Mat Mukenye
Mukenye
Mateyu Edwɛkpa ne ka edwɛkɛ fɛlɛko ne mɔɔ kile kɛ Gyisɛse a le Dievolɛ ne mɔɔ bɛvale bɛbɔle ɛwɔkɛ, na ɔ nwo zo a Nyamenle luale yele ye ɛwɔkɛ ne mɔɔ ɔbɔle ye menli ne wɔ Ngyekyeleɛ Dɛba ne anu la. Edwɛkɛ fɛlɛko ɛhye ɛnle Dwuuma mɔɔ bɛ avinli a bɛwole Gyisɛse na bɛtetele ye la angome ɛdeɛ, ɔle ewiade amra amuala ɛdeɛ.
Bɛboale a bɛhyehyɛle Mateyu nwoma ne a. Ɔbɔ ɔ bo wɔ Gyisɛse awolɛ nu, ɔka ye ɛzɔnenlɛ ne nee ye sɔnea ne anwo edwɛkɛ, na akee ɔka ye ɛzonlenlɛ ne mɔɔ fane ye nolobɔlɛ, ngilehilelɛ nee ye ayileyɛlɛ wɔ Galeli la anwo edwɛkɛ. Ɛhye anzi Edwɛkpa ne ka Gyisɛse adendulɛ ne mɔɔ ɔdule ɔvi Galeli ɔhɔle Gyɛlusalɛm la anwo edwɛkɛ, yɛɛ mɔɔ sisile Gyisɛse anwo zo wɔ dapɛne ne mɔɔ li amozi la anu, na ɔrawiele ye meanubaka ne azo ɛhunlɛ nee ye ewudwazo nwo la anwo edwɛkɛ.
Edwɛkpa ne kile kɛ Gyisɛse le kilehilevolɛ kpole mɔɔ lɛ tumi na ɔkola ɔkilehile mɛla ne abo, na eza ɔkilehile Nyamenle Belemgbunlililɛ ne anu a. Ye ngilehilelɛ ne gua ngakyile nnu na bɛboɔboa ɔ nloa zɛhae: (1) Boka ne azo Edwɛkpa ne nolobɔlɛ ne mɔɔ fane Anwuma Belemgbunlililɛ ne menli ne subane, bɛ gyima mɔɔ la bɛ nwo zo, nvasoɛ mɔɔ bɛnyia ye, yɛɛ kɛ bɛ awieleɛ bazi awie bɛ la. (Mgbakyelɛ 5-7); (2) Ɛdoavolɛma bulu nee nwiɔ ne ɛhilehilelɛ mɔɔ fane bɛ gyima nwo (Mgbakyelɛ 10); (3) Anwuma Belemgbunlililɛ ne anwo mrɛlɛ (Mgbakyelɛ 13); (4) Ɛdoavolɛyɛlɛ nwo ngilehilelɛ (Mgbakyelɛ 18); yɛɛ (5) Ewiade ɛhye awieleɛ nee Anwuma Belemgbunlililɛ ne ɛralɛ (Mgbakyelɛ 24-25).
Mɔɔ wɔ nu la
Gyisɛse Kelaese abusua nee ye awolɛ 1.1—2.23
Dwɔn Sɔnevolɛ ne ɛzonlenlɛ 3.1-12
Gyisɛse ɛzɔnenlɛ nee ye sɔnea 3.13—4.11
Gyisɛse bagua nu ɛzonlenlɛ wɔ Galeli 4.12—18.35
Gyisɛse vi Galeli kɔ Gyɛlusalɛm 19.1—20.34
Dapɛne ne mɔɔ li amozi la anu wɔ Gyɛlusalɛm nee ye namunamu ne mɔ azo 21.1—27.66
Awulae ewudwazo ne nee ɔ nwo mɔɔ ɔyele ɔhilele la 28.1-20
Currently Selected:
Mat Mukenye: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.