucee eyhen ha'ana dix nəxüriy qiykkan,
Zasıb manbı məxüb qivikkanasınbı.
18Mane gahıl şosse qorkung'uke pisda,
Allahıs g'ullux ha'ang'uke hidya'ana
meer curaa'as əxəsda.
Currently Selected:
Malakiya 3: YIQSUM
Highlight
Share
Copy
Want to have your highlights saved across all your devices? Sign up or sign in