MIQUEAS 1
1
Samaria pueblomanda, Jerusalenmandami huacashca
1Jotam, Acaz, Ezequías shuti jatun mandajcuna Judá llactata mandanajui punllacunapimi Mandaj Diosca, Moreset shuti pueblomanda Miqueas shuti runaguman, cai shimicunata villarca. Paica, Samaria pueblota, Jerusalén pueblota llaquichinatami ricushca.
2Tucui gentecuna, uyaichi. Cai pachapash, cai pachapi tucui ima tiajcunapash, ali uyaichi: Mandaj Jatun Diosllata, cangunata llaquichinataca, paipajlla huasimanda pai Jatun Diosllata ricujuchunmi munani. 3Shina cashcamanda ricuichi. Mandaj Diosca, pai causajuj huasimanda llujshishpami, cai pachapi tiaj urcucunata sarushpa, urai shamunga. 4Pai sarujpimi, urcucunaca yacuyanga. Pugru pambacunapash, ninapi vira yacuyanshnami yacuyashpa huashajunga. Jahuamanda yacu talirijunshnami taliringa. 5Jacobopaj mirai israelcuna na cazushpa juchata rurashcamandami, tucui cai llaquicunaca japinga. Jacobopaj miraicunataca, ¿pita nalita rurachishcanga? ¿Nachu Samaria pueblopi causajcuna chaitaca rurachishcanga? ¿Judá llactapi tiaj altarcunaca maijangunata? ¿Nachu Jerusalén?
6“Shinamandami Samaria pueblotaca, rumi mundundalla saquisha. Uvasta tarpuna alpatami rurasha. Pircashca rumicunatapash, pugru pambaman caita chaita shitashpami, callari rumicunatapash llujchisha. 7Paicunapaj rumi dioscunatapash, tucuillatami ñutushpa saquisha. Paicuna imata charishcacunataca, tucuillatami ninapi rupachisha. Paicunapaj yanga dioscunatapash, llaquinayaitami tucuchisha. Paicunaca, culquimanda huainayaj huarmicunamanda japishpami, imacunatapash tandachinajurca. Chaicunaca, culquimanda huainayaj huarmicunapajllatami tigranga” nircami.
8Chai tucui llaquicunamandaca, llaquinayaita caparishpa huacashpami, churajunapash illaj lluchulla purisha. Chacal nishca, avestruz nishca animalcunashnami, llaquinayaita huacasha. 9Samaria pueblopi causajcunapaj nanaica, ninanda nanachij ung:uimari. Chai ung:uica, Judá llactacamanmi chayamurca, ñuca llacta puracuna causanajuj Jerusalén pungucamambashmi chayamurca. 10Chai llaquicunataca, Gat shuti pueblopica na villanachu canguichi, na yapa huacanachu canguichi. Chai llaquihuanga, Bet-le-afra shuti llactapi tiaj ñutu alpapimi revolcana canguichi. 11Safir shuti pueblopi causajcunalla, pinganayaita lluchulla ñaupashpa richiyari. Zaanán shuti pueblopi causajcunaca, na llujshinajunllu. Bet-esel shuti pueblopi causajcunataca, llaqui japijpimi na ayudai ushanga. 12Marot shuti pueblopi causajcunaca, ali causanatallami ninanda munanajurca. Chaimandami Mandaj Diosca, Jerusalén pungucaman llaquicunata urai cachamushca carca. 13Laquis shuti pueblopi causajcunalla, cangunapaj carretacunapica ali calpaj caballocunata huataichiyari. Cangunami, Sion shuti pueblopi causajcunataca, juchata ruranata callarichircanguichi. Israel llactapica, cangunamandami jariyashpa na cazunaca callarirca. 14Shinamandami canguna imata charishcacunataca, Moreset-gat shuti pueblopi causajcunaman cuna canguichi. Aczib shuti pueblopi tiaj huasicunaca, Israel llactata jatun mandajcunata umachingapajmi canga.
15Maresa shuti pueblopi causajcunalla, cangunata quichunajuchunga shuhuacunatami pushamusha. Paicuna shamujpimi, juyailla sisashna israelcunaca, Adulam shuti pueblopi pacajungapaj calpanajunga. 16Judá llactalla, cangunapaj juyashca huahuacunamandaca, ajchata tucuilla ruturichiyari. Cangunapi causajcuna shuj llactaman prezu apai tucushcamandaca, jatun angashna lluchu uma tucuichiyari.
Currently Selected:
MIQUEAS 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.