EVASELIO A MATEO 2
2
Te kau masi
1Nee tupu ia Sesu i Petelehemi i Sutea, i te temi o te hau ko Helote, pea nee kaku mai leva he kau masi mai Olieto ki Selusalemi, 2pea nee natou ui leva: Kofea te hau o te kau Sutea ae nee hoki tupu? Koteuhi nee matou sisio ki tona fetuu i Olieto, pea nee matou omai o atolasio ki ia.
3I te logo a te hau ko Helote ki te mea aena, nee hohaa leva tona loto, pea mo Selusalemi katoa. 4Nee ina fakatahii leva te kau pule faisakilifisio fuli mo te kau sekelipa fuli o te hahai, pea nee ina kumikumi leva kia natou o uhiga mo te kogamea ae e tonu ke tupu ai te Kilisito. 5Nee natou ui leva kia ia: I Petelehemi i Sutea; koteuhi koeni te mea ae nee tohi e te polofeta:
6 Pea ko koe, Petelehemi, kele o Suta,
E mole ko koe ko he kolo noa i te u kolo tafito o Suta,
Koteuhi e tupu anai ia koe he pule ae e ina fafaga anai ia Iselaele, taku hahai.
7Nee kalagai fakafufu leva e Helote te kau masi, pea nee ina kumikumi totonu leva kia natou pe nee talu mai anafea te mu o te fetuu. 8Pea nee ina fekaui leva natou ki Petelehemi, o ui: Koutou olo, pea koutou kumikumi te u aluaga totonu fuli o uhiga mo te kii toe; pea ka koutou mau anai ia ia, koutou fakaha mai ia kia au, o tupu ke au alu foki mo au totonu o atolasio kia ia.
9I te osi o tanatou fagono ki te hau, nee natou olo leva. Pea koeni, ko te fetuu ae nee natou sisio ki ai i Olieto nee alu i onatou mua o kaku ki te lakaga ae nee kaku ai leva ia ia ki oluga o te kogamea ae nee nofo ai te kii toe, pea nee tuu leva ia ia. 10I te lakaga ae nee natou sisio ai leva ki te fetuu, nee natou fonu leva i he fiafia lahi. 11Nee natou hu leva ki te fale, nee natou sisio leva ki te kii toe mo Malia, tana fae, nee natou tuutuli leva ki lalo pea nee natou atolasio leva ki te kii toe; nee natou avahi leva onatou koloa, pea nee natou momoli leva kia ia he meaofa ko te aulo, mo te iseso pea mo te mila. 12Pea nee fakaha leva e te Atua kia natou i he moemisi ke aua naa natou toe liliu kia Helote, pea nee natou toe liliu leva ki tonatou fenua i he tahi age ala.
Hola ki Esipito
13I te osi o tanatou mavae, nee ha leva he aselo a te Aliki kia Sosefo i he moemisi, o ui: Tuu ki oluga, too te kii toe mo tana fae, o hola ki Esipito, pea ke nofo i ai o kaku ki taku toe palalau atu anai kia koe, koteuhi e kumi anai te kii toe e Helote ke tamatei. 14Nee tuu ake leva ia Sosefo i te pouli, o too te kii toe mo tana fae, pea nee mavae leva ia ia ki Esipito. 15Nee nofo leva ia Sosefo i Esipito o kaku ki te mate o Helote, koteuhi ke fakahoko ai te mea ae nee fakaha fakatomua e te Aliki i te polofeta: Nee au paui toku foha ke mavae mai Esipito.
Matematehi e Helote o te u fanau tagata liliki
16Ko Helote, i tana sio kua mea noai ia ia e te kau masi, nee itaita lahi osi, pea nee ina fakatotonu leva ke tamatei te u toe tagata liliki fuli kua tau lua o hifo ki lalo, ae nee nonofo i Petelehemi pea mo te u kogafenua fuli i ona tafatafa, o mulimuli ki te aho ae nee ina kumi logo ai ki te kau masi. 17Pea nee fakahoko leva i ai te mea ae nee fakaha e te polofeta ko Selemia:
18 Nee logo ki he leo i Lama,
Ko ni tagi mo ni tagi laulau leo lahi:
E tagi ia Lasele ki ana fanau,
Pea nee mole loto ia ia ke fakapelepelei,
Koteuhi kua natou pupuli.
Toe liliu a Sosefo o nofo i Nasaleti
19I te osi o te mate o Helote, koeni, nee ha leva he aselo a te Aliki i he moemisi kia Sosefo, i Esipito, 20o ui: Tuu ki oluga, too te tamasii mo tana fae, pea ke alu ki te fenua o Iselaele, koteuhi kua mamate ia natou ae nee natou kumi te mauli o te tamasii. 21Nee tuu ake leva ia Sosefo ki oluga, o too te tamasii mo tana fae, pea nee alu leva ia ia ki te fenua o Iselaele. 22Kae i te logo a Sosefo kua hau i Sutea ia Akelausi o fetogi ia Helote, tana tamai, nee manavasii leva ia ia i te alu ki ai; pea i te hili o he fakatokaga nee fai e te Atua kia ia i he moemisi, nee afe leva ia ia ki te fenua o Kalilea, 23pea nee alu leva ia ia o nofo i he kolo nee higoa ko Nasaleti, o tupu ke fakahoko ai te mea ae nee fakaha fakatomua e te kau polofeta: E higoa anai ia ia ko te Nasaleti.
Currently Selected:
EVASELIO A MATEO 2: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland