MIQUEAS 2
2
Imagutapash na charijcunata llaquichijcunaca, aij imachari tucunga
1Paicunapaj camapi sirinajushpallata, imashna nalita ruranata yarijcunaca, ¡aij, imachari tucunga! Ña pacarijpica, paicuna yarishcashnallatami ruranajun. Paicunapaj maquipi ushaita charishpami, chashna ruranajun. 2Shujcunapaj alpacunata ninanda munashpami shuhuanajun. Huasicunatapash ninanda munashpami japinajun. Paicunaca, shuj runagutaca, paipaj huasindimi ninanda llaquichinajun. Shuj runagutaca, pai imata charishcacunandimi llaquichinajun. 3Chaimandami Mandaj Diosca, cashna nin: “Ricuichi, paicunataca nalita rurashcamanda ñucapash llaquichinatami yarijuni. Chai llaquimandaca, shujllapash na quishpiringachu, na ashtahuan jariyashpa purinajungachu. Chai punllapica, jatun llaquimi canga” ninmi. 4Chai punllacunallatami, yarichij shimicunahuan yarishpa yarishpa, cashna nishpa huacanajunga: “Tucuicunami llaquichi tucurcanchi. Mandaj Diosmi caipi causajcunataca, huaquindalla saquishca. Ñucanchiman carashca alpacunatapash quichushpami, shujcunaman curca. ¡Aij, tucui ñucanchi pambacunatamari quichurca!” ninajungami. 5Shina llaquichijpimi, Mandaj Diospaj tandanajuipi suerteta rurashpa, alpacunata chaupingapaca, pipash na tianga.
6Profetacunataca, cashnami ninajun: “Na imatapash villanachu canguichi. Ima llaquipash na japingachu, imatapash na villanachu canguichi” ninajunmi. 7Jacobopaj miraicunami canchi nijcuna, Mandaj Diospaj Espirituca, ¿nachu ushaita charin? Cashna llaquicunataca, ¿paichu cachamun? Ñuca rimashca shimicunaca, aliguta rurashpa causajuj runataca, ¿nachu alita ruran? 8Pundaca, ñuca agllashca gentecunami carca. Cunanga, ñucata fiñajcunashnami jatarinajushca. Ñanda yalijcunata na ricunayachishpa macanajuj soldadocunashnami, jahualla churajunatapash na llaquishpa quichurcanguichi. 9Ñuca llactapi causaj huarmicunatapash, paicuna cushijushpa causana huasicunamandami llujchishpa cacharcanguichi. Paicunapaj huahuacunata, causaita causaicaman alicachinatapashmi quichurcanguichi. 10Caimandaca jatarishpa richilla. Caipica, na samanachu canguichi. Caipica, ninanda huaglishca mapa jundami. 11Llullachij ayahuan maijambash cashpaca, llullashpami: “Ñucaca vinopash, sidrapash tiangami nishpami villasha” ninga. Paimi, cai llactapi causajcunapaj villaj canga.
12“Jacobopaj miraicunalla, cangunataca tucuillata tandachishapachami. Huaquin puchushca israelcunatapash tandachishapachami. Bosra shuti pueblopi tiaj llama canllatashnami tandachisha. Ashtaca runacuna cashcamandami, ashtaca llamacuna jihuata micunajushpa, tsal tsal huacanshna uyarinajunga. 13Ñanda pascajmi, paicunapaj ñaupataca vichai ringa. Ñanda pascashpaca, pungutami llujshinajunga. Paicunata jatun mandajca, ñaupashpami ringa. Tucuicunata ñaupashpa rijca, Mandaj Diosmi canga” ninmi.
Currently Selected:
MIQUEAS 2: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.