ESTER 1
1
Jatun mandaj Vasti shuti huarmimi, jatun mandaj Asuero shuti runata na cazushca
1Asuero shuti jatun mandaj mandajui punllacunapica, cashnami tucurca: Asuero shuti runaca, patsaj ishcai chunga canchis llactatami, India shuti llactamanda, Etiopía llactacaman mandajurca. 2Jatun mandaj Asuero shuti runaca, llactata mandana Susa shuti jatun pueblopimi, mandangapaj tiarinapi shinllipacha tiarirca. Chai punllacunallatami, 3quimsa huatata ña mandajushpaca, pai churashca tucui mandajcunaman, paipaj huasipi servijcunaman, jatun micuita rurarca. Chai jatun micuipaca, Persia shuti, Media shuti llactacunapi causanajuj ninan ushaita charijcunapash, paihuan chaipi carca. Shuj mandajcunapash, llactacunata mandajcunapashmi chaipi carca. 4Pai mandajuj llactapi ima juyailla tiashcacunata, paica ninambacha juyailla jatun ushaihuan mandajushcata ricuchingapajmi, patsaj pusaj chunga punllacaman, chai micuitaca rurarca. 5Chai punllacuna ña tucurijpica, pai mandana jatun huasi ladolla patio huertapimi, cutin shuj jatun micuita canchis punllacaman rurarca. Chai micuitaca, tucuilla Susa shuti jatun pueblopi causanajuj alicachi tucushcacunamambash, yangallacunamambashmi rurarca. 6Chaipica yuraj, verde, azul juyailla telacunahuanmi huarcushpa alichishca carca. Chai telacunataca, racuta caupushca lino puchacunahuan yana puca racu puchacunahuan, culqui surtijascunapi mármol shuti rumi pilarcunapi yalichishpa huatashcami carca. Marcarishpa tiarinacunapash orohuan, culquihuan rurashcami carca. Chai tiarinacunataca, juyailla alabastro shuti, jacinto shuti yuraj, yana rumicunahuan rurashca jahuapimi rurashca carca. 7Ufiachumbash, oro copacunapimi caranajurca. Chai copacunaca, shujta shujta rurashcami carca. Jatun mandajpaj vinotaca, jatun mandaj na mitsashpa carachun mandashcashnallatami, ashtacata caranajurca. 8Chai ufianataca, cai mandashcapi nishcashnallatami caranajurca: “Chai ufianata ufiaipacha nishpaca, pitapash na mandanachu canguichi” nishcashnallatami jatun mandajca, paipaj huasipi tucuilla mayordomocunataca, tucuicuna imashna munashcata ruranguichilla nishpa mandashca carca. 9Shinallata jatun mandaj Vasti shuti huarmipashmi, chai mandajcunapaj huarmicunaman, jatun mandaj Asuero shuti runa mandana huasipi, jatun micuita rurarca.
10Chai micuicuna tucurij canchis punllapimi, jatun mandajca vinota ufiashpa, paipaj shungupi cushijushca tiajurca. Shina cashpami jatun mandaj Asuero shuti runaca, paipaj ñaupajpi servishpa causaj Mehumán, Bizta, Harbona, Bigta, Abagta, Zetar, Carcas shuti eunuco nishca canchis runacunata cacharca. 11Paicunataca, jatun mandaj Vasti shuti huarmita, jatun mandajpaj coronata churachishpa, paipaj ñaupajman pushamuchunmi cacharca. Paipajman shamushca gentecunapash, caishuj mandajcunapash, pai juyaillagu cashcata ricuchunmi, pushamuchun cacharca. Chai huarmica, juyaillagupachami carca. 12Ashtahuangarin jatun mandaj Vasti shuti huarmica, eunuco runacunahuan, jatun mandaj Asuero shuti runa pushamuchun mandashpa cachashcataca, na cazurcachu. Chaimandami jatun mandajca, nina japirinshna ninandapacha fiñarirca. 13Shina fiñarishpami, punllacuna imashna cajta ricuj ali yachajcunata tapurca. (Paicunata tapuj cashpami, jatun mandajca mandashca shimitapash, imata ruranatapash alipacha tucui yachajushcacunata tapurca. 14Jatun mandajpaj ladopica: Carsena, Setar, Admata, Tarsis, Meres, Marsena, Memucán shuti canchis mandajcunami, jatun mandajhuan chimbapura parlai usharca. Paicunaca, Persia shuti, Media shuti llactacunata mandajcunami carca. Llactacunata mandanataca, paicunami pundapi ricunajurca). 15Jatun mandajca, cashna nishpami tapurca:
—Mandashcapi nijunshnallata jatun mandaj Vasti shuti huarmitaca, ¿imatata rurana?— nishpami tapurca.
Eunuco runacunahuan jatun mandaj Asuero shuti runa pushamuchun mandashpa cachajpi, Vasti shuti huarmi na cazushcamandami, chashna tapurca. 16Chaita tapujpimi, Memucán shuti mandajca, jatun mandajpaj ñaupajpipash, caishuj mandajcunapaj ñaupajpipash, cashna nijurca:
—Jatun mandaj Vasti shuti huarmica, cai nalita rurashpaca, na jatun mandajtalla llaquichishcachu. Ashtahuangarin tucui mandajcunatapash, jatun mandaj Asuero mandajuj tucui llactacunapi causaj tucui gentecunatapashmi llaquichishca. 17Ashtahuangarin jatun mandaj huarmi chashna rurashcataca, tucui huarmicunapaj rinrimanmi uyaringa. Chaita yachashpaca paicunapash, paicunapaj cusacunata yangapi churashpami, cashna ninajunga: ‘Jatun mandaj Asuero shuti runaca, jatun mandaj huarmitami paipaj ñaupajman pushamuchun cachashca. Shina cachajpipash, paica na cazushcachu’ ninajungami. 18Shinamandami, jatun mandaj huarmi chashna rurashcataca, Persia shuti, Media shuti llactacunata mandajcunapaj huarmicuna yachanga. Shina yachashpami, jatun mandaj churashca tucui mandajcunaman villanajunga. Shinamandami ninanda na cazurinajui, fiñanajui tianga. 19Shina cashcamanda can jatun mandajpaj ali cajpica, can jatun mandajllata shuj mandashcata escribichipairi: ‘Vasti shuti jatun mandaj huarmica, jatun mandaj Asuero runapaj ñaupajman, ama ashtahuan shamuchun’ nishpa mandapairi. Shinallata jatun mandajca, chai huarmipaj randica, shuj ashtahuan ali huarmita, jatun mandaj huarmi cachun churapangui. Chai mandashcata ama yangapi churachunga, Persia shuti, Media shuti llactacunapi tiaj mandashcacunapipash escribichingui. 20Jatun mandaj can mandashpa escribichishcataca, can mandana llacta jatun cajpipash, tucui llactacunapimi uyanajunga. Shina cajpimi, tucuilla huarmicuna paicunapaj cusacunataca, ashtahuan ali nishcacuna cajpipash, yangallacuna cajpipash cazunajunga— nijurcami.
21Jatun mandajpaj yuyaipipash, caishuj mandajcunapaj yuyaicunapipash, chai shimicunaca alimi uyarirca. Chaimandami jatun mandajca, Memucán shuti mandaj nishcashnallata rurarca. 22Paica, pai jatun mandaj mandajuj tucuilla llactacunamanmi cartacunata cacharca. Tucui llactacunamanmi, paicuna escribinshnallata escribishpa tucui gentecunamambash, paicunapaj rimaicunapi cacharca. Chai cartacunapica, cashnami nijurca: “Tucui cusacunami, cangunapaj huasipica ali cazuchina canguichi” nijurcami. Chaitaca, tucui llactacunapi causaj gentecunapaj rimaicunapimi villana canguichi nishpami cacharca.
Currently Selected:
ESTER 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.