OSEAS 14
14
Israelcunataca, Mandaj Diospajman tigraripaichi nishcami
1Israelcunalla, cangunata Mandaj Taita Diospajman tigrarichiyari. Canguna juchata rurashcamandami urmashcanguichi. 2Canguna Mandaj Diospajman tigrarishpaca, cashna nishpa ninanda mañaichiyari: “Tucui nalicunata ñucanchi rurashcatapash anchuchipai, aliguta rurashcatapash chasquipai. Chashna chasquijpica, canman imagutapash caranshnami, ñucanchi shimihuambacha alicachishun. 3Asiriocunapash, ñucanchitaca na quishpichi ushangachu. Caballocunapipash, ña na tiarishunllu. Ñucanchillata rurashca dioscunataca, ima horapash na ashtahuan: ‘Caimi ñucanchi dioscuna’ nishunllu. Taita mama illaj huahuataca, canllami llaquingui” nishpa mañaichiyari.
4“Ñucami, paicuna na cazushpa nalita rurashcataca alichisha. Tucui juyaihuanmi juyasha. Ñuca paicunahuan fiñarishcapash anchurishcamandami, chashna rurasha. 5Ñucami israelcunapaca, jamzi paramushna casha. Paicunaca, lirio sisanshnami sisanajunga. Líbano shuti urcumanda quirucunashnami sapiyanajunga. 6Paicunaca, jatun yura malquicunashnami miranajunga. Olivos yurashnami, juyaillagu canga. Paicunaca, Líbano shuti urcushnami mishquillagu ashnanajunga. 7Paicuna tigramushpaca, llandujuj yura ucupimi tiarinajunga. Chaipica, trigoshnami viñanajunga, uvas yurashnami sisanajunga. Líbano urcumanda vinoshnami, mishquillagu ashnanajunga. 8Shinamandami Efraín ailluca, cashna nijunga: ‘Yanga dioscunahuanga, ¿imatata ashtahuan ricunata charinchi?’ nijungami. Paicuna shina ninajujtaca uyashami, ricushami. Paicunapaca, haya nishca verdella yurashnami casha. Ñucamanda fucushca granotami, paicunaca japinajunga” nircami.
9Cai villashcacunata yachangapaca, ¿pita alipacha yachajushca canguichiyari? Caicunata entendingapaca, ¿pita aliguta yachajushca canguichiyari? Mandaj Diospaj ñangunaca, na quinguchu. Chai ñangunataca, imatapash cashcatapacha rurajcunallami purinajunga. Ashtahuangarin ñucata na cazujcunaca, chai ñangunapillatami urmanajunga.
Currently Selected:
OSEAS 14: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.