JOEL 1
1
Langosta jurucunami, granocunata micushpa tucuchishca
1Mandaj Diosca, Petuel shuti runapaj churi Joel runagumanmi, cai shimicunata cashna nishpa villarca:
2“Mandaj rucucunapash, cai llactapi tucui causajcunapash, caita ali uyaichi: ¿Canguna causajui punllacunapi, na cashpaca cangunapaj ñaupa taitacuna causajui punllacunapica, cashna llaquicuna tucushcachu? 3Caicunataca, cangunapaj huahuacunamanmi villana canguichi. Paicunapash, paicunapaj huahuacunamanmi villanajunga. Chai huahuacunapash, paicunapaj miraicunamanmi villanajunga. 4Oruga nishca jurucuna puchuchishca granocunataca, saltón nishca jurucunami micurca. Saltón jurucuna puchuchishcataca, revoltón nishca jurucunami micurca. Revoltón jurucuna puchuchishcataca, langostacunami tucuchirca.
5Machajcuna, rijcharishpa huacaichiyari. Vinota ufiajcuna, llullu vino tucurishcamandaca, ninanda caparishpa tucuicuna huacaichiyari. Vinotaca, cangunapaj shimimandami quichushca. 6Maitapash na cuentai ushanalla, ninan shinlli runacunami, ñuca llactaman vichai shamurca. Paicunapaj quirucunaca, ñaupaj lado quirucunapash, juchu quirucunapash, leonbaj quirucunashnami.
7Ñuca uvas chagracunataca llaquinayaita tucuchishpami, ñuca jigos yuracunatapash, lluchushpa saquirca. Llaquinayaita lluchushpami, urmachishpa saquirca. Malquicunapash, yurajlla caspicunallami quedarca. 8Chairalla viñai cuitsa cajpi cusa tucuna huañushcamanda cañamuta churajushpa, chairalla viñai cuitsa huacanshna huacayari. 9Mandaj Diospaj huasimandaca, Diosman imata caranapash, talina vinopashmi chingarca. Chaimandami, Mandaj Diosta servij curacunaca, llaquirishpa huacanajun. 10Pambacunapash, llaquinayaitami tucuchi tucurca. Trigopash tucurijpi, llullu vinopash chaquijpi, aceitepash chingajpimi, pambacunaca llaquilla tucurca. 11Alpapi imatapash rurajcunapash, pingai tucuichiyari. Uvasta tarpujcunapash, aij nishpa huacaichiyari. Trigomanda, cebadamandapash huacaichiyari. Pambapi cozechanaca, tucuillami chingashca. 12Uvas chagracunapash chaquishcami. Jigos yuracunapash tucurishcami. Granadilla yuracuna, palmera yuracuna, manzana yuracunapashmi chaquishca. Alpapi tiaj tucui yuracunapash chaquishcami. Shinami, huañuna aichayu runacuna cushijunaca tucurishca. 13Curacunapash, chumbilishpa huacaichiyari. Altarpi rupachishpa servijcunapash, aij nishpa huacaichiyari. Ñuca Taita Diosta servijcuna, cañamuta churajushpa puñuj shamuichiyari. Cangunapaj Taita Diospaj huasimandaca, imata caranatapash, talina vinotapash anchuchishcami.
14Na micushpa tandanajuchun villaichiyari. Mandaj rucucunatapash, cai llactapi tucui causajcunatapash, cangunata Mandaj Taita Diospaj huasiman tandachishpa, Mandaj Diosta caparishpa mañaichiyari. 15¡Aij, Mandaj Dios shamuna punllapash ñami pactamujun! Tucui Ushaita Charij Dios ninanda llaquichina punllami, ña chayamujun. 16¿Nachu ñucanchi micunatapash, ñucanchi Taita Diospaj huasipi ninanda cushijunatapash, ñucanchi ricujta quichurca? 17Granocunaca, alpa ucupillatami ismushpa tucurirca. Trigo chaquishcamandami, granota tandachinacunapash jichushca quedarca. Granota alichina ucucunapash, tucuchi tucurcami. 18¡Animalcunaca llaquinayaitamari huacanajurca! ¡Huagracunaca, jihua na tiajpimari, caita chaita mascashpa purinajurca! Shinallata ashtaca llamacunapash, yarjaimandami huañunajurca” nijurcami.
19Mandaj Dioslla, candallami caparishpa mañasha. Jichushca pambapi viñashca jihuacunataca, ninami tucuchirca. Pambapi tiaj yuracunatapash, rupajuj ninami tucuchirca. 20Jatun larca yacucunapash chaquircami, jichushca pambacunapi tiaj jihuacunatapash, ninami tucuilla rupachirca. Chaimandami, sachacunapi causaj animalcunapash huacashpa, can Diosman villanajunga.
Currently Selected:
JOEL 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.