Gálatas 4
4
1Pipis wamrallaraq karqa herencianta manam chaskinraqtsu. Chaskinanpaq kaykarpis servikuqnöllam kaykan. 2Tsaymi wätaqninpa poderninllachöraq kaykan taytan dispöninqan junaqyaq. 3Tsaynöllam noqantsikpis wamranö kar Moisés qellqanqan leykunapa poderninchö karqantsik.
4Prometinqan junaq chämuptinmi Dios Yaya Tsurinta kachamurqan. Paymi noqantsiknö yurishqa kar tsay leykunapa poderninchö karqan. 5Tsaynö karqan leykunapa poderninchö kanqantsikpita salvamänapaqmi. Tsaynöpam paypa wamrankunana kanapaq qorimashkantsik. 6Wamran kashqam Tsurin Jesucristo prometinqan Espíritu Santuta#Juan 16.7. shonquntsikman Dios Yaya kachamurqan. Espíritu Santum Dios Yayata imaypis nin: <<¡Abba, Taytallä!>>#Rom. 8.15-16. 7Tsaymi servikuqnönatsu kantsik, sinöqa Dios Yayapa wamrankunana kantsik. Wamranna karmi prometimanqantsik herenciata [Jesucristo rayku] chaskishun.#Rom. 8.17.
Wawqikunapaq y panikunapaq Pablo llakikunqan
8Qamkunaqa Dios Yayata manaraq reqirmi mana rasunpa kaq dioskunata serviyarqayki. 9Kananmi sïqa Dios Yayata reqiyanki y paypis reqiyäshunki. Tsaynö kaykaptinqa ¿imanirtan Moisés qellqanqan leykunata cumpliyta munar yapay servikuqnö kayta munaykäyanki? 10Tsaymi qamkunaqa Israel runakuna respitayanqan junaqkunata, killakunata, watakunata y fiestankunata respitaykäyanki. 11Tsaynö kayaptikim alläpa llakikü. ¿Manakaqllapaqtsuraq Jesucristupa willakuyninta yachatsiyashkaq? 12Wawqikuna y panikuna, qamkunatam rugayaq noqa kanqänö qamkunapis kayänaykipaq. Noqapis mana Israel runakunanöllam Moisés qellqanqan leykunapa poderninchötsu kä.#1Cor. 9.20-22.
Qamkuna allim chaskiyämarqayki. 13Musyayanqaykinöpis qeshyanqäpam#2Cor. 12.7. qamkuna kaqchö Jesucristupa willakuyninta willakurqä.#Hech. 16.6. 14Tsaynö qeshyaptïpis qarqayämanqaykipa rantinmi angeltanöraq y kikin Jesucristutanöraq rikäyämarqayki. 15Kananqa ¿imanakaskiyankitan? Unayqa ñawikikuna jipina kaptinqa jipiskirmi ñawïman churarkayämunkiman karqan. 16Kananqa ¿Jesucristupa willakuyninta yachatsikunqäpitaku conträ shäriyashkanki?
17Mana alli yachatsikuqkunam niyan Dios munanqannö alli kawakuyänaykita munayanqanta. Peru tsaynö nirpis manam rasunpatsu alli kawayänaykita munayan, masbienmi noqakunata manakaqman churayämar kikinkuna yachatsiyäshunqaykita chaskiyänaykita munayan. 18Rasunpa alli kawakuyänaykita munar yachatsiyäshuptikiqa allim kanman. Peru qamkunawan kaykaptï o mana kaykaptïpis tsaynölla yachatsiyäshunkiman.
19Kuyay wamräkuna, Jesucristunö kawayänaykita munarmi warmi qeshyakur ñakaqnö qamkunapaq alläpa llakikü.#Rom. 8.29; 2Cor. 3.18. 20¡Shumaq tantiyatsiyänaqpaq qamkuna kaqchö imanöllaraq tikraskïman! Karuchö karmi ni ima ruraytapis puëdïtsu.
Agarman y Saraman iwalatsinqan
21 Moisés qellqanqan leykunapa poderninchö kayta munarqa ¿pay qellqanqankuna ima ninqantapis tantiyayankiku? 22Tsaychömi nin Abraham ishkay tsuriyuq kanqanta. Jukaq tsurinmi serviqnin warmichö karqan#Gén. 16.15. y jukaq tsurinnam warminchö karqan.#Gén. 21.2. 23Serviqnin warmichö kaq tsurinqa manam Dios Yaya prometinqan tsurintsu karqan. Peru warminchö kaq tsurinmi sïqa Dios Yaya prometinqan karqan.
24Tsay warmikunata ishkay pactuman iwalatsirmi tantiyatsiyäshayki. Abrahampa serviqnin Agarmi Sinaí jirkanö kaykan. Sinaí jirkachömi Israel runakunawan Dios Yaya pactuta rurar leyninkunata entregarqan. Tsaymi pipis tsay leykunapa poderninchö kar servikuqnö kayan. 25Arabiachö Sinaí jirkanömi Agar kaykan. Tsaynöllam Jerusalénpis y wawankunapis kaykan.#4.25 Jerusalén y wawankunaqa Moisés qellqanqan leykunata cäsur salvakayta munaqkunam kayan. Moisés qellqanqan leykunapa poderninchö karmi tsaynö kaykan. 26Abrahampa warmin Saranam Dios Yaya ruranqan mushuq pactunö kaykan. Tsay pactuta Dios Yaya cumplir salvamashqam noqantsikpa markantsik ciëluchö kaq Jerusalén kanqa.
27Ciëluchö kaq Jerusalén atska wawayuq kananpaq kanqantam Dios Yayapa palabranpis nin:
<<Qolluq warmi, ¡kushikuy!
Wawayki mana kaptinpis ¡kushikur cantay!
Ollquyki dëjashuptikipis ollquyuq warmipita masraqmi wawaykikuna kanqa>>.#Isa. 54.1.
28Wawqikuna y panikuna, tsaynö kaptinmi noqantsikqa Sarapa wawan Isaacnö kar Dios Yaya prometinqanta cumplinqanpita paypa wamrankuna kantsik.
29Peru Espíritu Santupa poderninwan yuriq Isaacta Agarpa wawan chikinqannömi kananpis Moisés qellqanqan leykunata cumplitsiqkuna chikimantsik.#Gén. 21.9. 30¿Manaku yarpäyanki Dios Yayapa palabran imata ninqanta? Tsaychömi Sara nirqan: <<¡Tsay servikuqtaqa wawantinta sas qarquy! Tsay warmipa wawanqa manam wawä Isaacwan herenciata rakipunakuyanmantsu>>.#Gén. 21.10.
31Wawqikuna y panikuna, noqantsikqa manam servikuq warmipa wawannötsu kantsik, sinöqa Sarapa wawannömi.
Currently Selected:
Gálatas 4: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.