Gálatas 6
6
Runa majintsikwan yanapanakunapaq ninqan
1Espíritu Santu munanqannö kawaq wawqikuna y panikuna, creyikuq majikikuna jutsa ruranqanta musyarqa mana musyaparnin tantiyatsiyanki. Cuidädutaq kikikikunapis jutsata rurayankiman. 2Juknin jukninwanpis animatsinakur yanapanakuyay. Tsaynöpam Jesucristo yachatsimanqantsik mandamientunta cumpliykäyanki.#Gál. 5.13-14; Lev. 19.18; Mat. 22.36-40; Juan 13.34; 15.12; 1Juan 3.23.
3Imatapis mana musyaykar allish tukurqa kikillaykikunam engañakuykäyanki. 4Allish tukuyanqaykipa rantin kikikikuna imanö kawayanqaykita tantiyakuyay. Tsaynöpam allish tukur kushikuyanqaykipa rantin Dios Yaya munanqannö kawayanqaykipita kushikuyanki. 5Llapantsiktam imanö kawanqantsikpita Dios Yaya cuentata mañamäshun.
6Jesucristupa willakuyninta yachakuqkuna yachatsiqninkunata imallawanpis yanapayätsun.
7Shumaq tantiyakushun. Dios Yayataqa manam engañayta puëdintsiktsu. Imatapis murunqantsiktam cosechantsik. 8Tsaynöllam jutsata rurarqa wañur ushakäshun. Peru Espíritu Santu munanqannö kawarmi sïqa mana ushakaq kawayta tarishun. 9Tsaynö kaykaptinqa mana ajayaypa alli kaqkunallata rurashun.#2Tes. 3.13. Tsaynö kawashqam Dios Yaya imay karpis premiuta qaramäshun. 10Tsayta musyaykarqa imantsikpis kanqanman pïmaytapis yanapashun. Jesucristuman creyikuq majintsiktaqa masraq yanapashun.
Cartapa ushanan
11Kay cartapa ushanantaqa kikïmi jatusaq letrakunawan qellqamü. 12Señalakuyänaykipaq yachatsiyäshuqnikikunaqa Israel majinkuna alli rikäyänanta munarllam yachatsiyäshunki. Qatikachäyänanta mantsakurmi Jesucristo cruzchö wañunqanpita salvakänapaq kanqantaqa yachatsikuyantsu. 13Paykunaqa señalakurpis Moisés qellqanqan leykunata manam cumpliyantsu. Tsaynö karpis leyta cumplitsiyanqanpita aläbakuyänanllapaqmi señalakushqa kayänaykita munayan.
14Noqa manam imapitapis aläbakütsu. Aläbakunqäpa rantinmi Señornintsik Jesucristo noqantsik rayku cruzchö wañunqanpita kushikü. Cruzchö wañushqa kaptinmi kay mundu#6.14 Kay mundupaq parlarqa runakuna mana allita rurayanqanpaq y mana alli yarpäyanqanpaqmi parlan. noqapaq crucificashqanö y noqapis kay mundupaq crucificashqanö kaykä. 15Tsaymi [Jesucristuchö kashqaqa] señalashqa kanqantsiktsu ni señalanni kanqantsiktsu välin. Peru mushuq kamanqan runa kanqantsikmi sïqa rasunpa välin.#Juan 3.3-7; 2Cor. 5.17. 16Tsayta tantiyaqkunataqa Dios Yaya llakipar alli rikaykullätsun. Paykunam Dios Yaya kuyanqan Israel runakuna kayan.#6.16 Wakin runakunaqa kay versïculuta juknömi traduciyan. Tsaymi niyan: Tsayta tantiyakuqkunata y kuyanqan Israel runakunatapis Dios Yaya llakipar alli rikaykullätsun.
17[Señor] Jesucristupa alli willakuyninta willakunqäpita maqayämanqan siräkunam cuerpüchö kan. Tsaynö kaykaptinqa yachatsikunqäta ama pipis manakaqman churatsuntsu.
18Wawqikuna y panikuna, Señornintsik Jesucristo llakipäyäshurniki imaypis yanapaykuyälläshuy. Amén.
Currently Selected:
Gálatas 6: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.