Malakiya 2
2
Kaahinaaşis bed-düə haa'a
1-2Xəəne G'oşunbışde Rəbbee eyhe vod:
– Kaahinar, ina əmr həşde vuşdemee vob:
Yizde cuvabıl k'ırı ilydiyxheene,
Yizın do yik'eençe axtı qıde'eene,
şolqa bed-düə gyooğav'u,
vuşun xayir-düəbı bed-düəlqa sak'al ha'as.
Şu Yizın do yik'eençe axtı qıdi'ıva,
şu Yizda bed-düə alyapt'ınacab.
3Zı şol-alla şoke g'abıynbışikınıd ha'asın.
Bayrambışil şu q'urbanna alli'iyne həyvanaaşin xhidbı
Zı vuşde aq'vabışile k'ena ı'xəs,
mançika sacigee şu dağaa'as.
4Manke şok'le ats'axhxhes,
Zı mana əmr şoka, Leviyne nasılıka, hav'una mugaavile
aaxvecenva g'axuvu.
Məxüd Xəəne G'oşunbışde Rəbbee eyhe!
5Zı Leviyne nasılıka barakatnana ı'mı'r
hoolena mugaavileniy hav'u.
Zas hı'rmat gyuvxhuva,
Zı manbışis man gırgın huvuyn.
Manbıb Zale qəpq'ı'ninbı,
Yizde doyusub hı'rmat gyuvxhuna.
6Manbışde mizel qopkuna Q'aanun vuxha,
ghaleençed horbı qığeeç'enbı deşdiy.
Manbışe Yizde ögiyl yugnayiy qopkuna ı'mı'r hav'u.
Geebınbı manbışe yəqqı'lqa sav'u.
7Kaahinaaşine ghalen ats'al havaces ıkkan,
insanaaşisse manbışde mizele
Q'aanun t'abal haa'as vəəxecenva.
Kaahinar Xəəne G'oşunbışde Rəbbee g'axuvuynbı vob.
8Şumee, kaahinar, yəqqı'le qığeepç'ıynbı,
şu helene ats'aalybışika
mansanbıb şoqab qihna habğı.
Zı Leviyne nasılıka hav'una mugaavile
şu havakkal hav'una.
Məxüd Xəəne G'oşunbışde Rəbbee eyhe!
9Şu Yizde yəqqı'n apk'ın deş,
Q'aanunuka g'acesde işbışee,
şu gırgıng'uqa sa uleka ilyaakı deş.
Mançil-allab Zı şu milletnecab g'eliqqa hevles,
k'ap'ik'ıle avqa qaa'as.
Yahudayne milletın Allahıkana mugaavile havaakal haa'a
10Yişda gırgıng'una Dek sa dişde vor?
Şi sa Allahee dişde ipxhın?
Nya'a manke şi dekkaaşika hav'una mugaavileyna
muq'addasiyvalla avaakan haa'a,
sana-sang'us horbı ha'a?
11Yahudayne milletın Allahıs xayaanat hı'ı.
İzraileeyiy İyerusalimee həlyvəəq'ənasın işbı hı'ı:
Yahudabışee menne allahbışis
ı'bəədat ha'an yedar hav'u,
Rəbbis ıkkananne, muq'addasne cigayna
muq'addasiyvalla avaakan hav'u.
12Man hı'ına insan vuşu ıxhay ixhecen,
Xəəne G'oşunbışde Rəbbis q'urban ablyaa'ana çikana ixheeyir,
Rəbbee mana Yaaq'ubne çadırbışisse g'e'eşşecen.
13Şu in karıd ha'an:
gyaaşu-gyaaxu, Rəbbin q'urbanbı allya'an cigad
ulene nağıka gyatsts'a'an.
Məxüd, şu adıyne q'urbanıqa Rəbb sak'ı ilydakkava,
manbı şoke ilydyaat'ava ha'a.
14Şosse «Nişil allavane?» qidghın ha'as əxə.
Ğu mek'vranang'a hey'iyne zəiyfayneyiy yiğne yı'q'nee
Şahad Rəbb vorna.
Ğu, mana yiğna nikahıkana xhunaşşe yixhayka ilydyakkı,
məng'ı's xayaanat hı'ı.
15Allahee şu sa tan, sa rı'h xhinne dişde ipxhın?
Nya'asdiyxan Mang'us şu sa vuxha vukkan?
Mang'us Cunemee nasılniy vukkan.
Mançil-allab şucab şu havaace.
Hasre şavaacad mek'vranang'a hey'iyne xhunaşşeys
xayaanat hıma'acen.
16İzrailyne Allahee, Rəbbee eyhen:
– Xhunaşşeyka yugra dexhena,
mana qıxeelena Zak'le g'ımece vor.
Mançil-allad şucab şu havaace,
xayaanat hıma'a!
Məxüd Xəəne G'oşunbışde Rəbbee eyhe!
Rəbb məhkama alğahas ayres
17Vuşde yuşan hav'uyn Rəbb ozar ha'a.
«Nəxürne şi Mana ozar ha'ava?»
şosse qiyghanasıd əxə.
Şu eyhen:
– Qəlasın ha'anbı Rəbbine ulesqa yugba qöö,
Rəbbis manbı vukkananbı.
Şucadıd meed eyhen:
– Qopkuvalin məhkama alğayhena Allah nyaane?
Mançikar şu Mana ozar ha'a.
Currently Selected:
Malakiya 2: YIQSUM
Highlight
Share
Copy
Want to have your highlights saved across all your devices? Sign up or sign in