JOEL 2
2
1Sion urcupica, trompetata tocaichiyari. Ñucapajlla urcupica, caparishpa villaichiyari. Cai pachapi tucui causajcunaca, chujchuichiyari. Mandaj Dios shamuna punllapami ña pactamujun, ñamari chayamujun. 2Chai punllapica, manllanayai yana yana tutami tucunga. Fuyu quilpashca llandu llandu punllami tucunga. Punllayangapaca, imashnami lomacunapira punchalla shitan, chashnallatami ashtaca ninan shinlli runacuna shamunga. Paicunashnaca, ima horallapash pipash na tiarcachu. Paicuna shamushca jipapipash, jipa miraicuna causai huatacunapipash, paicunashnaca pipash na tiangachu. 3Paicunapaj ñaupajmambash, ninami ninandapacha rupajunga. Paicunapaj huashamambash, ninami tucuchinga.
Paicuna nara chayamujpica cai llactaca, Edén huertashnami canga. Paicuna rishca jipaca, jichushca pambashnami llaquinayaita quedanga. Paicuna puramandaca, pipash na pacajushpa calpai ushangachu. 4Paicunaca, caballocunashnami canga. Caballopi tiarishca calpanajuj runacunashnami calpanajunga. 5Paicunaca, macanajuna carretacuna culun ninshnami, urcu jahuacunapi fahuanajunga. Chaquishca fangacuna rupanshnami uyaringa. Paicunaca, jatun macanajuiman rinalla, shuyanajuj ninan shinlli soldadocunashnami canga. 6Paicunapaj ñaupajpica, tucui gentecuna manllashpami, ñavicunapash quillu quillu tucunajunga. 7Ninan shinlli soldadocunashnami calpanajunga. Macanajunata ali yachaj soldadocunashnami, pirca jahuaman vitsianajunga. Tucuicunami, paicunapaj ñanda japishpa rinajunga, na shuj ñandaca rinajungachu. 8Maijambash na caishuj chaishuj t'angarinajungachu, tucuicunami paicunapaj ñandalla rinajunga. Espadapi urmashpapash, na chugringachu. 9Pueblopica, caiman chaimanmi purinajunga. Pata jahuacunatami calpanajunga. Huasicunaman vitsiashpami, shuhuacunashna ventanacunata yaicunajunga.
10Paicunapaj ñaupajpica, cai pachapash, jahua pachapashmi chujchunga. Indipash, lunapash yanayangami, luzerocunapash na ashtahuan punchayachingachu. 11Mandaj Diosca, paipaj soldadocunapaj ñaupajpimi mandanga. Paipaj soldadocunaca, ashtaca ashtacacunami. Pai mandashcata rurajcunaca, ninan shinllicunapachami. Mandaj Dios shamui punllapica, manllanayai jatun llaquimi tianga. Chai jatun llaquicunataca, ¿pita apai ushangayari?
Mandaj Diosca llaquingami
12Mandaj Diosca, cashnami nin: “Shinamanda cunanga, na micushpa huacashpa, ninanda llaquirishpa, tucui shunguhuan ñucapajman tigrarichi” ninmi. 13Canguna churajushcataca, na liquinachu canguichi. Ashtahuangarin cangunapaj shungutara alichirichi. Cangunata Mandaj Taita Diospajman tigrarichi. Paica, llaquishpa juyajmari, na ñapash fiñarij, ninanda llaquijmari. Llaquichingapaj munashpapash, llaquishpa jarcarijmari. 14Pai shamushpaca, cangunata llaquichina cashcamanda llaquirishpa, cangunata bendiciashpa tigranatapash, ¿pita yachanguichiyari? Chaica, cangunata Mandaj Taita Diosman imatapash caranata, talina vinota carangapajmi canga.
15Sion urcupimi, trompetata huacachina canguichi. Cangunaca: “Na micunachu canguichi” nishpa villaichiyari. Tucuicunata tandanajuchun cayaichiyari. 16Gentecunata tandachishpa, Diostalla yaringapaj tandanajuita ruraichi. Mandaj rucucunata, huambracunata, chuchujuj huahuacunatapash tandachichiyari. Chairalla cazarashcacunapash, paicuna causaj ucumanda llujshichun. 17Mandaj Diospajta ruraj curacunaca, ucuman yaicuna punguhuan altarhuan chaupipi shayarishpa huacashpa, cashna ninguichi: “Mandaj Dioslla, can agllashcacuna nalita rurashcataca cungapairi. Cambajlla cachun can agllashcacunataca, nalicachishpa rimai tucunajuchunga, ama saquipaichu. Paicunataca, shuj llactapi causajcuna mandanajuchumbash, ama saquipaichu” ninguichi. Shujcunaca: “¿Maipita paicunapaj Taita Diosca?” ninajungami.
18Mandaj Diosca, paipaj llactataca napacha saquishpami, pai agllashcacuna nalita rurashcataca cunganga.
19Mandaj Diosca, pai agllashcacunamanmi cashna nishpa tigrachinga: “Ricuichi, ñucaca micunata, llullu vinota, aceitetami carasha. Chaicunatami, na munajta micunguichi. Llacta puracunapi llaquichi tucunajuchumbash, nalicachishpa rimai tucunajuchumbash, cutinga na saquishachu. 20Cangunata llaquichijcuna jahua lado llactamanda shamujpica, carucamanmi cachasha. Paicunataca, chaquishca jichushca pambapimi shitasha. Ñaupashpa shamujcunataca, indi llujshimuj lado mama cuchapimi shitasha. Huashata catimujcunataca, indi huashajuj lado mama cuchapimi shitasha. Chai huañushcacunapaj aicha ismushpami, ninandapacha ashnanajunga. Jatun llaquicunata rurashcamandami, chashna rurasha” ningami.
21Cai llactapi causajcunalla, imatapash na manllanachu canguichi. Cangunaca, ninanda cushijuichiyari. Mandaj Diosca, jatun manllarinacunatami ruranga. 22Pambapi causaj animalcunapash, na manllanachu canguichi. Jichushca pambapi, jihuacunapash cutinmi verdeyanga. Yuracunapica, cutinllatami fucunga, jigoscunapash, uvascunapashmi fucunga. 23Sionbi causaj cangunapash, cangunata Mandaj Taita Dioshuan cushijuichiyari. Paimi callari tamiataca, tamiana punllapillata cangunaman caramurca. Paimi, callari tamiatapash, jipa tamiatapash callaripishnallata cangunaman cachamunga. 24Trillana pambacunapash, trigohuan jundami canga. Vinota cutana pushtumandaca, vinopash, aceitepashmi jundashpa jicharijunga.
25“Oruga, saltón, revoltón, langosta nishca jurucuna granocunata micushpa llaquichinajushca huatacunataca, cutinmi alichisha. Paicunataca, ñucapaj ashtaca soldadocuna cajpimi, cangunata llaquichinajuchun cachamurcani. 26Cangunaca, na munajtami micunguichi. Cangunaman jatun manllarinacunata ruraj, cangunata Mandaj Taita Dios ñucapaj shutitami alicachinguichi. Ñuca agllashcacunaca, napacha cutinga pingai tucungachu. 27Shina rurajpimi ñucataca, can israelcunapaj chaupipi causajujta yachanguichi. Ñucataca, cangunata Mandaj Taita Dios cajta, ñucamanda shujca pipash na tiajtami yachanguichi. Ñuca agllashcacunaca, napacha cutinga pingaichi tucungachu.
Taita Diospaj Espiritutaca, talinshnami cachamunga
28Cai tucuita rurashca jipaca, ñuca Espiritutami talinshna tucui gentecunaman cachamusha. Shina cachamujpimi, cangunapaj churicunapash, ushicunapash ñucamanda villanajunga, rucucunapash muscunajungami. Chairalla viñaicunapash, ñuca ricuchishcatami muscuipishna ricunajunga. 29Chai punllacunapica, servishpa causaj jaricunamambash, huarmicunamambashmi, ñuca Espirituta talinshna cachamusha. 30Jahua pachapipash, cai pachapipash jatun manllarinacunatami ricuchisha. Yahuarta, ninata, pilarshna shayajuj cushnitapashmi ricuchisha. 31Mandaj Dios agllashca ninan manllarina jatun punlla nara chayamujpillatami, indica yanayanga. Lunapashmi, yahuarshna tigranga. 32Mandaj Dios ñucata tucui mañajcunallami quishpiringa. Mandaj Dios ñuca villashcashnallatami, Sion urcupipash, Jerusalenbipash quishpirina tianga. Shinallata huaquin puchushca purapipash, Mandaj Dios ñuca cayashcacunallami quishpiringa.
Currently Selected:
JOEL 2: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.