Gálatas 5
5
Mana alli yachatsikuqkunata mana chaskiyänanpaq ninqan
1Jesucristo libramashqam Moisés qellqanqan leykunapa poderninchö kanqantsikpita librina kantsik.#Juan 8.32-36. Tsaynö kaykaptinqa tsay leykunata cumpliyänaykipaq obligayäshuptikipis ama cäsuyaytsu. 2Noqam niyaq: Señalakuyaptikiraq Dios Yaya salvayäshunaykipaq yarpäyaptikiqa Jesucristuman creyikuyanqaykipis manakaqllapaqmi kanqa. 3Yapaymi niyaq: Pipis señalakuq kaqqa Moisés qellqanqan leykunatam llapantaraq cumplinman. 4Tsay leykunata cäsur pipis salvakayta munarmi Jesucristupitapis y Dios Yayapa kuyakuyninpitapis witikuyashqa.
5Peru noqantsikmi sïqa Espíritu Santu tantiyatsimashqa musyantsik Jesucristuman confiakurnin salvakunapaq kanqanta. 6Jesucristuman creyikushqaqa manam señalashqa kanqantsiktsu ni señalanni kanqantsiktsu välin, sinöqa payman confiakurnin kuyanakur kawanqantsikmi.
7Qamkunaqa Jesucristuman creyikur allim kayarqayki. ¿Pitan niyäshushkanki rasunpa kaq willakuyta mana cäsuyänaykipaq? 8Paykuna yachatsikuyanqanqa manam qayamaqnintsik Dios Yayapitatsu. 9Tsay mana alli yachatsikuyqa wallka levadüra mäsata saksätsiqnömi kaykan.#1Cor. 5.6. 10Mana alli yachatsikuqkunata manana chaskiyänaykipaqmi Dios Yayata mañakü. Tsay runakunatam pï kayaptinpis Dios Yaya juzganqa.
11Wawqikuna y panikuna, señalakuyänanpaq yachatsikuptïqa manam ni pipis qatikachaykämanmantsu ni Jesucristo noqantsik rayku cruzchö wañunqanta willakunqäpita chikimanmantsu. 12<<Señalakurraqmi salvakäyanki>> nir yachatsiyäshuqnikikunaqa penqayninkunata kuchupita roquskiyätsun.
Espíritu Santupa poderninchö kawanapaq yachatsinqan
13Wawqikuna y panikuna, libri kayänaykipaqmi Dios Yaya qayayäshushkanki. Librina karpis jutsata ama rurayaytsu, sinöqa juknin jukninwanpis kuyanakur yanapanakuyay.#Mat. 20.26. 14Diospa leyninchömi nin: <<Kikiki kuyakunqaykinö runa majikita kuyanki>>.
Tsay ninqanta cumplirqa llapan leyninkunatam cumpliykäyanki.#Lev. 19.18; Mat. 22.39; Mar. 12.31; Rom. 13.8-10; Stg. 2.8. 15Peru tsaynö kaykaptinqa cuidädutaq chikinakur kaykäyankiman. Chikinakurqa jaqayätsinakurmi qarqunakuyanki.
16Tsaymi niyaq: Espíritu Santu tantiyatsiyäshunqaykinölla kawakuyay. Tsaynö kawarqa manam shonquykikuna munanqannö jutsata rurayankitsu.#5.16 Wakin castellänu traduccionkunachömi nin: Espíritu Santu tantiyatsiyäshunqaykinölla kawakuyay. Shonquykikuna mana allita yarpanqanta ama rurayaytsu. 17Mana alli yarpaykunam Espíritu Santupa contran y Espíritu Santunam llutan ruraykunapa contran. Tsaymi ishkan contränakuyaptin allita rurayta munarpis puëdiyankitsu.#Rom. 7.15-23. 18Espíritu Santu tantiyatsiyäshunqaykita cäsurqa manam leykunapa poderninchönatsu kayanki.#Rom. 7.5, 8.
19Mana allita ruraqkunaqa [majankuna kaykaptinmi jukwan jukwan purikuyan,] fornicación jutsata rurayan, melanaypaq kaqkunata rurayan, umankuna achachashqa kaptin jutsata rurayan, 20ïdulukunata adorayan, runa majinta brüjatsiyan, runa majinta chikiyan, piñanakuyan, cëlanakuyan, imallapitapis rabyayan, chikipänakuyan, qarqunakuyan, jaqayätsinakuyan, 21envidiösu kayan, [runa majinta wañutsiyan,] upyallachö kakuyan, machaskir mana allikunata rurayan y tsaynöllam mastapis rurayan. Ñawpata niyanqaqnöllam kananpis niyaq: Tsaynö kawaqkunaqa Dios Yayapa mandakuyninman manam chäyanqatsu.
22Peru Espíritu Santupa poderninchö kawarmi sïqa kuyanakuntsik, kushikuntsik, alli kawakuntsik, pacienciakuntsik, qollmi shonqu kantsik, yanapakuq kantsik, äninqantsikta cumplintsik, 23humildi kantsik y allita ruranapaq tantiyakuntsik. Tsaynö kawakurqa manam ni ima leytapis manakaqman churantsiktsu.
24Jesucristupana karmi unay kawaynintsikta cruzchö wañutsishqana kaykantsik.#Mar. 8.34; Rom. 6.3-14; Gál. 2.20; 6.14. Tsaymi jutsa ruraykuna yarpaynintsikman shamuptinpis cäsuntsiktsu. 25Espíritu Santupa poderninchö kaykarqa pay tantiyatsimanqantsiknö kawakushun. 26Tsaynö kawaykarqa pitapis rabyatsir ama orgullösu ni envidiösu kashuntsu.
Currently Selected:
Gálatas 5: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.