JONÁS 4
4
Jonasca ninandami fiñarishca
1Ashtahuangarin Jonasca, ninanda llaquirishpami fiñarirca. 2Shinamandami Mandaj Diostaca, cashna nishpa mañarca:
—Cunanga Mandaj Dioslla, ¿nachu chashna ruranataca, ñuca llactapi cashpallata yacharcani? Chaimandami Tarsis puebloman pacajushpa, ucha rijurcani. Can Taita Diosca, ninan juyaj, na ucha fiñarij, ali shunguta charij Taita Diosmi cangui. Llaquichisha nishpapash, na llaquichishpa saquijlla cajtami yacharcani. 3Cunanga, Mandaj Dioslla, ñuca causaita quichuhuailla nipanimi. Ñucapaca, causangapaj randica huañunami ashtahuan ali canman— nircami.
4Shina nijpimi, Mandaj Diosca:
—¿Chashna ninanda fiñarishpaca, alitachu rurangui?— nirca.
5Shina nijpimi Jonasca, chai pueblomanda llujshishpaca chai pueblomandaca, indi llujshimuj ladoman rishpa, malquicunahuan chugllata rurashpa tiajurca. Chai chugllapaj llandu ucupimi, chai pueblo ima tucujta ricungacaman tiajurca. 6Mandaj Taita Diosca, calabaza nishca shuj yuratami viñachirca. Indi ninanda rupachijujtaca, chai yurami llandujurca. Chai yurata ricushpami Jonasca, ninandapacha cushijurca. 7Ashtahuangarin cayandi tutamandallatami Taita Diosca, chai calabaza yurata micuchun, shuj juruta churarca. Chai juru micujpimi, chai yuraguca chaquirca. 8Indi ña llujshijpimi, cashna tucurca: Taita Diosca, rupajlla ninan huairatami cachamurca. Jonaspaj umata, indi ninanda rupachijpimi, ña huañunalla tucushpa:
—Ñucapaca, causangapaj randica huañunami ashtahuan ali— nijurca.
9Shina nijujpimi, Taita Diosca:
—¿Chai calabaza yuramandallachu, ninanda fiñaringui?— nirca.
Shina nijpimi, Jonasca:
—Ari, huañungashnami fiñarini— nishpa tigrachirca.
10Shina nijpimi Mandaj Diosca, Jonasta cashna nirca:
—¿Na can tarpushca, na can viñachishca cashpatachu, chai calabaza yuramandaca ninanda llaquiringui? Chai yuraguca, shuj tutallami viñarca, shuj tutapica chaquircallami. 11Ñucapash Nínive pueblotaca, ¿nachu llaquisha? Chai jatun pueblopica, patsaj ishcai chunga huaranga runacunami causanajun. Paicunaca, maijan ali lado maqui, lluqui lado maqui cajtapash, na yachashpami causanajun. Chaipica, ashtaca animalcunapashmi tian— nircami.
Currently Selected:
JONÁS 4: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.