EVASELIO A MATEO 1
WB2011

EVASELIO A MATEO 1

1
Hakoga o Sesu ia Salomone mo Sosefo
1Ko te hakoga o Sesu-Kilisito, foha o Tavite, foha o Apalahamo.
2Ko Apalahamo nee tupu ai ia Isaake; ko Isaake nee tupu ai ia Sakopo; ko Sakopo nee tupu ai ia Suta mo ona tehina; 3ko Suta nee tupu ai ia Pelesi mo Sala kia Tamale; ko Pelesi nee tupu ai ia Eselome; ko Eselome nee tupu ai ia Alame; 4ko Alame nee tupu ai ia Aminatape; ko Aminatape nee tupu ai ia Naasone; ko Naasone nee tupu ai ia Salamone; 5ko Salamone nee tupu ai ia Poase kia Laape; ko Poase nee tupu ai ia Opeto kia Lute; 6ko Opeto nee tupu ai ia Isaia; ko Isaia nee tupu ai ia Tavite.
Ko te hau ko Tavite nee tupu ai ia Salomone ki te ohoana o Ulio; 7ko Salomone nee tupu ai ia Lopoamo; ko Lopoamo nee tupu ai ia Apisa; ko Apisa nee tupu ai ia Asa; 8ko Asa nee tupu ai ia Sosafate; ko Sosafate nee tupu ai ia Solame; ko Solame nee tupu ai ia Osiasi; 9ko Osiasi nee tupu ai ia Soatame; ko Soatame nee tupu ai ia Akase; ko Akase nee tupu ai ia Esekiasi; 10ko Esekiasi nee tupu ai ia Manase; ko Manase nee tupu ai ia Amone; ko Amone nee tupu ai ia Sosiasi; 11ko Sosiasi nee tupu ai ia Sekoniasi mo ona tehina, i te temi o te aunofo i Papilone.
12I te osi o te aunofo i Papilone, ko Sekoniasi nee tupu ai ia Salatiele; ko Salatiele nee tupu ai ia Solopapele; 13ko Solopapele nee tupu ai ia Apiuti; ko Apiuti nee tupu ai ia Eliakimi; ko Eliakimi nee tupu ai ia Asole; 14ko Asole nee tupu ai ia Satoke; ko Satoke nee tupu ai ia Akimi; ko Akimi nee tupu ai ia Eliuti; 15ko Eliuti nee tupu ai ia Eleasale; ko Eleasale nee tupu ai ia Matane; ko Matane nee tupu ai ia Sakopo; 16ko Sakopo nee tupu ai ia Sosefo, ohoana o Malia, ae nee ina fanaui ia Sesu, ae nee higoa ko Kilisito.
17Nee fakatahii fuli leva ko taitupu e hogofulu ma fa maia Apalahamo o kaku mai kia Tavite, pea mo taitupu e hogofulu ma fa maia Tavite o kaku mai ki te aunofo i Papilone, pea mo taitupu e hogofulu ma fa mai te aunofo i Papilone o kaku mai kia Kilisito.
Tupu fakamilakulo o Sesu-Kilisito
18Koeni leva te aluaga o te tupu o Sesu-Kilisito: Ko Malia, tana fae, nee fakapapau ohoana mo Sosefo, pea ia mua o tana nonofo fakatahi, nee faitama leva ia ia i te Laumalie Maonioni. 19Ko Sosefo, tona ohoana, ko he tagata lelei mo agatonu, pea nee mole loto ia ia ke ina fakalainoa ia Malia, koia nee ina fakatotonu ai leva ke veteki fakafufu tana fakatahi. 20Nee kei lolotoga fakakaukau ia ia ki te mea aia, pea fokifa pe kua ha he aselo a te Aliki kia ia i he moemisi, o ui: Sosefo, foha o Tavite, aua naa ke tuania i te too mo koe o Malia, tou ohoana, koteuhi ko te toe ae kua tupu ia ia e hau mai te Laumalie Maonioni. 21E ina fanaui anai he tama, pea e ke foaki anai kia ia te higoa ko Sesu; ko ia ae e ina haofaki anai tana hahai mai anatou agahala.
22Nee hoko leva te u mea fuli aia o tupu ke fakahoko ai te mea ae nee fakaha e te Aliki i te polofeta:
23 Koeni, e faitama anai te taupoou, e ina fanaui anai he foha,
Pea e foaki anai kia ia te higoa ko Emanuele,
ko tona uhiga ko te Atua mo tatou.
24I tana ala ake, nee fai leva e Sosefo te mea ae nee fakatotonu age kia ia e te aselo a te Aliki, pea nee ina too leva tona ohoana mo ia. 25Kae nee mole ina iloi leva ia Malia o kaku ki te fanaui e Malia he tama, ae nee tuku leva ki ai e Sosefo te higoa ko Sesu.

© 2011, Eglise évangélique, chez Lotoato Logote Hihifo, Vaitupu, Wallis

  • Les droits sont administrés par Midi Bible, une branche de la Société Biblique de Genève
  • Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland

Learn more about Ko te Tohi Tapu i te fakauvea

Encouraging and challenging you to seek intimacy with God every day.


YouVersion uses cookies to personalize your experience. By using our website, you accept our use of cookies as described in our Privacy Policy.